၂၀၁၈ ခုနှစ်အတွင်း ကြားဖြတ်ရွေးကောက်ပွဲ ကျင်းပမည်ဆိုပါက ရွေးကောက်ပွဲ ကျင်းပမည့်ရက်အား ယခုအချိန်ကတည်းက ကြေညာသင့်ကြောင်း ရွေးကောက်ပွဲစောင့်ကြည့်လေ့လာရေး အရပ်ဘက်အဖွဲ့အစည်းများက တိုက်တွန်းလိုက်သည်။
ဇန်နဝါရီ ၁၇ ရက်က ရွေးကောက်ပွဲ စောင့်ကြည့်လေ့လာရေး အရပ်ဘက်အဖွဲ့အစည်းများ ပူးပေါင်းဖွဲ့စည်းထားသည့် ရွေးကောက်ပွဲမူဘောင် ပြုပြင်ပြောင်းလဲရေး ပူးပေါင်းဆောင်ရွက်မှုအဖွဲ့ (ERCB) က ၂၀၁၈ ကြားဖြတ်ရွေးကောက်ပွဲ ဖြစ်စဉ်တွင် ပွင့်လင်းမြင်သာမှုနှင့် ပူးပေါင်းဆောင်ရွက်မှု ပိုမိုမြင့်မားလာရေးအတွက် ပြည်ထောင်စုရွေးကောက်ပွဲကော်မရှင်ကို တိုက်တွန်းကြောင်းနှင့် ပတ်သက်၍ သတင်းစာရှင်းလင်းသည်။
ရွေးကောက်ပွဲ ကျင်းပရန် လျာထားသည့် အချိန်ကာလနှင့် ရွေးကောက်ပွဲ လုပ်ငန်းစဉ် အချိန်စာရင်းကို မသိရှိရသဖြင့် မဲဆန္ဒရှင်များ၏ ပါဝင်မှု အားနည်းပါးနိုင်ခြင်း၊ ရွေးကောက်ပွဲ လုပ်ငန်းစဉ် စီမံခန့်ခွဲမှု အခက်အခဲကြုံနိုင်ခြင်း၊ နိုင်ငံရေးပါတီများနှင့် အရပ်ဘက်အဖွဲ့အစည်းများ၏ ပူးပေါင်းပါဝင် ဆောင်ရွက်မှု အားနည်းနိုင်ခြင်း စသည်တို့ ဖြစ်လာနိုင်သည်ကို ရွေးကောက်ပွဲမူဘောင် ပြုပြင်ပြောင်းလဲရေး ပူးပေါင်းဆောင်ရွက်မှုအဖွဲ့ (ERCB) က စိုးရိမ်ကြောင်း သတင်းစာရှင်းလင်းပွဲတွင် သတင်းထုတ်ပြန်ခဲ့သည်။
သို့ဖြစ်ပါ၍ ရွေးကောက်ပွဲတွင် နိုင်ငံရေးပါတီများနှင့် အရပ်ဘက်အဖွဲ့အစည်းများ အပါအဝင် အများပြည်သူများ ပါဝင်ဆောင်ရွက်မှု မြင့်မားလာရေးအတွက် လာမည့် ကြားဖြတ်ရွေးကောက်ပွဲ၏ ရွေးကောက်ပွဲလုပ်ငန်းစဉ် အချိန်စာရင်း (ရွေးကောက်ပွဲနေ့၊ ကိုယ်စားလှယ်လောင်း အမည်တင်သွင်းမည့်နေ့၊ မဲဆန္ဒရှင်စာရင်း ပြုစုခြင်းနှင့် ထုတ်ပြန်ကြေညာသည့်နေ့၊ ကြိုတင်မဲပေးရမည့်နေ့) လုပ်ငန်းစဉ် အသေးစိတ်ကို အနည်းဆုံး ခြောက်လကြိုတင် ကြေညာပေးရန်၊ ရွေးကောက်ပွဲဆိုင်ရာ သတင်းအချက်အလက်များ မဲဆန္ဒရှင်စာရင်း၊ မဲရုံစာရင်း၊ ကိုယ်စားလှယ်လောင်းစာရင်း၊ ရွေးကောက်ပွဲဆိုင်ရာ နည်းဥပဒေ/လုပ်ထုံးလုပ်နည်းများကို အချိန်နှင့်တစ်ပြေးညီ ထုတ်ပေးရန်နှင့် လစ်လပ်နေရာ အများစုတွင် ရွေးကောက်ပွဲ လုပ်ငန်းစဉ်များကို စီမံခန့်ခွဲရန်နှင့် ပြည်သူများ၊ အရပ်ဘက်အဖွဲ့အစည်းများ၊ နိုင်ငံရေးပါတီများ ပူးပေါင်းပါဝင်မှုပြုလုပ်ရန် အခက်အခဲ မရှိနိုင်သည့် ပွင့်လင်းရာသီ ကာလမျိုးတွင် ရွေးချယ်ကျင်းပရန်လည်း ရွေးကောက်ပွဲ မူဘောင် ပြုပြင်ပြောင်းလဲရေး ပူးပေါင်းဆောင်ရွက်မှုအဖွဲ့ (ERCB) က ပြည်ထောင်စုရွေးကောက်ပွဲကော်မရှင်ကို တိုက်တွန်းထားသည်။
ထို့အတူ ရွေးကောက်ပွဲဆိုင်ရာ ပြည်သူ့လှုပ်ရှားမှုအဖွဲ့ (PACE) မှ အမှုဆောင်ဒါရိုက်တာ ဦးစိုင်းရဲကျော်စွာမြင့်က “ကြားဖြတ်ရွေးကောက်ပွဲ လုပ်မယ်ဆိုရင် အမြန်ဆုံးကြေညာဖို့ တိုက်တွန်းလိုပါတယ်။ ခြောက်လကြိုပြီးတော့ ကြေညာပါ။ ဒါမှ နိုင်ငံသားတွေ ကြားဖြတ်ရွေးကောက်ပွဲဖြစ်စဉ်မှာ ပိုမိုပါဝင်လာနိုင်ဖို့ နိုင်ငံရေးပါတီတွေ၊ အရပ်ဘက်အဖွဲ့အစည်းတွေက ပြင်ဆင်မှုတွေ အသိပညာပေးမှုတွေ ပိုမိုဆောင်ရွက်နိုင်မယ်။ နောက်ပြီး ကြိုတင်ကြေညာခြင်းအားဖြင့် အနိုင်ရပါတီပဲ ဖြစ်ဖြစ်၊ ပါတီအသစ်တွေပဲ ဖြစ်ဖြစ်၊ ဝင်ရောက်ယှဉ်ပြိုင်မယ့် နိုင်ငံရေးပါတီတွေအားလုံး တစ်ပြေးညီ ပြင်ဆင်ချိန်ရမယ်။ ဒါဟာ ရွေးကောက်ပွဲကော်မရှင်အတွက် ပွင့်လင်းမြင်သာမှုနဲ့ သမာသမတ်ကျမှုကို ပြသရာလည်း ရောက်ပါမယ်”ဟု သတင်းစာရှင်းလင်းရာတွင် ပြောကြားသည်။
၂၀၁၈ ကြားဖြတ်ရွေးကောက်ပွဲဖြစ်စဉ်နှင့် ပတ်သက်၍လည်း ပြည်ထောင်စုရွေးကောက်ပွဲကော်မရှင်နှင့် တွေ့ဆုံနိုင်ရန် ရွေးကောက်ပွဲမူဘောင် ပြုပြင်ပြောင်းလဲရေး ပူးပေါင်းဆောင်ရွက်မှုအဖွဲ့ (ERCB) အနေဖြင့် စီစဉ်ထားကြောင်း သိရသည်။
