<

မြိတ်မြို့ရှိ ငါးအမှုန့်ကြိတ်စက်ရုံများ ပတ်ဝန်းကျင်စီမံခန့်ခွဲမှု အစီအစဉ်များကို ဆက်တိုက်လုပ်ဆောင်လာပြီး ပြည်သူများအား ချပြဆွေးနွေး

ပတ်ဝန်းကျင်စီမံခန့်ခွဲမှု အစီအစဉ်များကို ဆွေးနွေးနေစဉ်

မြိတ်မြို့ရှိ ငါးအမှုန့်ကြိတ်စက်ရုံများအနေဖြင့် ပတ်ဝန်းကျင်စီမံခန့်ခွဲမှု အစီအစဉ်များကို ဆက်တိုက်လုပ်ဆောင်ကာ ပြည်သူများအား ချပြခြင်းများပြုလုပ်လာကြကြောင်း သိရသည်။

မြိတ်မြို့ အင်းလေးမြိုင်စက်မှုဇုန်တွင် လုပ်ငန်းလည်ပတ်လျက်ရှိသော ငါးအမှုန့် ကြိတ်စက်ရုံများအနေဖြင့် အနံ့ဆိုးများထွက်နေခြင်း၊ သဘာဝပတ်ဝန်းကျင်ထိခိုက်မှုများ ရှိနေခြင်းကြောင့် ဒေသခံပြည်သူများအကြား ကန့်ကွက်မှုရှိနေကာ တိုင်းဒေသကြီးအစိုးရမှလည်း အနံ့အသက်လျှော့ချရန်နှင့် သဘာဝပတ်ဝန်းကျင် ထိခိုက်မှုမရှိအောင် လုပ်ဆောင်ရန် ညွှန်ကြားချက်များ ထုတ်ပြန်ထားကြောင်း သိရသည်။ ငါးအမှုန့်ကြိတ်စက်ရုံများအနေဖြင့် EMP (Environmental Management Plan) ကို ရေးဆွဲကာ ဒေသခံပြည်သူများနှင့် အရပ်ဘက်အဖွဲ့အစည်းများကို ဆွေးနွေးရှင်းလင်းမှုများ ပြုလုပ်လျက်ရှိကြောင်း သိရသည်။

“ပတ်ဝန်းကျင်စီမံခန့်ခွဲမှုနှင့် ပတ်သက်ပြီး ရေးဆွဲတာက ကုမ္ပဏီအနေနဲ့ လုပ်ချင်တဲ့ဆန္ဒရှိတယ်လုပ်ဖို့လည်း ဆက်သွယ်ဆောင်ရွက်တယ်။ တိုင်းဒေသကြီးအစိုးရနဲ့ ပတ်ဝန်းကျင်ထိန်းသိမ်းရေး ဌာနတွေကလည်း ညွှန်ကြားတာရှိတယ်။ ကျွန်တော်တို့လည်း တတ်သိသလောက် ကုမ္ပဏီစတင်ထူထောင်တဲ့ အချိန်ကစပြီး အနံ့အသက်လျော့ပါးအောင် လုပ်ဆောင်ထားတာရှိတယ်။ ယိုးဒယားနိုင်ငံကို သွားရောက်ပြီး သူတို့လုပ်ထားတဲ့ နည်းပညာတွေကို သွားကြည့်ပြီး လုပ်ဆောင်ထားတာရှိတယ်။ နောက်ပိုင်းမှာ ပတ်ဝန်းကျင်စီမံခန့်ခွဲမှုကို ရေးဆွဲတာကို တိုင်းဒေသကြီးအစိုးရက ညွှန်ကြားတယ်။ ကျွန်တော်တို့ကိုယ်တိုင်ကလည်း အနံ့အသက် ပိုမိုလျော့ပါးလာအောင် ဆောင်ရွက်ချင်တဲ့ဆန္ဒကြောင့် Green Myanmar အဖွဲ့နဲ့ချိတ်ဆက်ပြီး လုပ်ကိုင်ဆောင်ရွက်ခြင်းဖြစ်ပါတယ်” ဟု ထူးထူးတိုးကုမ္ပဏီမှ အထွေထွေမန်နေဂျာ ဦးအောင်အောင်မျိုးက ပြောကြားသည်။

