ရန်ကုန်မြို့ရှိ စက်မှုကုန်ထုတ်စက်ရုံတစ်ရုံကို တွေ့ရစဉ် (ဓာတ်ပုံ-ပြည့်ဖြိုးအောင်)

မြန်မာ့စက်မှုကုန်ထုတ်လုပ်ငန်းများ အရှိန်ပြင်းစွာဆုတ်ယုတ်နေပြီး ဒေါ်လာဈေး ထိုးတက်မှုကြောင့် ထုတ်လုပ်မှုနှင့် အော်ဒါသစ်ရရှိမှုနှုန်း အကျမြန်လာကာ စီးပွားရေး ရပ်ဝန်းတစ်ခုလုံးသို့ ငွေကြေးဖောင်းပွမှု၏ ဖိအားပေးမှုများ ပြင်းထန်လာကြောင်း ၂၀၁၈ ခုနှစ် သြဂုတ်လအတွက် ထုတ်ပြန်သော နစ်ကေးမြန်မာ့စက်မှုကုန်ထုတ်လုပ်ငန်း PMI  အညွှန်းကိန်း (Manufacturing Purchasing Manager’s Index -ဝယ်ယူရေးမန် နေဂျာများ၏အညွှန်းကိန်း) အရ သိရသည်။

သြဂုတ်လစစ်တမ်းဒေတာက မြန်မာနိုင်ငံ၏ ထုတ်လုပ်ရေးကဏ္ဍတစ်ခုလုံး အခြေအနေများ အရှိန်ပြင်းစွာဖြင့် ဆုတ်ယုတ်လာကြောင်း အချက်ပြနေပြီး အဓိကအကျဆုံး အညွှန်းကိန်းကို ထုတ်လုပ်မှုနှင့် လုပ်ငန်းသစ်များ လျင်မြန်စွာကျဆင်းလာမှုက တွန်းချပစ်ခဲ့သည်။ အကျိုးဆက်အဖြစ် အလုပ်အကိုင်ခန့်ထားမှုများနှင့် လက်ကျန်အလုပ်များ ရှေ့ဆက်ကျဆင်းသွားပြီး ဝယ်ယူမှုများလည်း သိသာစွာလျော့ကျခဲ့သည်။ ထည့်သွင်းကုန်ဈေးနှုန်းများနှင့် ရောင်းဈေးများ နှစ်ရပ်စလုံးသည် စစ်တမ်းအတွင်း အမြင့်ဆုံးသို့ မြင့်တက်သွားကြပြီး အဓိကတွန်းအားမှာ ကုန်ကြမ်းပစ္စည်းများရှားပါးမှုနှင့် သွင်းကုန်ဈေးနှုန်း မြင့်မားမှုတို့ဖြစ်သည်။

သြဂုတ်လအတွက် နစ်ကေးမြန်မာ့စက်မှုကုန်ထုတ်လုပ်ငန်း PMI အညွှန်းကိန်းမှာ ၄၆ ဒသမ ၄ သို့ကျဆင်းသွားပြီး ဇူလိုင်လရှိ ၄၇ ဒသမ ၉ ထက်ကျဆင်းခဲ့သည်။ သြဂုတ်လအညွှန်းကိန်းသည် ၂၀၁၅ ခုနှစ် ဒီဇင်ဘာတွင်စတင်ခဲ့သည့် စစ်တမ်းသက်တမ်းတစ်လျှောက် ကုန်စည်ထုတ်လုပ်ရေးကဏ္ဍတွင် အကြီးမားဆုံးကျဆင်းမှုကို အချက်ပြလိုက်ပြီး ပြင်းထန်သည့်ဆုတ်ယုတ်မှုက ကုန်ထုတ်လုပ်မှုစွမ်းဆောင်နိုင်စွမ်း နှစ်လ ဆက်တိုက်ကျဆင်းလာခြင်းကိုပါ ထောက်ပြနေသည်။ ထုတ်လုပ်မှုကျဆင်းမှုနှုန်းမှာ စစ်တမ်းသမိုင်းအတွင်း အပြင်းထန်ဆုံးဖြစ်လာခဲ့ပြီး ထိုသို့ပြင်းထန်စွာကျဆင်းလာခဲ့ခြင်းမှာ ဝယ်သူများဖက်မှ ဝယ်လိုအားလျော့နည်းလာပြီး ကုန်ကြမ်းပစ္စည်းများရှာဖွေမှု ခက်ခဲလာခြင်းကြောင့်ဟု စစ်တမ်းတွင် ပါဝင်ဖြေဆိုသူအများစုက ဆိုသည်။

