ကျိုက်ထိုမြို့နယ်ရှိ မရမ်းချောင်အမြဲတမ်းစစ်ဆေးရေးဂိတ်တွင် သိမ်းဆည်းရမိသော ပစ္စည်းများကို တွေ့ရစဉ်

မွန်ပြည်နယ် ကျိုက်ထိုမြို့နယ်ရှိ မရမ်းချောင် အမြဲတမ်းစစ်ဆေးရေးဂိတ်တွင် စက်တင်ဘာ ၁၆ ရက် နံနက် ၁ နာရီ ၃၀ မိနစ်ခန့်က သေနတ်အစစ်နှင့် အသွင်သဏ္ဌာန်တူသည့် ပစ္စည်းများ သိမ်းဆည်းရမိခဲ့ကြောင်း သတင်း ရရှိသည်။

ဖြစ်စဉ်မှာ ကျိုက်ထိုမြို့နယ် မရမ်းချောင်ကျေးရွာရှိ မရမ်းချောင်စစ်ဆေးရေးဂိတ်ရှိ ပူးပေါင်းအဖွဲ့မှ သက်သေများနှင့်အတူ မြဝတီမြို့ ရွှေစင်စြင်္ကာဂိတ်မှ စက်တင်ဘာ ၁၅  ရက် ညနေ ၅ နာရီခန့်တွင်ထွက်လာပြီး မရမ်းချောင်း အမြဲတမ်းစစ်ဆေးရေးဂိတ်သို့ ရောက်ရှိလာသည့် ရန်ကုန်တိုင်းဒေသကြီး မင်္ဂလာဒုံမြို့နယ် ဉာဏရပ်ကွက်နေ ယာဉ်မောင်းသန်းထိုက်အောင် (၃၃ နှစ်) (ဘ) ဦးမြအောင်မောင်းနှင်ပြီး ယာဉ်နောက်လိုက်အဖြစ် မွန်ပြည်နယ် ပေါင်မြို့နယ် စွယ်တော်ရပ်ကွက်နေ ဝေယံထွန်း (၂၁ နှစ်) (ဘ) ဦးစိုးမြင့်နှင့် ခရီးသည်  (၂၄) ဦးတင်ဆောင်လာသည့် ZHONG TONG အမျိုးအစား အဖြူ၊ လိမ္မော်ရောင် ရွှေစင်စြင်္ကာ ခရီးသည်တင်မှန်လုံယာဉ်အမှတ် 7K/ - - - - ယာဉ်၏အောက်ဘက် ပစ္စည်းထည့်ရာနေရာအား စစ်ဆေးခဲ့ကြောင်း၊ ထိုသို့ စစ်ဆေးရာတွင် ရန်ကုန်တိုင်းဒေသကြီး အောင်ဆန်းကွင်းကားဂိတ်ကို ဝဏ္ဏ ဖုန်းနံပါတ် အမှတ်အသား ရေးသားထားသည့် အဝါရောင် ကတ်ထူဘူးအတွင်းမှ သေနတ်အစစ်နှင့် အသွင်သဏ္ဌာန်တူသော ပစ္စည်းများအား စစ်ဆေး တွေ့ရှိခဲ့ကြောင်း၊ ၎င်းပစ္စည်းများမှာ (က) Sport 7 0 8 ၊ 2.5 Version တံဆိပ်ပါ အနက်ရောင်ဘူးနှင့် ၎င်းဘူးအတွင်းမှ 15 A/02275၊ WARLINGBEFOREUSING READ SAFETY MANUMANUAL MADE IN THIWAN တံဆိပ်ပါ ဂက်စ်ဖြင့် အသုံးပြုသည့် လက်ကိုင်အနက်ရောင်၊ ကိုယ်ထည်အနက်ရောင်၊ သံထည်ခြောက်လုံးပြူး တစ်လက်၊ ၎င်းကျည် အချင်းတစ်စင်တီမီတာ၊  အရှည် လေးစင်တီမီတာ၊ ကိုယ်ထည် ကြေး အဝါရောင်၊ ထိပ်ဖူး ပလတ်စတစ်အညိုရောင်၊  ကျည်ခြောက်တောင့်၊ ပလတ်စတစ်အနက်ရောင် စပရိန်တပ်ကျည်ဖြည့် ကိရိယာတစ်ခု၊ (ခ) REVOLVE တံဆိပ်ပါ အနက်ရောင်ဘူး နှင့် ၎င်းဘူးအတွင်းမှ 09Q09879 MADE IN USA MARCAS REGISTRA DAS SMITH & WESSON  စသည်တို့နှင့် အလားတူပစ္စည်းများအား ရှာဖွေသိမ်းဆည်း ရမိခဲ့ကြောင်း သိရသည်။

