ကျပ်သန်းပေါင်းသုံးသိန်း တန်ဖိုးရှိ အစိုးရငွေတိုက်လက်မှတ်များကို ဈေးပြိုင်စနစ်ဖြင့် နိုဝင်ဘာ ၂၉ ရက်တွင် လေလံတင်ရောင်းချမည်ဖြစ်ကြောင်း ဗဟိုဘဏ်က နိုဝင်ဘာ ၂၇ ရက်တွင်ထုတ်ပြန်သည့် အစိုးရငွေတိုက် လက်မှတ်များ ဈေးပြိုင်စနစ်ဖြင့် ရောင်းချခြင်းဆိုင်ရာ ကြေညာချက် လေလံအမှတ်စဉ် TB 0065 အရ သိရသည်။
နိုဝင်ဘာ ၂၉ ရက်တွင်လေလံတင်မည့် ငွေတိုက်စာချုပ်များ၏ သက်တမ်းကို ၉၈ ရက်၊ ၁၈၂ ရက်နှင့် ၃၆၄ ရက်သတ်မှတ်ထားပြီး အများနှင့် ယှဉ်ပြိုင်ရမည့် လေလံအဖြစ် ကျပ်သန်းပေါင်းတစ်သိန်းနှင့် အများနှင့် ယှဉ်ပြိုင်ရန် မလိုအပ်သည့် ပမာဏကို ကျပ်သန်းပေါင်းနှစ်သိန်းအဖြစ် သတ်မှတ်ထားကြောင်း သိရသည်။
လက်ရှိအစိုးရလက်ထက်တွင် ငါးနှစ်သက်တမ်းအထိရှိလာမည့် အစိုးရငွေတိုက် လက်မှတ် (Treasury Bill) များကို လက်ရှိ ဘဏ္ဍာနှစ်မှစတင်ပြီး ရောင်းချရန်စီစဉ်နေကြောင်း ၂၀၁၇ ခုနှစ် ကာလလတ်ကြွေးမြီ စီမံခန့်ခွဲမှုမဟာဗျုဟာတွင် ဖော်ပြထားမှုအရ သိရသည်။
မြန်မာနိုင်ငံတော်ဗဟိုဘဏ်အနေဖြင့် ငွေချေးယူခြင်းနှင့် လိုငွေဖြည့်ဆည်းခြင်းများကို လျှော့ချနိုင်ရန်နှင့် ပြည်တွင်းငွေကြေးဈေးကွက် ဖွံ့ဖြိုးတိုးတက်စေရန် ဈေးကွက်ကို အခြေခံသည့် အစိုးရငွေချေးသက်သေခံ လက်မှတ်စနစ်သို့ ပြောင်းလဲသည့် အစီအစဉ်များအဖြစ် ၂၀၁၅ ခုနှစ် ဇန်နဝါရီတွင် အစိုးရ ငွေတိုက်လက်မှတ်များကို ဈေးပြိုင်စနစ်ဖြင့် စတင်ရောင်းချခဲ့ပြီး အစိုးရငွေတိုက်စာချုပ် (Treasury Bonds) များကို ၂၀၁၆ ခုနှစ် စက်တင်ဘာတွင် ဈေးပြိုင်စနစ်ဖြင့် စတင်ရောင်းချခဲ့ကြောင်း သိရသည်။
အစိုးရငွေတိုက်လက်မှတ်များကို လက်ရှိ တွင် သုံးလ၊ ခြောက်လနှင့် တစ်နှစ်သက်တမ်းများဖြင့် ရောင်းချပေးနေခြင်းဖြစ်ပြီး ဈေးပြိုင်စနစ်ဖြင့် ရောင်းချရာတွင် ၂၀၁၅ ခုနှစ် ဇန်နဝါရီ ၂၈ ရက်မှ ၂၀၁၇ ခုနှစ် မတ် ၃၀ ရက် အထိ (၅၁) ကြိမ် လေလံခေါ်ယူခဲ့ပြီး လက်ရှိတွင် (၆၅) ကြိမ်အထိ ရောက်ရှိလာပြီဖြစ်ကြောင်း သိရသည်။
ဘတ်ဂျက်လိုငွေမြင့်တက်မှုနှင့် အစိုးရက ဗဟိုဘဏ်မှ သတ်မှတ်ပမာဏထက် ငွေချေးယူမှုများ ရှိနေချိန်တွင် မြန်မာနိုင်ငံတော်ဗဟိုဘဏ်က အစိုးရငွေတိုက်စာချုပ် ကျပ် သန်းပေါင်း ၄၁၀၀၀၀ နှင့် အစိုးရငွေတိုက် လက်မှတ် ကျပ်သန်းပေါင်း ၅၀၀၀၀၀၊ စုစုပေါင်း ကျပ်သန်းပေါင်း ၉၁၀၀၀၀ ကို နိုဝင်ဘာ ၁၄ ရက်နှင့် ၁၅ ရက်တွင် စံချိန်တင်လေလံတင် ရောင်းချခဲ့ရာတွင် ကျပ်သန်းပေါင်း ၆၈၅၄၉၀ လေလံအောင်မြင်ခဲ့သည်ဟု သိရသည်။ ယခင်အစိုးရလက်ထက် ငါးနှစ်သက်တမ်းအတွင်း လိုငွေ ကျပ်ဘီလျံ ၈၀၂၈ သာ ရှိခဲ့သော်လည်း လက်ရှိအစိုးရလက်ထက်တွင် ကနဦးစာရင်းများအရ လိုငွေမှာ ကျပ် ၁၁၁၁၂ ဘီလျံအထိ ဖြစ်ပေါ်နေပြီး ၂၀၁၇- ၂၀၁၈ ဘဏ္ဍာနှစ်တွင် ဘတ်ဂျက်လိုငွေ ကျပ် ဘီလျံ ၆၄၇၀ အထိ ဖြစ်ပေါ်နေသည်။
