ဝိုင်းမော်မြို့နယ်အတွင်းရှိ တရုတ်တစ်ရှူးငှက်ပျောစိုက်ခင်းများကို တွေ့ရစဉ်

ကချင်ပြည်နယ်တွင် တရုတ်တစ်ရှူး ငှက်ပျောစိုက်စာရင်းကို ပြန်လည်ကွင်းဆင်း စစ်ဆေးပြီးနောက် ယခင်နှစ်ထက် ဧကနှစ် သောင်းကျော်တိုးလာကြောင်း ကချင်ပြည်နယ် အစိုးရအဖွဲ့ဝင် စိုက်ပျိုး၊ မွေးမြူရေးနှင့် ဆည်မြောင်းဝန်ကြီး ဦးမြသိန်းက ပြောကြားသည်။

၂၀၁၇ ခုနှစ် မေလတွင် ပြည်နယ်အစိုးရက ကောက်ယူသည့် စာရင်းအရ ဧကလေး သောင်းကျော်ရှိရာမှ ၂၀၁၈ ခုနှစ် သြဂုတ်လ စာရင်းအရ ဧကခြောက်သောင်းကျော်အထိ ကောက်ယူနိုင်ခဲ့ခြင်းကြောင့် တစ်နှစ်အတွင်း ဧကနှစ်သောင်းကျော်တိုးလာကြောင်း သိရသည်။

ကချင်ပြည်နယ်တွင် တရုတ်တစ်ရှူး ငှက်ပျောစိုက်ပျိုးနေမှုများနှင့် ပတ်သက်ပြီး အစိုးရဘက်က တရားဝင်စိုက်ပျိုးနိုင်ရေးကိစ္စ၊ အခွန်ကိစ္စရပ်များကြောင့်လည်းကောင်း၊ လွှတ်တော်တွင် အခွန်ကောက်ခံရေးကိစ္စ၊ အဆမတန်တိုးချဲ့ စိုက်ပျိုးနေမှုနှင့် တရားမဝင်မှုစသည့် အချက်များကြောင့် အငြင်းပွားမှုများဖြစ်ပွားခဲ့ပြီး ၂၀၁၈ ခုနှစ် ဇွန် ၂၅ ရက်တွင် နောက်ဆုံး အစီရင်ခံစာတင်ပြရန် ကော်မတီတစ်ရပ်ကိုဖွဲ့စည်း ကွင်းဆင်းစစ်ဆေးစေခဲ့ကြောင်း သိရသည်။

ဝန်ကြီးဦးမြသိန်းက “နောက်ဆုံးစာရင်း ရထားတာက ဧကခြောက်သောင်းကျော်ပါတယ်။ ကောက်ယူဖို့ ကျန်နေတာတွေလည်း ရှိနေတယ်။ တချို့လည်း မငြိမ်းချမ်းဘူးလို့ ပြောလို့ရတဲ့ အစွန်အဖျားဒေသ၊ ပြည်သူ့စစ်ဒေသတွေ ဖြစ်နေတယ်။ အောက်ခြေသတင်းတွေအရလည်း နီးစပ်ရာကို တိုးချဲ့နေဆဲလို့ သိရတယ်။ အစိုးရအဖွဲ့ကတော့ ထပ်မံမတိုးချဲ့ဖို့ကို စာထုတ်ပြန်ခဲ့ပြီးဖြစ်ပါတယ်။ ဥပဒေအရ နိုင်ငံခြားရင်းနှီးမြှုပ်နှံမှုကို လုပ်နိုင်တယ်။ အခုက ဥပဒေအတိုင်းမသွားတော့ခုလို ဖြစ်နေတာ။ ပြည်ထောင်စု စီးပွားရေးကော်မတီကိုလည်း ဒီကိစ္စမေးတော့ ခွင့်ပြုချက်မပေးခဲ့ဘူး” ဟု ပြောကြားသည်။

