စက်သုံးဆီအရောင်းဆိုင် ခွင့်ပြုမိန့်ကို ပြည်ထောင်စုအဆင့်အထိ တင်ပြ၍ ဆောင်ရွက်နေရခြင်းများအစား တိုင်းဒေသကြီးနှင့် ပြည်နယ်အဆင့်တွင်ပင် လိုအပ်သော စိစစ်မှုများပြုလုပ်ပြီး တိုင်းဒေသကြီးနှင့် ပြည်နယ် အစိုးရအဖွဲ့များမှ ခွင့်ပြုမိန့်များ ထုတ်ပေးခြင်းဖြင့် အဆင့်များ လျှော့ချပေးနိုင်ရန် လိုအပ်နေသည်ဟု လျှပ်စစ်နှင့် စွမ်းအင်ကဏ္ဍ ဖွံ့ဖြိုးတိုးတက်ရေး လုပ်ငန်းကော်မတီ အဖွဲ့ဝင် ဒေါက်တာဝင်းမြင့်က ပြောကြားသည်။
စက်သုံးဆီအရောင်းဆိုင်များ ဖွင့်လှစ်ရောင်းချခွင့်ရရှိရန် ပြည်နယ်နှင့် တိုင်းဒေသကြီးများ အားလုံးအတွက် တစ်ပြေးညီ ဆောင်ရွက်မည့် လုပ်ထုံးလုပ်နည်းနှင့် Standard Operating Procedures များ မတူညီဘဲ ကွဲပြားနေသဖြင့် အခက်အခဲများ တွေ့ရှိနေရသည်ဟု ဦးဝင်းမြင့်က ဆိုသည်။
လက်ရှိတွင် မြေအသုံးချမှု ကင်းရှင်းသော၊ မြေကိစ္စ ခိုင်မာသော ဆိုင်များပင်လျှင် ခွင့်ပြုချက်ရရှိရန် အချိန်တစ်နှစ်ခန့် ကြာမြင့်နေပြီး မြေကိစ္စဆောင်ရွက်ရန် လိုအပ်သော အခြေအနေတွင် နှစ်နှစ်ခန့် အချိန်ကြာမြင့်နေကြောင်းနှင့် အဆင့်ဆင့် ဆောင်ရွက်နေရသဖြင့် မလိုလားအပ်သော ရှုပ်ထွေးမှုများ ကြုံတွေ့နေရသည်ဟု ဆိုသည်။
ထို့ကြောင့် စက်သုံးဆီ အရောင်းဆိုင်များ ဖွင့်လှစ်နိုင်ရန် လယ ၃၀ လျှောက်ထားမှုတွင် မူဝါဒများ တစ်ပြေးညီတည်း ဖြစ်ရေးအတွက် စနစ်တစ်ခုဖြင့် ဖြေလျှော့ပေးရန်နှင့် စက်သုံးဆီ အရောင်းဆိုင်များ ဖွင့်လှစ်ရောင်းချခွင့် လိုင်စင်ထုတ်ပေးမှုကို ပိုမိုသွက်လက်စွာ ခွင့်ပြုပေးရန် ဦးဝင်းမြင့်က တောင်းဆိုသည်။
ထို့ပြင် ရေနံထွက်ပစ္စည်း ရောင်းဝယ်ရေးဆိုင်ရာ လုပ်ထုံးလုပ်နည်း၊ နည်းဥပဒေ သို့မဟုတ် ညွှန်ကြားချက်၊ အမိန့်တို့ဖြင့် ထုတ်ပြန်ဆောင်ရွက်ခြင်းကို လုပ်ငန်းရှင်များ လွယ်ကူစွာ သိရှိလိုက်နာနိုင်ရန်နှင့် တိုင်းဒေသကြီး၊ ပြည်နယ်အဆင့်တွင်ပါ One-Stop Service ဖြင့် ဆောင်ရွက်နိုင်ရေး စီစဉ်ပေးစေလိုကြောင်း ဦးဝင်းမြင့်က ပြောကြားသည်။
ရန်ကုန်တိုင်းအတွင်း ဆီဆိုင်များ ဖွင့်လှစ်ခွင့်ပေးရာတွင် ကြန့်ကြာနေရခြင်းမှာ လယ်ယာမြေကို အခြားနည်းသုံးစွဲခွင့် မရှိဘဲ ဖွင့်ထားသည့်ဆိုင်များ ရှိနေသည့်အတွက် အဆိုပါ အခြေအနေများကို ပြန်လည်ချိန်ညှိ နေရခြင်းနှင့် ဆီဆိုင်ဖွင့်ရန် ပတ်ဝန်းကျင် ထောက်ခံချက် လိုအပ်သော်လည်း ပတ်ဝန်းကျင်မှ မိမိအိမ်နံဘေး ဆီဆိုင်လာဖွင့်ခြင်း နှစ်လိုမှု မရှိသည့်အတွက် မကျေနပ်မှုများ ရှိနေသဖြင့် အဆိုပါ အခြေအနေများအပေါ် သိမ်သိမ်မွေ့မွေ့ ကိုင်တွယ်ဆောင်ရွက်နေရသည်ဟု ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်းက ပြောကြားသည်။
