၂၀၁၇ ခုနှစ် မတ် ၃၀ ရက်တွင် ဖနွမ်းပင်၌ ဘာသာရေး အခမ်းအနားတစ်ခုတွင် ကမ်ဆိုခကို တွေ့ရစဉ် (Photo: AP)

နိုင်ငံတော်သစ္စာဖောက်မှုဖြင့် တစ်နှစ်ကြာ ဖမ်းဆီးထိန်းသိမ်းခံထားရသော ကမ္ဘောဒီးယား အတိုက်အခံခေါင်းဆောင် ကမ်ဆိုခသည် စက်တင်ဘာ ၁၀ ရက် အစောပိုင်းတွင် အကျဉ်းထောင်မှ လွတ်မြောက်လာပြီဖြစ်ကြောင်း သိရသည်။ ကမ္ဘောဒီးယား၏ အာဏာရှင်ဆန်သော ဝန်ကြီးချုပ် ဟွန်ဆန်သည် ရွေးကောက်ပွဲတွင် အပြတ်အသတ် အနိုင်ရခဲ့ပြီးနောက် အတိုက်အခံများအား ဖမ်းဆီးချုပ်ကိုင်ထားသည်ကို ဖြေလျှော့ပေးနေခြင်းဖြစ်သည်။

နိုင်ငံကို ၃၃ နှစ်ကျော်ကြာ အုပ်ချုပ်နေသော ဟွန်ဆန်သည် ပါးပါးနပ်နပ်ဖြင့် အတိုက်အခံများအား ဖိနှိပ်ခြင်း၊ ဖြေလျှော့ပေးခြင်းတို့ကို ၎င်း၏ ဆန္ဒအတိုင်း ပြုလုပ်နေခဲ့ပြီး ဇူလိုင်လရွေးကောက်ပွဲမတိုင်မီအချိန်အတွင်းကလည်း အတိုက်အခံများအား ပြောင်ကျကျဖိနှိပ်မှု လုပ်ဆောင်ခြင်းဖြင့် ၎င်း၏အာဏာရပါတီကို ရွေးကောက်ပွဲ၌ ပြိုင်ဘက်မပါဘဲ အနိုင်ရစေရန် လုပ်ဆောင်ခဲ့သည်။

ဟွန်ဆန်၏ ဖိနှိပ်မှုတစ်စိတ်တစ်ပိုင်း အနေဖြင့် အတိုက်အခံပါတီဖြစ်သည့် ကမ္ဘောဒီးယား အမျိုးသားလွတ်မြောက်ရေးပါတီ (CNRP) ၏ ခေါင်းဆောင် ကမ်ဆိုခအား နိုင်ငံတော်သစ္စာဖောက်မှုစွဲချက်ဖြင့် ၂၀၁၇ ခုနှစ် စက်တင်ဘာ ၃ ရက်တွင် ဖမ်းဆီးခဲ့သည်။ အသက် ၆၅ နှစ်အရွယ်ရှိပြီဖြစ်သော ကမ်အား ထိုကဲ့သို့ဖမ်းဆီးမှုသည် နိုင်ငံရေးအရ လှုံ့ဆော်မှုဟု ဝေဖန်ခံခဲ့ရပြီး ကမ်အဖမ်းခံရပြီး နှစ်လမျှအကြာတွင် တရားရုံးက CNRP ပါတီအား ဖျက်သိမ်းရန် အမိန့်ချမှတ်ခဲ့သည်။

အဆိုပါ လုပ်ရပ်သည် လက်ရှိအာဏာရ ကမ္ဘောဒီးယားပြည်သူ့ပါတီအား ရွေးကောက်ပွဲတွင် အမတ်နေရာ ၁၂၅ နေရာလုံး အနိုင်ရရှိစေရန် လမ်းဖွင့်ပေးခဲ့သည့်အပြင် ကမ္ဘောဒီးယားနိုင်ငံအား တစ်ပါတီအုပ်ချုပ်သည့် နိုင်ငံအဖြစ် ဦးတည်စေပြီး ဟွန်ဆန်၏ အာဏာချုပ်ကိုင်မှုကိုလည်း ချဲ့ထွင်နိုင်ခဲ့သည်။

အကျဉ်းထောင်ထဲတွင် တစ်နှစ်ကြာ ဖမ်းဆီးခံထားရပြီးနောက် စက်တင်ဘာ ၁၀ ရက်နံနက်တွင် ကမ်ဆိုခသည် ဖနွမ်းပင်ရှိ ၎င်း၏နေအိမ်သို့ ပြန်လည်ရောက်ရှိလာခဲ့ပြီး ကမ်၏အိမ်ရှေ့တွင် ဒါဇင်နှင့်ချီသော ၎င်းအားထောက်ခံသူများနှင့် မီဒီယာများ စုရုံးနေခဲ့ကြသည်။ ကမ်သည် ရုံးတင်စစ်ဆေးမှုအား တိမ်းရှောင်ခြင်းမပြုသော အခြေအနေကိုထောက်ရှု၍ တရားမစီရင်မီ ဖမ်းဆီးထိန်းသိမ်းထားမှုမှ အာမခံဖြင့် လွှတ်ပေးလိုက်ခြင်းဖြစ်ကြောင်း ဖနွမ်းပင်ရှိ တရားရုံးက ထုတ်ပြန်ခဲ့သည်။ သို့သော် နိုင်ငံတော်သစ္စာဖောက်မှုဖြင့် ပြစ်မှုထင်ရှားပါက ကမ်သည် ထောင်ဒဏ်နှစ် ၃၀ အထိ ကျခံရမည်ဖြစ်သည်။

အာမခံဖြင့် လွှတ်ပေးသော်လည်း ကမ်သည် ၎င်း၏နေအိမ်ထဲ၌ပင်နေထိုင်ရန် ကန့်သတ်ခံထားရသောကြောင့် ကမ်၏လှုပ်ရှားမှုများကို တစ်နည်းနည်းဖြင့် ကန့်သတ်ထားဦးမည်ဖြစ်ကြောင်း ကမ်၏သမီးဖြစ်သူ မိုနိုဗစ်ယာကမ်က အေအက်ဖ်ပီသို့ ပြောကြားခဲ့သည်။

ကမ္ဘောဒီးယား ရွေးကောက်ပွဲသည် ပြည်သူများ၏ ဆန္ဒကို ဖော်ပြနိုင်စွမ်းမရှိသည့်အပြင် လွတ်လပ်မှုနှင့် တရားမျှတမှုလည်း မရှိကြောင်း အမေရိကန်အစိုးရက ပြောကြားခဲ့သည်။ ရွေးကောက်ပွဲကျင်းပပြီးနောက် ပိုင်းဟွန်ဆန်သည် ဝေဖန်သူများကို အကျဉ်းထောင်မှ ပြန်လွှတ်ပေးခဲ့ပြီး ဆူပူအုံကြွမှုဖြင့် ထောင်ကျခံနေရသည့် ကမ္ဘောဒီးယား အတိုက်အခံ ထောက်ခံသူ ၁၄ ဦးကိုလည်း ပြီးခဲ့သည့်လက လွှတ်ပေးခဲ့သည်။

Ref: AFP