ယင်းသေနတ်အစစ်နှင့် အသွင်သဏ္ဌာန်တူသည့် ပစ္စည်းများ သိမ်းဆည်းရမိသည့်ဖြစ်စဉ်နှင့် ပတ်သက်ပြီး မရမ်းချောင် အမြဲတမ်း စစ်ဆေးရေး စခန်းတာဝန်ခံ အကောက်အခွန်ဦးစီးဌာန ညွှန်ကြားရေးမှူး ဦးဇော်မင်းသိန်းမှ လုံခြုံရေးတာဝန်ခံ ဒုရဲမှူးအောင်ဝင်းစိန်ထံသို့ လွှဲအပ် သိမ်းဆည်းစေခဲ့ကြောင်း၊ ထို ဂက်စ်အသုံးပြုသည့် သံထည်သေနတ်များ အား မြဝတီမြို့ရှိ ရွှေစင်စြင်္ကာဂိတ်မှူး ဘိုဖြိုးက ရန်ကုန် မြို့ရှိ ကိုဝဏ္ဏထံသို့ သယ်ဆောင်ခ  ၃၅၀၀ ကျပ်ဖြင့်ပေးပို့ရန် ယာဉ်ပေါ်သို့ ထည့်ပေးခဲ့သည့် ပစ္စည်းများဖြစ်ကြောင်း၊ ယာဉ်ပေါ် တွင် ခရီးသည်များပါရှိသဖြင့် ယာဉ်မောင်း၊  ယာဉ်နောက်လိုက်နှင့် ယာဉ်တို့အား မရမ်းချောင် အမြဲတမ်းစစ်ဆေးရေးစခန်းမှ ရန်ကုန်မြို့သို့ စက်တင်ဘာ ၁၆  ရက် နံနက် (၃ နာရီ ၄၅ မိနစ်) ခန့်တွင် ပြန်လည်စေလွှတ်ခဲ့ကြောင်း သိရသည်။

၎င်းဖြစ်စဉ်များနှင့်ပတ်သက်၍ မရမ်းချောင် အမြဲတမ်းစစ်ဆေးရေးစခန်းမှ ယာဉ်မောင်းနှင့် ယာဉ်နောက်လိုက်တို့အား စက်တင်ဘာ ၁၆ ရက်မွန်းလွဲ (၁ နာရီ ၃၀ မိနစ်) ခန့်တွင် ချိန်းဆိုထားရှိခဲ့ပြီး ၎င်းတို့၏ ယာဉ်လိုင်စင်၊ ယာဉ်မောင်းလိုင်စင်၊ စပယ်ယာလိုင်စင်တို့အား ခေတ္တထိန်းသိမ်း ထားရှိထားကြောင်း နှင့် သယ်ဆောင်ပစ္စည်းများမှာ သေနတ်အစစ် နှင့် အသွင်သဏ္ဌာန်တူသည့် ပစ္စည်းများဖြစ်၍ တင်သွင်းခွင့်မရှိသောပစ္စည်းများ သယ်ဆောင်လာမှုနှင့် ပတ်သက်၍ ဥပဒေအရ အရေးယူ ဆောင်ရွက်သွားရန် စီစဉ်လျက်ရှိကြောင်း သိရသည်။