ထူးထူးတိုးကုမ္ပဏီအနေဖြင့် ပတ်ဝန်းကျင်စီမံခန့်ခွဲမှု အစီအစဉ်ရေးဆွဲခြင်းနှင့် ပြည်သူများအား ဆွေးနွေးချပြမှုကို မေ ၄ ရက်က ဆောင်ရွက်ခဲ့ပြီး ငါးအမှုန့်ကြိတ်စက်ရုံများတွင် လေးခုမြောက်ဆောင်ရွက်လာသည့် ကုမ္ပဏီတစ်ခုဖြစ်ကြောင်း သိရသည်။

“အနံ့အသက်တွေ ပိုပြီးတော့ လျော့နည်းလာအောင်ရယ်၊ စွန့်ပစ်ပစ္စည်းတွေကိုလည်း ပိုပြီးတော့ ပတ်ဝန်းကျင်ထိခိုက်မှုမရှိအောင် ရည်ရွယ်ပြီး တတ်သိပညာရှင်တွေ ဖိတ်ခေါ်တယ်။ Green Myanmar က ပညာရှင်တွေကို ဖိတ်ခေါ်စစ်ဆေးစေပြီး အခုလိုမျိုးဆွေးနွေးပွဲကို လုပ်ရခြင်းဖြစ်ပါတယ်။ ကျွန်တော်တို့စက်ရုံက ၂၀၀၆ ခုနှစ်မှာ လုပ်ငန်းစတင်လည်ပတ်ပြီးတော့ ကုန်ကြမ်းရရှိမှုအပေါ် မူတည်ပြီးတော့ အနည်းဆုံး တန် ၄၅၀ လောက် ကုန်ချောထုတ်နိုင်တယ်။ Export ကတော့ အိတ်ရေ ၈၀၀၀ လောက်ပို့ပါတယ်။ တစ်နှစ်လုံးအတွက် နိုင်ငံတော်ကို အခွန်ပေးသွင်းမှုက ၂၀၁၆-၂၀၁၇ မှာ ဒေါ်လာ ၆၈၀၀၀၀ ၀န်းကျင်အထိ ရှိခဲ့ပါတယ်” ဟု ဦးအောင်အောင်မျိုးက ပြောကြားသည်။

မြိတ်မြို့တွင် ထူးထူးတိုး၊ မင်းဇာနည်၊ အဆောင်ကောင်းနှင့် ဗင်းတေ့ခ်ျ ငါးအမှုန့်ကြိတ် စက်ရုံများရှိပြီး ကျွန်းစုမြို့နယ်၊ ပထက်ကျွန်းတွင် ပြည်ဖြိုးထွန်းကုမ္ပဏီမှ ငါးအမှုန့်ကြိတ် စက်ရုံတစ်ခုရှိကြောင်း သိရသည်။ ငါးအမှုန့်ကြိတ်စက်ရုံနှင့် ပတ်သက်ပြီး အနံ့အသက်ဆိုး ထွက်ရှိမှုအပေါ် ဒေသခံများက တိုင်ကြားထားခြင်း၊ ကန့်ကွက်ဆန္ဒထုတ်ဖော်မှုများရှိခဲ့ပြီး တိုင်းဒေသကြီး ၀န်ကြီးချုပ်ကိုယ်တိုင် ငါးအမှုန့်ကြိတ်စက်ရုံများကို လာရောက်ကာ အနံ့အသက်ဆိုးများ ထွက်ရှိနေမှုအပေါ် လျှော့ချရန်နှင့် သဘာဝပတ်ဝန်းကျင် ထိခိုက်မှုမရှိစေရန်အတွက် ညွှန်ကြားခဲ့ကြောင်း သိရသည်။

ငါးအမှုန့်ကြိတ်စက်ရုံများအနေဖြင့် ရေရှည်ဆောင်ရွက်ရမည့် လုပ်ငန်းဖြစ်သောကြောင့် ဒေသခံများနှင့် ဌာနဆိုင်ရာများ၏ လမ်းညွှန်မှုအတိုင်း ဆောင်ရွက်ခဲ့ရာ အနံ့အသက်ဆိုးများ လျော့သွားပြီး ပတ်ဝန်းကျင်ထိခိုက်မှု နည်းပါးအောင်လည်း လုပ်ဆောင်နိုင်ခဲ့ကြောင်း သိရသည်။ ငါးအမှုန့်ကြိတ်စက်ရုံများအနေဖြင့် EMP စာချုပ်မူကြမ်းပါ အချက်အလက်များအတိုင်း လိုက်နာဆောင်ရွက်ရမည်ဖြစ်ကာ လိုက်နာမှုမရှိပါက အရေးယူခံရနိုင်ကြောင်း သိရသည်။

May 5, 2018














Copy Protected by Chetan's WP-Copyprotect.