ပြည်သူ့လွှတ်တော် နှစ်နေရာ အပါအဝင် လစ်လပ်နေသည့် မဲဆန္ဒနယ် ရှစ်နေရာအတွက် ကြားဖြတ်ရွေးကောက်ပွဲအား ၂၀၁၈ ခုနှစ်အတွင်း ပြုလုပ်မည်ဟု ပြည်ထောင်စုရွေးကောက်ပွဲကော်မရှင်အဖွဲ့ဝင် ဦးအောင်မြင့် က ဇန်နဝါရီ ၁၅ ရက်က ပြုလုပ်သည့် အမျိုးသားလွှတ်တော် အစည်းအဝေးတွင် ပြောကြားခဲ့သည်။
အဆိုပါ လစ်လပ်လျက်ရှိသည့် မဲဆန္ဒနယ်မြေများမှာ မန္တလေးတိုင်းဒေသကြီး သပိတ်ကျင်းမြို့နယ် မဲဆန္ဒနယ်အမှတ် (၁)၊ ချင်းပြည်နယ် မတူပီမြို့နယ် မဲဆန္ဒနယ်အမှတ် (၁)၊ ပဲခူးတိုင်းဒေသကြီး အုတ်တွင်းမြို့နယ် မဲဆန္ဒနယ်အမှတ် (၁)၊ ရခိုင်ပြည်နယ် ရသေ့တောင်မြို့နယ် မဲဆန္ဒနယ်အမှတ် (၂)၊ စစ်ကိုင်းတိုင်းဒေသကြီး တမူးမြို့နယ် မဲဆန္ဒနယ် အမှတ် (၂)၊ မကွေးတိုင်းဒေသကြီး မင်းဘူးမြို့နယ် မဲဆန္ဒနယ်အမှတ် (၂)၊ ပြည်သူ့လွှတ်တော်တွင် လစ်လပ်နေသည့် နှစ်နေရာသည် ချင်းပြည်နယ် ကန်ပက်လက်မြို့နယ် မဲဆန္ဒနယ်နှင့် ရှမ်းပြည်နယ် လဲချားမြို့နယ် မဲဆန္ဒနယ်များ ဖြစ်ကြောင်း သိရသည်။
ထို့အတူ ပြည်ထောင်စုရွေးကောက်ပွဲကော်မရှင်အဖွဲ့ဝင် ဦးစိုးရယ်က ၂၀၁၈ ခုနှစ် ဧပြီမှ စက်တင်ဘာအထိ ခြောက်လတာအတွင်း ဆောင်ရွက်မည့် လုပ်ငန်းစဉ်များအတွက် ကော်မရှင်အဖွဲ့ခွဲရုံးများအတွက် ကျပ်သန်း ၂၈၃၄ ဒသမ ၀၅၆ နှင့် ကြားဖြတ်ရွေးကောက်ပွဲအတွက် ကျပ်သန်း ၁၆၆၁ ဒသမ ၆၁၆၊ စုစုပေါင်း သာမန်အသုံးစရိတ် ကျပ် သန်း ၄၄၉၅ ဒသမ ၆၇၂ ကို ပြည်ထောင်စု လွှတ်တော်သို့ ဇန်နဝါရီ ၁၆ ရက်က တင်ပြခဲ့သည်။
အရပ်သားအုပ်ချုပ်ရေးစနစ်သို့ ပြောင်းလဲခဲ့သည့် ၂၀၁၀ ရွေးကောက်ပွဲ၊ ၂၀၁၂ ကြားဖြတ်ရွေးကောက်ပွဲ၊ ၂၀၁၅ ရွေးကောက်ပွဲ၊ ၂၀၁၇ ကြားဖြတ်ရွေးကောက်ပွဲများ ပြုလုပ်ခဲ့ပြီးဖြစ်ကာ ၂၀၁၈ ခုနှစ်အတွင်း ပြုလုပ်မည့် ကြားဖြတ်ရွေးကောက်ပွဲသည် ငါးကြိမ်မြောက် ပြုလုပ်သည့် ရွေးကောက်ပွဲဖြစ်လာမည် ဖြစ်သည်။
