မေ ၁၅ ရက်က ကာနာတာကာပြည်နယ်တွင် ဘီဂျေပီပါတီ ထောက်ခံသူများက အောင်ပွဲခံနေကြစဉ် (Photo – AFP)
အိန္ဒိယနိုင်ငံတောင်ပိုင်းရှိ ကာနာတာကာပြည်နယ် ရွေးကောက်ပွဲ၏ အစောပိုင်း ရလဒ်များအရ အာဏာရပါတီ Bharatiya Janata Party (BJP) သည် ကာနာတာကာအား လက်ရှိအုပ်ချုပ်နေသော ကွန်ဂရက်ပါတီကို အသာရနေသည်ဟု သိရသည်။
ကာနာတာကာပြည်နယ်တွင် အမတ်နေရာ ၂၂၄ နေရာရှိသည့်အနက် ဘီဂျေပီသည် ၁၀၈ နေရာကိုရရှိကာ ဦးဆောင်နေသည်ဟု သိရသည်။ ကာနာတာကာရွေးကောက်ပွဲသည် ၂၀၁၉ ခုနှစ်တွင် ပြုလုပ်မည့် အိန္ဒိယအထွေထွေရွေးကောက်ပွဲ၏ အခြေအနေအား ကြိုတင်ခန့်မှန်းနိုင်သည့် ပွဲအဖြစ်လည်း ယူဆခြင်းခံထားရသည်။
ကာနာတာကာ ရွေးကောက်ပွဲ၌ ရှုံးနိမ့်မှုသည် ကွန်ဂရက်ပါတီအတွက် ကပ်ဆိုက်မှုတစ်ခု ဖြစ်သွားလိမ့်မည်ဟု လေ့လာသူများက ယူဆနေကြသည်။ လက်ရှိတွင် ကွန်ဂရက်ပါတီ အုပ်ချုပ်နေသည်မှာ ကာနာတာကာအပြင် နောက်ထပ်ပြည်နယ်သုံးခုသာ ရှိတော့သည်။ ထိုစဉ် အာဏာရပါတီ ဘီဂျေပီနှင့် ၎င်း၏ မဟာမိတ်များသည် အိန္ဒိယ၏ ပြည်နယ် ၂၉ ခုအနက် ၂၂ ခုကို ထိန်းချုပ်ထားနိုင်ပြီ ဖြစ်သည်။
ကာနာတာကာတွင် အစိုးရဖွဲ့နိုင်ရန် အမတ်နေရာ ၁၁၃ နေရာ လိုအပ်မည် ဖြစ်သည်။ အစောပိုင်းရလဒ်များအရ ကွန်ဂရက်ပါတီက လက်ရှိအချိန်အထိ အမတ်နေရာ ၇၃ နေရာကို ရရှိထားပြီး ဒေသတွင်းမှ ဘာသာရေးလွှမ်းမိုးမှုမရှိသော Janata Dal က ၃၈ နေရာရရှိထားသည်။
သို့သော် Janata Dal သည် ကွန်ဂရက်ပါတီနှင့် ပူးပေါင်းလိမ့်မည်ဟု သတင်းများ ထွက်ပေါ်နေပြီး ထိုသို့ပူးပေါင်းဖြစ်ပါက ကွန်ဂရက်သည် Janata Dal ၏ ခေါင်းဆောင်ကို ပြည်နယ်ဝန်ကြီးချုပ်ပေးမည်ဟု သိရသည်။
မဲရေတွက်မှုများကို မေ ၁၅ ရက် အစောပိုင်းကတည်းက စတင်နေခြင်းဖြစ်ပြီး ထိုနေ့ နှောင်းပိုင်းတွင် အပြီးသတ်အဖြေထွက်လာလိမ့်မည်ဟု မျှော်မှန်းရသည်။
လူဦးရေ ၆၄ သန်းနေထိုင်သော ကာနာတာကာသည် အိန္ဒိယ၏ သတင်းအချက်အလက် နည်းပညာလုပ်ငန်း၏ ဗဟိုချက်တစ်ခုဟု ဆိုနိုင်သည်။
၂၀၁၈ ခုနှစ် အထွေထွေရွေးကောက်ပွဲအတွက် ရည်စူးပြီး ဘီဂျေပီပါတီခေါင်းဆောင် ဝန်ကြီးချုပ် နရင်ဒရာမိုဒီရော ကွန်ဂရက်ပါတီခေါင်းဆောင် ရာဟူးဂန္ဒီကပါ ကာ နာတာကာ ပြည်နယ်အနှံ့သို့ သွားရောက်မဲဆွယ်ခဲ့ပြီး လူထုစုဝေးပွဲကြီးများတွင်း မိန့်ခွန်းပြောခဲ့ကြသည်။
ကွန်ဂရက်ပါတီ၏ ကိုယ်စားလှယ်လောင်းမှာ ကာနာတာကာ ပြည်နယ်ဝန်ကြီးချုပ် ဆစ်ဒါရာမိုင်ရာ ဖြစ်သည်။ ၎င်းသည် အမတ်နေရာပေါင်း ၁၂၁ နေရာကို အနိုင်ရခဲ့သည့် ၂၀၁၃ ခုနှစ်က ရွေးကောက်ပွဲတွင် ပါတီကို ဦးဆောင်ခဲ့သူလည်း ဖြစ်သည်။
Ref; Reuters
