ဘော်နီယိုကျွန်းပေါ်တွင် မီးလောင်ကျွမ်းပြီးနောက် ကျန်နေခဲ့သည့် သစ်ဆွေးမြေတစ်ခုကို ကြည့်ရှုစစ်ဆေးနေသည့် အင်ဒိုနီးရှားသမ္မတ ဂျိုကိုဝီဒိုဒိုအား ၂၀၁၅ ခုနှစ် စက်တင်ဘာ ၂၃ ရက်က တွေ့ရစဉ် (Photo: AFP)
ဆီအုန်းနှင့်ပတ်သက်ပြီး ပြင်းထန်သည့် ဝေဖန်မှုများကို အသံတိတ်စေရန်နှင့် သဘာဝပတ်ဝန်းကျင်ဆိုင်ရာစံနှုန်းများ တင်းကျပ်မှုကို ဥရောပသမဂ္ဂက လက်လျှော့ရန် ဆီအုန်းလုပ်ငန်းကို အကြီးအကျယ်လုပ်ကိုင်သော အင်ဒိုနီးရှားက ကြိုးပမ်းနေကြောင်း အေအက်ဖ်ပီက ရရှိခဲ့သည့် အထောက်အထားများက ဖော်ပြခဲ့သည်။ ထုတ်ဝေရန်အတွက် မဟုတ်ဟု အမှတ်အသားပြုထားသော ယင်းစာရွက်စာတမ်းများက ဆီအုန်းလုပ်ငန်းအတွက် ဂျကာတာ၏ဆန္ဒကို ထင်ဟပ်ပြသနေသည်။
အင်ဒိုနီးရှားသည် တစ်နှစ်လျှင် ဒေါ်လာ ၃၅ ဘီလျံခန့် အပြန်အလှန်ကုန်သွယ်မှုရှိနေသော ဥရောပသမဂ္ဂနှင့် ကုန်သွယ်ရေး သဘောတူညီချက် ချုပ်ဆိုရန် ကြိုးပမ်းနေသည်။
ကမ္ဘာတွင် ဆီအုန်းအများဆုံးထုတ်လုပ်သည့် နိုင်ငံဖြစ်သော အင်ဒိုနီးရှားသည် ဆီအုန်း စိုက်ခင်းများအတွက် ဧရာမမိုးသစ်တောများကို ဆုံးရှုံးနေသည်။ မိုးသစ်တောများကို မီးရှို့ရှင်းလင်းမှုက ရှားပါးမျိုးစိတ်များ ပျောက်ဆုံးမှုကို ခြိမ်းခြောက်နေသည့်အပြင် ဒေသတွင်းအတွက် သစ်တောမီးရှို့ရာမှ ထွက်ပေါ်လာသည့် မီးခိုးမြူပြဿနာကိုလည်း ပို၍ဆိုးရွားစေသည်။
ဥရောပသမဂ္ဂနှင့် အင်ဒိုနီးရှားတို့သည် လွတ်လပ်စွာကုန်သွယ်ရေး သဘောတူညီချက်ချုပ်ဆိုရန်အတွက် စတုတ္ထအကြိမ်မြောက်ဆွေးနွေးမှုကို ဖေဖော်ဝါရီ ၁၂ ရက် က စတင်ခဲ့ပြီး ကုန်သွယ်မှု၊ ရင်းနှီးမြှုပ်နှံမှုနှင့် ဉာဏပစ္စည်းဆိုင်ရာစည်းမျဉ်းများကို ဆွေးနွေးနေသည်။
ဂျကာတာက သဘာဝပတ်ဝန်းကျင် ထိန်းသိမ်းရေးနှင့်ပတ်သက်ပြီး ကိုယ်တိုင်ရေးဆွဲထားသည့် စံနှုန်းများကို အသုံးပြုလိုပြီး ယမန်နှစ်ဧပြီက အကြံပြုခဲ့သော ဥရောပစံနှုန်းကို အသုံးမပြုလိုကြောင်း ဆွေးနွေးပွဲ အထောက်အထားများက ဖော်ပြခဲ့သည်။
သို့သော်အင်ဒိုနီးရှား၏ ဆီအုန်းလုပ်ငန်းများအနက် အနည်းစုကသာလျှင် ဂျကာတာ၏ လျော့ရဲသော စံနှုန်းများကို လိုက်နာနေသည်။
၂၀၂၁ ခုနှစ်မှစပြီး ကုန်ပစ္စည်းများထုတ်လုပ်မှု၌ ဆီအုန်းသုံးစွဲမှုကို တားမြစ်ရန် ဥရောပပါလီမန်၏ဆောင်ရွက်ချက်အား အင်ဒိုနီးရှားနှင့် အိမ်နီးချင်းမလေးရှားတို့က ရှုတ်ချထားသည်။ မလေးရှားသည်လည်း ဆီအုန်းအဓိက ထုတ်လုပ်သည့် နိုင်ငံတစ်နိုင်ငံဖြစ်သည်။
ဆီအုန်းစိုက်ပျိုးပြီး အသက်မွေးနေသော အသေးစားလယ်သမားများအခြေစိုက်သော ကျေးလက်အသိုက်အမြုံကို ဥရောပသမဂ္ဂ၏တားမြစ်ချက်က ပျက်စီးစေမည်ဟု မလေးရှားနှင့် အင်ဒိုနီးရှားတို့က ပြောကြားကြသည်။
ယခုပေါက်ကြားခဲ့သော အထောက်အထားများနှင့်ပတ်သက်ပြီး အင်ဒိုနီးရှား၏ ကုန်သွယ်ရေးဝန်ကြီးဌာနက မှတ်ချက်ပေးရန် ငြင်းဆိုခဲ့သည်။
