OBOR ၏ မြန်မာ-တရုတ် စီးပွားရေးစြင်္ကံစီမံကိန်းတွင် မြန်မာလုပ်ငန်းရှင်များ ပါဝင်ဆောင်ရွက်ရန် မြန်မာ-တရုတ် စီးပွားရေးကောင်စီကို ဧပြီလအတွင်း ဖွဲ့စည်းမည်ဖြစ်ကြောင်း ကုန်သည်စက်မှုအသင်းချုပ်မှ သိရသည်။
“OBOR နဲ့ပတ်သက်ပြီး ကျွန်တော်တို့ကို ၂၆ ရက်နေ့က တရုတ်သံအမတ်ကြီးက လုပ်ငန်းရှင်တွေကို ဖိတ်ကြားပြီးတော့ Myanmar-China Business Council ဖွဲ့ပေးပါတဲ့။ ကျွန်တော်တို့လည်းဖွဲ့ဖို့ စီစဉ်နေပါတယ်။ ဧပြီလအတွင်းမှာ ဖွဲ့စည်းဖို့ ဆောင်ရွက်နေပါတယ်” ဟု ကုန်သည်စက်မှုအသင်းချုပ်ဥက္ကဋ္ဌ ဦးဇော်မင်းဝင်းက ပြောကြားသည်။
“OBOR ရဲ့ Economic Corridor မှာလုပ်မယ့်စီမံကိန်းတွေမှာ မြန်မာနိုင်ငံအနေနဲ့ JV ပဲဖြစ်ဖြစ် လုပ်နိုင်မယ့်လုပ်ငန်းရှင်တွေက ပါဝင်ဖို့ဆောင်ရွက်နေပါတယ်” ဟု ဦးဇော်မင်းဝင်းက ဆက်လက်ပြောကြားသည်။
မြန်မာနိုင်ငံနှင့် တရုတ်နိုင်ငံတို့အကြား နှစ်နိုင်ငံပူးပေါင်း၍ ပိုမိုကောင်းမွန်သည့် စီးပွားရေးကွန်ရက်တည်ဆောက်ပြီး တရုတ်- မြန်မာ နှစ်နိုင်ငံစီးပွားရေးနယ်ပယ် ပူးပေါင်းဖလှယ်ရေး စင်မြင့်သစ်တည်ထောင်ရန် ပြင်ဆင်လျက်ရှိကြောင်း မြန်မာနိုင်ငံဆိုင်ရာ တရုတ်သံရုံး၏ ထုတ်ပြန်ချက်အရ သိရသည်။
မြန်မာနိုင်ငံဆိုင်ရာ တရုတ်သံအမတ်ကြီး Mr. Hong Liang က တရုတ်-မြန်မာနှစ်နိုင်ငံမှ The Belt and Road နှင့် တရုတ်- မြန်မာ စီးပွားရေးစြင်္ကံဆောက်လုပ်ရာတွင် တက်ကြွစွာ အကျိုးပြုဆောင်ရွက်လိုကြောင်း၊ နှစ်နိုင်ငံ စီးပွားရေးနယ်ပယ်ပူးပေါင်းဖလှယ်သည့် စင်မြင့် မြန်မာ-တရုတ် ကုန်သည်ကြီးများအသင်းကို ဆောလျင်စွာ တည်ထောင်စေလိုကြောင်း မြန်မာနိုင်ငံဆိုင်ရာ တရုတ်သံရုံးနှင့် မြန်မာနိုင်ငံရှိ တရုတ်ကုန်သည် လုပ်ငန်းရှင်ကြီးများအသင်းတို့ မတ် ၂၆ ရက်က ရန်ကုန်မြို့တွင် တရုတ်-မြန်မာနှစ်နိုင်ငံ စီးပွားရေးလုပ်ငန်းရှင်များ နှီးနှောဖလှယ်ပွဲတွင် ပြောကြားသည်။
မြန်မာနိုင်ငံဆိုင်ရာ တရုတ်သံရုံးမှ မြန်မာနိုင်ငံရှိ တရုတ်ကုန်သည်လုပ်ငန်းရှင်ကြီးများအသင်းနှင့် မြန်မာနိုင်ငံစက်မှုလက်မှု စီးပွားရေးနယ်ပယ်တို့ပူးပေါင်း၍ ပိုမိုကောင်းမွန်သည့် စီးပွားရေးကွန်ရက် တည်ဆောက်ပြီး တရုတ်-မြန်မာနှစ်နိုင်ငံ စီးပွားရေးနယ်ပယ် ပူးပေါင်းဖလှယ်ရေးစင်မြင့်သစ် ‘တရုတ်- မြန်မာစီးပွားရေးကောင်စီ’ သို့မဟုတ် ‘မြန်မာ-တရုတ်ကုန်သည်ကြီးများအသင်း’ ကို တည်ဆောက်ရန်အတွက် ထောက်ခံကူညီသွားမည်ဖြစ်ကြောင်း သံအမတ်ကြီးက ပြောကြားသည်။
