အားကစားနှင့် ကာယပညာသိပ္ပံ (မော်လမြိုင်) ငွေထုတ်စာရင်းမှ တာဝန်ရှိသူ၏ လက်မှတ်ကို တုပရေးထိုးကာ မြန်မာ့စီးပွားရေးဘဏ်မှ ကျပ်သိန်း ၄၀၀ နီးပါးအား လိမ်လည်ထုတ်ယူမှုဖြစ်ပွားခဲ့ကြောင်း သတင်း ရရှိသည်။ဖြစ်စဉ်မှာ ၂၀၁၇ ခုနှစ် အောက်တိုဘာ ၉ ရက်က အားကစားနှင့် ကာယပညာသိပ္ပံ (မော်လမြိုင်) ၏ ငွေထုတ်စာရင်းအမှတ် MD 010494 မှ ချက်လက်မှတ်ဖြင့် ကျပ် ၁၆၈၈၈၂၀၀ အား ဒေါ်ခင်သိန်းဝင်းကလည်း ကောင်း၊ ၂၀၁၇ ခုနှစ် နိုဝင်ဘာ ၁၀ ရက်က ကျပ် ၂၂၇၀၀၀၀၀ အား ဒေါ်အိအိမိုးကလည်းကောင်း မြန်မာ့စီးပွားရေးဘဏ်တွင် ထုတ်ယူခဲ့ကြောင်း၊ ဒေါ်ခင်သိန်းဝင်း ထုတ်ယူသည့် ချက်လက်မှတ်တွင် ဒေါ်အိမွန်ဇော်က ဒေါ်ခင်သိန်းဝင်းနှင့် ဒေါ်အိအိမိုးတို့ နှစ်ဦးအား ချက် လက်မှတ်ရေးသား ထုတ်ယူစေခဲ့ပြီး တစ်ဦးလျှင် ကျပ် ၁၀ သိန်းရရှိခဲ့ကြောင်း စစ်ဆေး သိရှိရသဖြင့် ကျပ် ၃၉၅၈၈၂၀၀ ကို အလွဲသုံး စားလိမ်လည်ထုတ်ယူသူ ဒေါ်အိမွန်ဇော်ပါ သုံးဦးအား ဥပဒေအရ အရေးယူပေးပါရန် အားကစားနှင့် ကာယပညာသိပ္ပံ (မော်လမြိုင်) မှ ဒုညွှန်ကြားရေးမှူး ဦးသန်းထွေးအောင်က မော်လမြိုင်မြို့ မြိုင်သာယာနယ်မြေ ရဲစခန်းသို့ ဒီဇင်ဘာ ၃၁ ရက်က လာရောက်တိုင်ကြားခဲ့ကြောင်း ရဲမှတ်တမ်းများအရ သိရသည်။
အားကစားနှင့် ကာယပညာသိပ္ပံ (မော်လမြိုင်) မှ တာဝန်ရှိသူ၏လက်မှတ်ကို တုပရေးထိုး၍ ချက်လက်မှတ်များဖြင့် မြန်မာ့စီးပွားရေးဘဏ် (၁) မှ ငွေထုတ်ယူသွားသော အားကစားနှင့် ကာယပညာသိပ္ပံ (မော်လမြိုင်) ဝင်းနေ ဒေါ်အိမွန်ဇော် (၃၅ နှစ်) (ဘ) ဦးခင်မောင်ဇော် ကရင်ပြည်နယ် မြဝတီမြို့နယ်၊ သင်္ကန်းညီနောင်ကျေးရွာသူများဖြစ်ကြသည့် ဒေါ်ခင်သိန်းဝင်း (၄၄ နှစ်) (ဘ) ဦးအောင်သူနှင့် ဒေါ်အိအိမိုး (၂၂ နှစ်) (ဘ) ဦးရဲနိုင်တို့ သုံးဦးအပေါ် အရေးယူပေးရန် တိုင်ကြားလာသဖြင့် မြိုင်သာယာနယ်မြေ ရဲစခန်းမှ (ပ) ၂၂၄/၂၀၁၇၊ ရာဇသတ်ကြီး ပုဒ်မ-၄၀၉ ဖြင့် အမှုဖွင့်အရေးယူ ဆောင်ရွက်ထားကြောင်း သတင်းရရှိသည်။
