နိုင်ငံတော်၏ အတိုင်ပင်ခံပုဂ္ဂိုလ်နှင့် စီးပွားရေး လုပ်ငန်းရှင်များ တွေ့ဆုံပွဲတွင် ဒေါ်အောင်ဆန်းစုကြည် အဖွင့်စကား ပြောကြားနေမှုကို တွေ့ရစဉ်

ဝင်ငွေရလမ်း မပြနိုင်သည့်သူများ ပေးဆောင်ရသည့် စည်းကြပ်မှုမှ လွတ်ကင်းနေသော အခွန် ၃၀ ရာခိုင်နှုန်း ကောက်ခံမှု ကင်းလွတ်ခွင့်ပေးရန်၊ အခွန်နှုန်းကို ငါးရာခိုင်နှုန်း သို့ တစ်နှစ်၊ နှစ်နှစ် ကင်းလွတ်ခွင့် ပေးရန်နှင့် အလုပ်လျှော့ချမှုများ ရှိလာနေကြောင်း စီးပွားရေး လုပ်ငန်းရှင်ဖြစ်သူ စေပိုင်ကုမ္ပဏီဥက္ကဋ္ဌ ဦးမောင်ဝိတ်က တင်ပြခဲ့ပြီး အလုပ်လက်မဲ့နှုန်း တက်မလာကြောင်းနှင့် အခွန်လွတ်ငြိမ်းခွင့် (Tax Amnesty) ပေးခြင်းမှာ နိုင်ငံ့စီးပွားရေး တိုးတက်မှုအတွက် အကျိုးမဖြစ်ကြောင်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က တုံ့ပြန်ပြောကြားသည်။

ဆောက်လုပ်ရေး လုပ်ငန်းများ ပြိုလဲနေမှုနှင့် ပတ်သက်ပြီး ဦးမောင်ဝိတ်က နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အား သြဂုတ် ၂၇ ရက်က နေပြည်တော်တွင် ကျင်းပသည့် နိုင်ငံတော်၏ အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်နှင့် လုပ်ငန်းရှင်များ တွေ့ဆုံပွဲတွင် တင်ပြခဲ့ခြင်းဖြစ်ပြီး ဒေါ်အောင်ဆန်းစုကြည်က ထိုသို့ တုံ့ပြန်ခဲ့ခြင်း ဖြစ်သည်။

“လက်ရှိ အခြေအနေမှာ စီးပွားရေး လုပ်ငန်းတွေဟာ အရောင်းအဝယ်နှေးကွေးမှုကို ပြင်းပြင်းထန်ထန် ရင်ဆိုင်နေရပါတယ်။ အကျိုးဆက်အနေနဲ့ လုပ်ငန်း တော်တော်များများမှာ လုပ်ငန်းတွေ လျှော့ချလိုက်ရတဲ့ အခြေအနေ ရောက်နေပါတယ်။ ဒီအတွက် ကျွန်တော်တို့က လုပ်ငန်းတွေရော လုပ်သားတွေပါ လျှော့ချရတဲ့ အခြေအနေ ရှိနေပါတယ်။ ဒီလိုလျှော့ချလိုက်တဲ့အခါမှာ လုပ်ငန်း ရပ်ဆိုင်းခံရတဲ့ ဝန်ထမ်းတွေနဲ့ အခြေခံလုပ်သားတွေဟာ ဝင်ငွေရပ်ဆိုင်း ခံရတာနဲ့ အတူတူ ဖြစ်သွားပါတယ်။ ကျွန်တော်တို့ ယနေ့ကြုံတွေ့နေရတဲ့ ကုန်ဈေးနှုန်းကို ဖြေရှင်းရာမှာလည်း ဝင်ငွေဟာ အဓိက ဖြစ်နေပါတယ်။ ကျွန်တော်တို့ရဲ့ အရောင်းအဝယ်နှေးကွေးခြင်းကို တင်ပြခြင်း ဖြစ်ပါတယ်။ လုပ်ငန်း ဘာကြောင့်နှေးကွေးလည်း ပြန်ကြည့်တဲ့အခါမှာ အဓိက အကြောင်းရင်းကတော့ ရင်းနှီးမြှုပ်နှံသူတွေရဲ့ စောင့်ကြည့်ပါဦးမယ် ဆိုတဲ့ ယူဆချက်တစ်ခုကြောင့် ဖြစ်ပါတယ်။ ရင်းနှီးမြှုပ်နှံသူတွေ ဘာကို စောင့်ကြည့်နေသလဲဆိုရင် သူတို့မြှုပ်နံှမှုတွေ ဆုံးရှုံးနိုင်ခြေ နည်းတယ်။ အမြတ်ရနိုင်ခြေ များတယ်ဆိုတဲ့ အခြေအနေကို စောင့်ကြည့်နေခြင်း ဖြစ်ပါတယ်။ ဒီအချက် သေချာတယ်ဆိုရင် ကျွန်တော်တို့ ဈေးကွက်ထဲ ဝင်လာမှာဖြစ်ပြီး ဒီအချက် မသေချာရင် ကျွန်တော်တို့ ဈေးကွက်ထဲက ပြန်ထွက်သွားမှာပဲ ဖြစ်ပါတယ်။ ကျွန်တော်တို့ စီးပွားရေးလုပ်ငန်းများ ပြန်လည် လန်းဆန်းလာဖို့ဟာ ရင်းနှီးမြှုပ်နှံသူတွေ အလုံးအရင်းနဲ့ ကျွန်တော်တို့ ဈေးကွက်ထဲ ဝင်ရောက်လာဖို့ပဲ ဖြစ်ပါတယ် အမေခင်ဗျ။ အဲဒီလို ဝင်ရောက်လာဖို့ အချက်များစွာ လေ့လာတွေ့ရှိတဲ့ အထဲက အချက်နှစ်ခုကို ရှာဖွေ ဆောင်ရွက်ပေးဖို့ တင်ပြအပ်ပါတယ်။ ပထမဆုံးအနေနဲ့ ဘဏ်ချေးငွေ အတိုးနှုန်း ဖြစ်ပါတယ်။ ဘဏ်ချေးငွေဟာ ၁၃ ကျပ်ဖြစ်နေတဲ့အတွက် လုပ်ငန်းတွေဟာ တွက်ချေမကိုက်တဲ့ အခြေအနေ ဖြစ်နေပါတယ်။ ဒီဟာကို ကိုးရာခိုင်နှုန်း သို့မဟုတ် ရှစ်ရာခိုင်နှုန်း။ ယာယီအားဖြင့် တစ်နှစ် သို့မဟုတ် နှစ်နှစ် လျှော့ချပေးဖို့ လိုအပ်နေတယ်လို့ တင်ပြလိုပါတယ်။ ဒုတိယအချက် အနေနဲ့ အခွန်နှုန်းထားများ ဖြစ်ပါတယ်။ လုပ်ငန်းတစ်ခု စတင်ပြီ ဆိုလို့ရှိရင် အခြေပစ္စည်း ဝယ်ယူရပါတယ်။ ဝယ်ယူပြီဆိုတာနဲ့ အခွန် ၃၀ ရာခိုင်နှုန်း ဆောင်နေရပါတယ်။ လုပ်ငန်း မစသေးဘူး ၃၀ ရာခိုင်နှုန်း ဆောင်နေရတာဖြစ်တဲ့အတွက် ဒီအခွန်ကို ငါးရာခိုင်နှုန်းကို တစ်နှစ် သို့မဟုတ် နှစ်နှစ် လျှော့ချပေးဖို့ တင်ပြပါတယ်။ နောက်ထပ် တစ်ခုကတော့ အခြေခံပစ္စည်းတွေ ဝယ်ရင် ဘဏ်ချေးငွေနဲ့ကို ၃၀ ရာခိုင်နှုန်း ပေးနေရတာ ဖြစ်ပါတယ်။ ချေးငွေနဲ့ ဝယ်တဲ့သူတွေက ၃၀ ရာခိုင်နှုန်း ပေးနေရတာဖြစ်လို့ ဒီ ၃၀ ရာခိုင်နှုန်းကိုလည်း ကင်းလွတ်ခွင့်ပေးဖို့ကိုလည်း တင်ပြလိုပါတယ်” ဟု ဦးမောင်ဝိတ်က ပြောကြားသည်။

