မြန်မာရွှေ့ပြောင်း လုပ်သားများအား တွေ့ရစဉ်

ထိုင်းနိုင်ငံအတွင်း အလုပ်လုပ်ကိုင်နေကြသည့် ရွှေ့ပြောင်းအလုပ်သမားများအား ခွင့်ပြုချက်စနစ်နှင့် ထိန်းချုပ်စောင့်ကြည့် စစ်ဆေးမှုစနစ်များ ပါဝင်ပြီး ပြစ်ဒဏ် ပြင်ဆင်မှုများ လာမည့်ဇူလိုင် ၁ ရက်နေ့တွင် အသက်ဝင်တော့မည် ဖြစ်ကြောင်း ဥပဒေရေးရာ စည်းကမ်းစည်းမျည်း လိုက်နာမှုနှင့် ပတ်သက်သည့် ကြေညာချက်အရ သိရသည်။

နိုင်ငံတကာ လူ့အခွင့်အရေး စည်းမျဉ်းစည်းကမ်းနှင့် လိုက်လျောညီထွေမှု ရှိစေရန်အတွက်၊ လူသားအချင်းချင်း အမြတ်ထုတ်ယူမှုကြောင့် လူကုန်ကူးမှုအဖြစ်ကို ကာကွယ်ရန်အတွက် ရည်ရွယ်ပြီး လုပ်ငန်းရှင်များကလည်း အလုပ်သမားများထံမှ မလိုအပ်ဘဲ ကုန်ကျစရိတ်များ ကောက်ခံခြင်းမျိုး မပြုလုပ်ရန်၊ အလုပ်သမားများနှင့် သင့်လျော်သည့် ပြစ်ဒဏ်ဖြစ်အောင် ပြင်ဆင်လျှော့ပေါ့ ပေးထားသည်ဟု ဆိုသည်။

“ထိုင်းအစိုးရက တစ်ဖက်မှာ စာရွက်စာတမ်း အထောက်အထားတွေ သက်တမ်းတိုး ကုန်ကျစရိတ်နဲ့ အထောက်အထားပြုလုပ်စရိတ် ကြီးမြင့်နေတာနဲ့ ပတ်သက်ပြီး ဝေဖန်ထောက်ပြမှုတွေနဲ့ ရင်ဆိုင်နေရချိန်မှာ အခုလိုငွေဒဏ်၊ ထောင်ဒဏ်တွေ လျှော့ပေါ့လိုက်တာဟာ ထူးခြားစွာ တိုက်ဆိုင်နေတာပေါ့ဗျာ။ ဒီလိုပြင်ဆင်ပြဋ္ဌာန်းမှု အသစ်ထဲမှာဆိုရင် work permit မရှိဘဲ အလုပ်လုပ်ကိုင် နေတာကိုတွေ့ရင် အရင်ကလို ဘာထောင်ဒဏ်မှ မရှိတော့ဘူး။ ငွေဒဏ် ဆောင်လိုက်ရင် ပြီးပြီလေ။ သူ့နိုင်ငံသား ထိုင်းအလုပ်ရှင်တွေအတွက် ငွေဒဏ်၊ ထောင်ဒဏ် လျှော့ပေါ့သက်သာခွင့် ပေးထားတာ တွေ့ရတယ်။ ကျွန်တော်တို့ မြန်မာအစိုးရကဒါကို အတုယူသင့်တယ်” ဟု မြန်မာပြည်သားများအရေး ပူးတွဲလှုပ်ရှားမှုကော်မတီ (JACBA) ဥက္ကဋ္ဌ ဦးမိုးကြိုးက ဝေဖန်ထောက်ပြခဲ့သည်။

ဦးမိုးကြိုးက “ဒါ့အပြင် ရွှေ့ပြောင်းအလုပ်သမားတွေဟာ မိမိအလုပ်ရှင်ရဲ့ လိပ်စာအတိုင်း နေထိုင်ရတာမျိုး မဟုတ်တော့ဘဲ မိမိတို့ အဆင်ပြေမယ့် အိမ်လိပ်စာကနေ မိမိလုပ်ကိုင်နေတဲ့ အလုပ်ဆီကို လွတ်လပ်စွာ နေထိုင်၊ သွားလာခွင့်လည်း ရသွားကြပါပြီ” ဟု ပြောကြားသည်။

အလုပ်လုပ်ခွင့် work permit မရှိသော ရွှေ့ပြောင်းအလုပ်သမားများသည် ယခင်က ထောင်ဒဏ်ငါးနှစ် ဒဏ်ငွေ ဘတ်၂၀,၀၀၀ မှ ဘတ် ၁၀၀,၀၀၀ အထိ အရေးယူခံရမှာဖြစ်ပြီး ယခုတွင် ဒဏ်ငွေ ဘတ် ၅,၀၀၀ မှ ဘတ် ၅၀,၀၀၀ အထိနှင့် ထောင်ဒဏ်မရှိတော့ဘဲ ပြင်ဆင်လျှော့ပေါ့ ပေးထားကြောင်း သိရသည်။

တရားမဝင် ရွှေ့ပြောင်းအလုပ်သမားများကို ငှားရမ်းလက်ခံထားသော အလုပ်ရှင်များသည် ယခင်က တရားမဝင် အလုပ်သမား တစ်ဦးကို လက်ခံငှားရမ်းထားလျှင် ဒဏ်ငွေ ဘတ် ၄၀၀,၀၀၀ မှ ဘတ် ၈၀၀,၀၀၀ အထိ အရေးယူခံရမှာဖြစ်ပြီး ယခုတွင် ဒဏ်ငွေ ဘတ် ၁၀,၀၀၀ မှ ဘတ်၁၀၀,၀၀၀ အထိ ပြင်ဆင် လျှော့ပေါ့ပေးထားသည်။

အကယ်၍ အကြိမ်ကြိမ် ကျူးလွန်မှု ရှိခဲ့ပါက တစ်နှစ်ထက်မပိုသော ထောင်ဒဏ်နှင့် ဒဏ်ငွေ ဘတ် ၅၀,၀၀၀ မှ ဘတ် ၂၀၀,၀၀၀ အထိ အရေးယူခံရမှာဖြစ်ပြီး ကျူးလွန်သည့် နေ့မှစပြီး သုံးနှစ်တိုင်တိုင် ရွှေ့ပြောင်း အလုပ်သမားများ ငှားရမ်းခြင်းကို ပိတ်ပင်ခံရမှာဖြစ်ကြောင်း သိရသည်။ ၎င်းကြေညာချက်သည် လာမည့် ဇူလိုင် ၁ ရက်မှစပြီး စတင်အသုံးပြုမှာ ဖြစ်ကြောင်း၊ ဇွန်လ ၃၀ ရက်အထိ OSS စင်တာများတွင် အလုပ်သမားကိုယ်ရေး ကိုယ်တာ အကျဉ်းမှတ်ပုံတင်ခြင်း နေထိုင်ခွင့်ဗီဇာ ထုခြင်းနှင့် အလုပ်လုပ်ခွင့်လက်မှတ် work permit ပြုလုပ်ခြင်းကို အပြီးအစီး ဆောင်ရွက်ရမည်ဖြစ်ပြီး အလုပ်သမား ဝန်ကြီးဌာနက မည်သည့်အကြောင်းများကြောင့် နောက်ထပ်အချိန်တိုးပေးခြင်းမျိုး ရှိတော့မည် မဟုတ်ကြောင်း ဦးမိုးကြိုးက ပြောကြားသည်။