ဖေဖော်ဝါရီ ၆ ရက်က ဟူပေပြည်နယ်ရှိ ဟွန်ဒါ ကားထုတ်လုပ်ရေးစက်ရုံ အတွင်းပိုင်းအား တွေ့ရစဉ် (Photo: AFP)

တရုတ်စီးပွားရေးသည် ယခုနှစ်တွင် သိသိသာသာ တိုးတက်ခဲ့သော်လည်း ၂၀၁၈ ခုနှစ်တွင် အနည်းငယ်နှေးကွေးမည်ဟု တရုတ်နိုင်ငံတော် ပညာရှင်အဖွဲ့ လူမှုသိပ္ပံအကယ်ဒမီ  (CASS) က ဒီဇင်ဘာ ၂၀ ရက်တွင် ခန့်မှန်းချက် ထုတ်ပြန်ခဲ့သည်။

တရုတ်၏ စီးပွားရေးတိုးတက်မှုကို ပြန်လည်ချိန်ညှိရန် ခေါင်းဆောင်များက ကြိုးပမ်းနေချိန်တွင် ကမ္ဘာ့ဒုတိယအကြီးဆုံး တရုတ်စီးပွားရေးသည် လာမည့်နှစ်တွင် ၆ ဒသမ ၇ ရာခိုင်နှုန်းသာ တိုးတက်မည်ဟု CASS က  ခန့်မှန်းခဲ့သည်။

၂၀၁၇ ခုနှစ်တွင် တရုတ်စီးပွားရေးသည် ၆ ဒသမ ၈ ရာခိုင်နှုန်း တိုးတက်မည်ဟု နှစ်ပတ်လည် အစီရင်ခံစာ၌  CASS က ခန့်မှန်းခဲ့သည်။ တရုတ်ခေါင်းဆောင်များသည် ပေကျင်း၌ အဓိက စီးပွားရေး ကွန်ဖရင့်တစ်ခုကို ကျင်းပနေချိန်၌ ယခုခန့်မှန်းချက် ထွက်ပေါ်ခဲ့ခြင်းဖြစ်သည်။

Central Economic Work Conference တံခါးပိတ်အစည်းအဝေး၌ လာမည့်နှစ်အတွက် စီးပွားရေး လမ်းညွှန်မြေပုံကို ချမှတ်မည်ဖြစ်ပြီး အရည်အသွေးမြင့်မားသည့် တိုးတက်မှုဖြစ်ရေး သမ္မတရှီကျင်ပင်း၏ လမ်း ညွှန်ချက်ကို အကောင်အထည်ဖော်ရန် ယင်းကွန်ဖရင့်က မူဝါဒများ ဖော်ထုတ်မည်ဖြစ်သည်။

တရုတ်စီးပွားရေး ယခုနှစ်တွင် ၆ ဒသ မ ၈ ရာခိုင်နှုန်း တိုးတက်မည်ဟု CASS ၏ ခန့်မှန်းချက်သည် တရုတ်အစိုးရက ရည်မှန်းထားသည့် တရားဝင်ခန့်မှန်းချက် ၆ ဒသမ ၅ ရာခိုင်နှုန်းထက် ကျော်လွန်ခဲ့ပြီး ၂၀၁၆ ခု နှစ်က တိုးတက်ခဲ့သည့် ၆ ဒသမ ၇ ရာခိုင်နှုန်းထက်လည်း သာလွန်ခဲ့သည်။

တရုတ် စီးပွားရေးတိုးတက်မှုတွင် အစိုးရ ရင်းနှီးမြှုပ်နှံမှုများနှင့် ပို့ကုန်များက အဓိကကျခဲ့ပြီး လာမည့်နှစ်တွင် နိုင်ငံတော်က ရင်းနှီးမြှုပ်နှံမှုသည် ၆ ဒသမ ၃ ရာခိုင်နှုန်းသို့ ကျဆင်းသွားမည်ဟု CASS က ခန့်မှန်းခဲ့သည်။

လေထုညစ်ညမ်းမှုဆိုးရွားခြင်းနှင့် ဘဏ္ဍာရေးစွန့်စားမှုတို့ မြင့်မားခြင်းကို တရုတ်က ကိုင်တွယ်ဖြေရှင်းနေသောကြောင့် စီးပွားရေးတိုးတက်မှု နှေးကွေးသွားခြင်းကို လက်ခံသည်ဟု သမ္မတရှီကျင်ပင်းက ပြောကြားထားသည်။