ထို့ပြင် မြန်မာနိုင်ငံသားများ ရင်းနှီးမြှုပ်နှံမှု စတင်ပါက ကနဦးမြှုပ်နှံငွေ (Paid-up Capital) ကို အခွန်ဆောင်ပြီးကြောင်း တင်ပြနေရပြီး နိုင်ငံခြားသားများမှာ တင်ပြရန် မလိုအပ်ကြောင်းနှင့် နိုင်ငံခြားသားများနည်းတူ Paid-up Capital ကို အခွန်ဆောင်ပြီး ဖြစ်ကြောင်း ပြစရာမလိုကြောင်း ပြဋ္ဌာန်းပေးစေလိုသည်ဟု ဦးမောင်ဝိတ်က အခွန်ကင်းလွတ်ခွင့်များကို အသားပေး တင်ပြခဲ့ပြီး ထိုသို့ အခွန်ကင်းလွတ်ခွင့်များ ပေးပါက ရင်းနှီးမြှုပ်နှံသူများ အများအပြား ဝင်ရောက်လာမည်ဟု ဦးမောင်ဝိတ်က ဆက်လက် ပြောကြားသည်။

မြန်မာနိုင်ငံတွင် အခွန်ကောက်ခံမှုများနှင့် ပတ်သက်ပြီး ရာခိုင်နှုန်း ၃၀ ပေးဆောင်ရခြင်းမှာ ဝင်ငွေရလမ်း မပြနိုင်သည့် ငွေများကိုသာ စည်းကြပ်မှုမှ လွတ်ကင်းနေသော ငွေများကိုသာ အခွန် ၃၀ ရာခိုင်နှုန်း ကောက်ခံနေခြင်းဖြစ်ပြီး ဝင်ငွေရလမ်း ပြနိုင်သည့် အခွန်ဆောင်ထားသည့် ငွေများဖြစ်ပါက အခွန်ရာခိုင်နှုန်း ၃၀ ပေးဆောင်ရမည် မဟုတ်ကြောင်း ပြည်ထောင်စု၏ အခွန်အကောက်ဥပဒေ နှစ်စဉ်ထုတ်ပြန်ချက်များတွင် ဖော်ပြထားသည်။

ဦးမောင်ဝိတ်က တင်ပြ တောင်းဆိုသည့် အခွန်ကင်းလွတ်ခွင့်များနှင့် လုပ်သားလျှော့ချရမှုများနှင့် ပတ်သက်ပြီး နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က “ ကျွန်မတို့ စီးပွားရေး အခြေအနေကို ကြည့်လို့ရှိရင် အဘက်ဘက်က ကြည့်ရပါတယ်။ တစ်ဖက်တည်းက ကြည့်လို့ မရပါဘူး။ ဥပမာဆိုရင် တချို့အလုပ်တွေမှာ အလုပ်တွေ မဖြစ်တာတွေကြောင့် အလုပ်သမားတွေကို အလုပ်ကနေ ရပ်ဆိုင်းလိုက်တယ် ဆိုပေမဲ့ ကျွန်မတို့ နိုင်ငံရဲ့နောက်ဆုံးကြည့်လိုက်တဲ့ Data တွေအရ အလုပ်လက်မဲ့နှုန်းက တက်မလာဘူး ဆိုတာ သတိပြုမိပါတယ်။ တချို့နေရာတွေမှာတော့ အလုပ်သမားတွေကို ရပ်ဆိုင်းနေတယ် ဆိုပေမဲ့ တချို့နေရာတွေမှာ ဆက်ပြီးတော့ ဝင်နေတယ် ဆိုတာကို သတိပြုမိဖို့ လိုအပ်မှာ ဖြစ်ပါတယ်။ နောက်တစ်ခုကလည်း ဘဏ်တိုးနှုန်းပေါ့။ ရင်းနှီးမြှုပ်နှံသူတွေက ဒါတွေကို မဆုံးရှုံးချင်ဘူး။ မဆုံးရှုံးဖို့ အာမခံချက် စောင့်နေတယ်ဆိုတာကို ကျွန်မတစ်ခုတော့ ပြောချင်တယ်။ စီးပွားရေး လုပ်ငန်းရှင်ဆိုတာ စွန့်စားရဲရတယ်။ အအောင်မြင်ဆုံး စီးပွားရေး လုပ်ငန်းရှင်ဆိုတာ ၁၀၀ ရာခိုင်နှုန်း အောင်မြင်မယ်ဆိုမှ ဝင်လာတာ မဟုတ်ပါဘူး။ တခြားသူတွေ မလုပ်ရဲတဲ့ မလုပ်တတ်တဲ့လုပ်ဖို့ မစဉ်းစားတာတွေကို စွန့်စားပြီးတော့ အတိုင်းအတာ တစ်ခုရှိလို့သာ အင်မတန်မှ အောင်မြင်သွားကြတာပါ။ ၁၀၀ ရာခိုင်နှုန်း ဘယ်သူကမှ အာမခံချက် မပေးနိုင်ပါဘူး။ ဥပမာပြောရမယ်ဆိုရင် ဒေါ်လာဈေးပေါ့။ ဒေါ်လာဈေးဟာ ပြင်ပကမ္ဘာကနေ ရိုက်ခတ်လာတာ။ ကျွန်မတို့က ပြင်ပကမ္ဘာကနေ ရိုက်ခတ်လာတဲ့ စီးပွားရေး အခြေအနေကို ထိန်းချုပ်ထားလို့ မရဘူး။ ၁၀၀ ရာခိုင်နှုန်း စိတ်ပူစရာ မရှိဘူးဆိုတာတော့ ကျွန်မတို့က ဘယ်တော့မှ အာမခံချက် ပေးလို့မရဘူး။ တချို့ကိစ္စတွေကတော့ အစိုးရအနေနဲ့ လုပ်ပေးနိုင်တာတွေကို သေချာ စဉ်းစားပြီးတော့ လုပ်ပေးပါမယ်။ ဥပမာအားဖြင့် အခွန်အခနဲ့ ပတ်သက်ပြီး စီးပွားရေး ပညာရှင်ကြီးများဟာ အခွန်လွတ်ကင်းမှုတွေ ပေးတာကို သဘောမတူသူတွေ ရှိပါတယ်။ စီးပွားရေးပညာ ရှုထောင့်ကနေ ကြည့်ရင် အခွန်လွတ်ကင်းမှုတွေ များများပေးတာဟာ နိုင်ငံ့ရဲ့ စီးပွားရေး တိုးတက်မှုအတွက် အကျိုးမရှိဘူးဆိုပြီး အကြံပြုတဲ့ စီးပွားရေးပညာရှင်တွေ ရှိပါတယ်။ ကျွန်မတို့ အစိုးရက အဘက်ဘက်ကိုလည်း နားထောင်ရပါတယ်။ အဘက်ဘက်ကိုလည်း ချိန်ဆရပါတယ်။ စီးပွားရေး တစ်ကွက်ကိုလည်း ကြည့်လို့မရဘူး။ နှစ်ကွက် သုံးကွက်ကိုလည်း ကြည့်လို့ မရပါဘူး။ တစ်နိုင်ငံလုံးရဲ့ လိုအပ်ချက်ကို ကြည့်ရုံမကဘူး။ ကမ္ဘာ့ရဲ့ ရေစီးကြောင်းကိုလည်း ကြည့်ရပါတယ်။ ဒါပေမဲ့ အချက်နှစ်ချက်ကိုတော့ အလေးအနက်ထားပြီး တိုင်ပင်ပေးပါ့မယ်။ မလုပ်ဘူး၊ လုပ်မယ်ကတော့ ဒီမှာတော့ ဘယ်လိုမှ ပြတ်ပြတ်သားသား အဖြေပေးလို့တော့ မရသေးပါဘူး” ဟု တုံ့ပြန်ပြောကြားသည်။