ယခုလပိုင်းများအတွင်း ကုန်ကြမ်းပစ္စည်းရှားပါးလာမှုနှင့် ထည့်သွင်းကုန်များ စရိတ်စကမြင့်မားလာခြင်းတို့ကို တုံ့ပြန်သည့်အနေနှင့် ငွေကြေးဖောင်းပွမှုဖိအားပေးမှုများ ပိုပြင်းထန်လာခဲ့ပြီးထည့်သွင်း ကုန်ဈေးနှုန်းနှင့် ရောင်းဈေးနှစ်ခုစလုံးတို့၏ ငွေကြေးဖောင်းပွမှုမှာ စစ်တမ်း၏အမြင့်ဆုံး နေရာများကို တက်လှမ်းရယူထားကာ စစ်တမ်းတွင် ပါဝင်ဖြေကြးသူအများစုက မြင့်တက်လာသည့်စရိတ်များကို ဝယ်သူများထံသို့ လွှဲချပေးခဲ့မှုကြောင့် ဈေးနှုန်းများမြင့် တက်လာခဲ့သည်ဟု ညွှန်ပြကြသည်။

ထုတ်လုပ်ရေးလျော့ကျလာသည်နှင့်အမျှ အလုပ်လျှော့ချမှုနှုန်းများ အရှိန်မြင့်လာခြင်းနှင့်အတူ အလုပ်နေရာများနှင့် လက်ကျန်အလုပ်များလည်း ဆက်လက်ကျဆင်းလာခဲ့ပြီး လက်ကျန်အလုပ်များ လျော့ကျလာမှုနှုန်းမှာ ၂၀၁၆ ခုနှစ် ဇူလိုင်လနောက်ပိုင်း အဆိုးရွားဆုံးဖြစ်ခဲ့သည်။ ထို့ပြင် ထုတ်လုပ်ရေးကုမ္ပဏီများကပါ ပစ္စည်းများပေးသွင်းရာတွင် ကြာမြင့်လာကြောင်း ထုတ်ဖော်ခဲ့ကြသည်။ ပစ္စည်းပေးသွင်းရာတွင် အခက်အခဲများရှိလာခြင်းနှင့် ပို့ဆောင်ရေးဆိုင်ရာ ကြန့်ကြာမှုများရှိလာ၍ ပစ္စည်းပေးသွင်းသူတို့၏ လုပ်ငန်းအခြေအနေမှာ ၂၀၁၆ ခုနှစ် ဇွန်လနောက်ပိုင်း အကြီးကျယ်ဆုံး ဆုတ်ယုတ်လာခဲ့သည်။

ဝယ်သူများဘက်မှ ဝယ်လိုအားလျော့ကျလာပြီး ကုန်ကြမ်းပစ္စည်းများ၏ ရင်းမြစ်နည်းပါးလာခြင်းတို့က ထည့်သွင်းကုန်များ ဝယ်ယူမှုကို ထိပါးစေခဲ့ခြင်းဖြင့် ဝယ်ယူနိုင်ခဲ့သည့် ပမာဏများမှာ သိသိသာသာ ကျဆင်းလာသည်။ ထုတ်လုပ်မှုအကြိုလက်ကျန်စာရင်းများသည်လည်း ရှေ့ဆက်လျော့နည်းလာခဲ့ရာ ၂၀၁၆ ခုနှစ် စက်တင်ဘာနောက်ပိုင်း အမြန်ဆုံးကျဆင်းမှု ဖြစ်ခဲ့သည်။

အဆိုပါစစ်တမ်းကို ပြုစုပေးသည့် IHS Markit မှ စီးပွားရေးပညာရှင် Sian Jones က “မြန်မာနိုင်ငံတွင်း ထုတ်လုပ်ရေးကဏ္ဍအခြေအနေက သြဂုတ်လထဲမှာ စစ်တမ်းသမိုင်းတစ်လျှောက် အကြီးကျယ်ဆုံး ဆုတ်ယုတ်သွားခဲ့ပြီး လုပ်ငန်းတွေရဲ့ စွမ်းဆောင်မှုတစ်ရပ်လုံးမှာ ထုတ်လုပ်မှုနဲ့ အော်ဒါသစ်တွေ ဆိုးဆိုးရွားရွားကျဆင်းမှုကြောင့် အထိနာခဲ့ပါတယ်။ ပြီးခဲ့တဲ့လပိုင်းအတွင်း ကျပ်ငွေတန်ဖိုး ထိုးကျတာက သွင်းကုန်ဈေးနှုန်းတွေကို သိသိသာသာ မြင့်တက်စေတာကြောင့် ထုတ်လုပ်မှုကုန်ကျစရိတ်တွေကို မြင့်တက်စေခဲ့ပြီး အမြတ်အစွန်းပမာဏအပေါ် တွန်းအားပေးမှု ဖြစ်ခဲ့ပါတယ်” ဟု ပြောကြားသည်။

ယခုထုတ်ပြန်ထားသော စစ်တမ်းကို IHS Markit က စက်မှုကုန်ထုတ်လုပ်ငန်းများထံမှ ကောက်ယူစုစည်းရရှိသည့် စစ်တမ်းမူလကိန်းဂဏန်းများကို အခြေခံပြုစုထားခြင်းဖြစ်ပြီး ဂျပန်အခြေစိုက် Nikkei မီဒီယာအုပ်စုက ပံ့ပိုးထားခြင်း ဖြစ်သည်။