ဇွန် ၁၂ ရက်က ဥရောပပါလီမန်တွင် အီရန်နျူကလီးယား သဘောတူညီချက်မှ အမေရိကန် နုတ်ထွက်မှု၏ သက်ရောက်မှုနှင့် တုံ့ပြန်မှုကိစ္စရပ်များကို ဆွေးနွေးနေကြစဉ် (Photo - AFP)

၂၀၂၀ ပြည့်နှစ်လွန် ဘတ်ဂျက်တွင် ယူရို ၃၅ ဘီလျံကို ဖယ်ထားပြီးနယ်စပ်လုံခြုံရေး နှင့် ဒုက္ခသည်များအား ထိန်းချုပ်ဟန့်တားရေးအတွက် ရန်ပုံငွေကို သုံးဆတိုးမြှင့်ပေးရန် ဥရောပသမဂ္ဂသည် ဇွန် ၁၂ ရက်က အဆိုပြုခဲ့သည်။

ရွှေ့ပြောင်းအခြေချသူတစ်သန်းကျော် ဝင်ရောက်ခဲ့ပြီးနောက် ကသောင်းကနင်း အခြေအနေများမြင့်တက်ခဲ့ပြီး နိုင်ငံရေးကွဲ လွဲမှုများကြီးထွားခဲ့သည့် ၂၀၁၅ ခုနှစ်က ရရှိခဲ့သည့် သင်ခန်းစာအပေါ်အခြေခံပြီး ဥရောပ ကော်မရှင် (ဥရောပသမဂ္ဂ၏ အမှုဆောင်အ ဖွဲ့) က ယခုကဲ့သို့ အဆိုပြုခဲ့ခြင်း ဖြစ်သည်။

အာဖရိကရွှေ့ပြောင်းအခြေချများကို သယ်ဆောင်ထားသော ကယ်ဆယ်ရေးလှေ တစ်စင်းကို အီတလီနှင့် မော်လ်တာတို့က ပြန်လွှတ်ခဲ့ပြီးနောက် လူဝင်မှုကြီးကြပ်ရေးနှင့် ပတ်သက်၍ တင်းမာမှုများ တဖန်ပြန်လည် မြင့်တက်လာစဉ်ယခု တောင်းဆိုမှုထွက်ပေါ်လာခြင်းလည်း ဖြစ်သည်။

အပိုထပ်ဆောင်းရန်ပုံငွေများကို နယ်စပ်များ၌ အင်အားဖြည့်ရန်နှင့် စီးပွားရေးအရ ရွှေ့ပြောင်းအခြေချသူများအား ရပ်တန့်ရန်၊ နေရပ်သို့ ပြန်ပို့ရန်တို့တွင် အသုံးပြုသွားမည်ဖြစ်သည်ဟု ကော်မရှင်က ဆိုသည်။ သို့သော် ဒုက္ခသည် အစစ်အမှန်များကိုမူ ခွင့်ပြုကာ ပူးပေါင်းဆောင်ရွက်သွားမည်ဟု ကတိပြုခဲ့သည်။

“စိန်ခေါ်မှုဟာ ပိုပြီးကြီးမားတဲ့အတွက် ရင်းမြစ်များများ ပိုလိုအပ်လာပါတယ်။ ဒါကြောင့် အဲဒီကဏ္ဍမှာ ကျွန်တော်တို့ ရန်ပုံငွေကို သုံးဆနီးပါးတိုးမြှင့်ဖို့ အဆိုပြုတာ ဖြစ်ပါတယ်” ဟု ဥရောပလူဝင်မှုကြီးကြပ်ရေး ကော်မရှင်နာဖြစ်သူ ဒီမီထရစ်အက်ဗာရမ်ပိုလို့စ်က ပြောခဲ့သည်။ ၂၀၂၁ -၂၀၂၇ ဘတ်ဂျက်တွင် လူဝင်မှုကြီးကြပ်ရေးနှင့် နယ်စပ်ထိန်းချုပ်ရေးအတွက် ယူရို ၃၄ ဒသမ ၉ ဘီလျံ ဖယ်ထားပေးရန် ဘရပ်ဆဲက တောင်းဆိုခဲ့ခြင်း ဖြစ်သည်။ ယင်းသည် လက်ရှိ ၂၀၁၄-၂၀၂၀ ဘတ်ဂျက်ဖြစ်သော ယူရို ၁၃ ဘီလျံထက် သုံးဆနီးပါး မြင့်တက်သွားခြင်း ဖြစ်သည်။

Brexit  နောက်ပိုင်း ဗြိတိန်၏ ထည့်ဝင်မှုကို ဆုံးရှုံးလိုက်ရခြင်းကို ဖာထေးရန်အတွက် ဆင်းရဲသော ဒေသများဖွံ့ဖြိုးရေးနှင့် စိုက်ပျိုးရေးကဏ္ဍတို့ကို ဝေစုကြီးကြီးပေးပြီး ၂၀၂၀ နောက်ပိုင်းအတွက် ဘတ်ဂျက်ကို ယူ ရို ၁ ဒသမ ၃ ထရီလျံ ထားရှိပေးရန် ပြီးခဲ့သည့်လတွင် ကော်မရှင်က အဆိုပြုခဲ့သည်။

၂၀၁၉ ခုနှစ် မေလတွင် ပြုလုပ်မည့် ဥရောပ ပါလီမန်ရွေးကောက်ပွဲများ (ဗြိတိန်နုတ်ထွက်သွားပြီး နှစ်လအကြာ) မတိုင်မီ ဘတ်ဂျက်သစ်ကို အဖွဲ့ဝင်နိုင်ငံများက အတည်ပြုပေးရန် ကော်မရှင်က လိုလားနေခြင်း ဖြစ်သည်။ နယ်စပ်ထိန်းချုပ်မှုနှင့် ပတ်သက်၍ တောင်းဆိုမှုထဲတွင် ဥရောပနယ်စပ်နှင့် ကမ်းရိုးတန်းစောင့်အင်အားကို လက်ရှိ ၁၅၀၀ မှ အင်အား ၁၀၀၀၀ အထိ မြှင့်တင်ရေးလည်း ပါဝင်သည်။ ရွှေ့ပြောင်းအခြေချမှုအား လျှော့ချခြင်းအပြင် ငွေစက္ကူအတုများ သို့မဟုတ် အန္တရာယ်ရှိ ကုန်ပစ္စည်းများအား အကောက်ခွန်မှ ထိန်းချုပ်မှုကို တိုးမြှင့်သွားမည် ဖြစ်သည်။

Ref ; AFP