လူမှုအဖွဲ့အစည်းများ၊ ဒေသခံများကမူ ကချင်ပြည်နယ်တွင် တစ်ရှူးငှက်ပျောစိုက်ဧက စုစုပေါင်း တစ်သိန်းလေးသောင်းဝန်းကျင် ရှိနေကြောင်း သုံးသပ်ထားပြီး စိုက်ခင်းများတွင် ဓာတုပိုးသတ်ဆေး၊ ပေါင်းသတ်ဆေး အလွန်အကျွံသုံးစွဲခြင်း၊ ရေဆိုးများစည်းကမ်း မဲ့စွန့်ပစ်ခြင်းတို့သည် သဘာဝပတ်ဝန်းကျင်ကို အန္တရာယ်ဖြစ်စေကြောင်း၊ အခွန်နစ်နာမှု၊ မြေယာနစ်နာမှု၊ ဒေသခံများ နစ်နာမှုများကို သက်ဆိုင်ရာဝန်ကြီးဌာနက မည်သို့တာဝန်ယူဖြေရှင်းမည်ကို  သြဂုတ် ၂၃ ရက်တွင် ကျင်းပသည့် အမျိုးသားလွှတ်တော် အစည်းအဝေးတွင် ကိုယ်စားလှယ် ဦးနိုင်ကိုကိုက ဆွေးနွေးခဲ့သည်။

၂၀၁၈ ခုနှစ် မေ ၂၉ ရက်က ကချင်ပြည်နယ် လွှတ်တော်တွင် တစ်ရှူးငှက်ပျောကိစ္စရပ်နှင့်ပတ်သက်၍ အငြင်းပွားမှုဖြစ်ပွားခဲ့သည်။

လွှတ်တော်တွင်  ကချင်ပြည်နယ်အစိုးရ အဖွဲ့၏ စိုက်ပျိုး၊ မွေးမြူရေးနှင့် ဆည်မြောင်းဝန်ကြီး ဦးမြသိန်းက ဗန်းမော်ခရိုင်နှင့် မြစ်ကြီးနားခရိုင်အတွင်း ၂၀၁၃ -၂၀၁၄ ဘဏ္ဍာနှစ်မှ ၂၀၁၇-၂၀၁၈ ဘဏ္ဍာနှစ်အထိ  ပြည်တွင်းအခွန် ကုမ္ပဏီစုစုပေါင်း ၂၈ ခုမှ ကြိုတင်ဝင်ငွေ ခွန်ကျပ် ၃၇၀၄ ဒသမ ၂၈၂ သန်းကောက်ခံ ရရှိကြောင်း၊ ၂၀၁၇ ခုနှစ်ကောက်ထားသည့် စာရင်းအရ စိုက်ဧက ၄၆၉၈၃ ဧကအနက် မြစ်ကြီးနားမြို့နယ် ကျေးရွာနှစ်ရွာတွင် ကုမ္ပဏီခြောက်ခုမှ ဧကပေါင်း ၆၁၈၊ ဝိုင်းမော် မြို့နယ်ကျေးရွာ ၁၁ ရွာတွင် ကုမ္ပဏီလုပ်ငန်းရှင်အဖွဲ့ ၂၅ ခုမှ မြေဧရိယာ ၂၇၆၃၅ ဧက စုစုပေါင်းကုမ္ပဏီလုပ်ငန်းရှင် ၃၁ ခုက မြေဧရိယာ ၃၃၈၁၅ ဧကတွင် တစ်ရှူးငှက်ပျောစိုက်နေကြောင်း၊ ဒေသခံ၊ လုပ်ငန်းရှင်၊ ကုမ္ပဏီများ၊ အဖွဲ့အစည်းများနှင့် တရုတ်ပြည်သူ့သမ္မတနိုင်ငံ စိုက်ပျိုးရေးကုမ္ပဏီက လယ်ယာမြေများအား ငှားရမ်းစိုက်ပျိုးခြင်း၊ မြေလွတ်၊ မြေလပ် နှင့် မြေရိုင်းများကို ဥပဒေအရ လုပ်ပိုင်ခွင့်ပြု မိန့်ရရှိထားသည့် နေရာတွင် စိုက်ပျိုးခြင်း၊ မြေလွတ်၊ မြေလပ်၊ မြေရိုင်းများတွင် ကျူးလွန်စိုက်ပျိုးခြင်း၊ ကြိုးဝိုင်း၊ ကြိုးပြင်တောများကို ကျူးလွန်စိုက်ပျိုးခြင်းများကို ဥပဒေနှင့်အညီ လိုက်နာစိုက်ပျိုးစေခြင်းဖြင့် စနစ်တကျ စိုက်ပျိုးအကောင်အထည်ဖော်နိုင်မည်ဖြစ်ကြောင်း၊ နည်းလမ်းတကျ ဆောင်ရွက်နိုင်ရေးအတွက် ကချင်ပြည်နယ်အစိုးရအဖွဲ့က ဖေဖော်ဝါရီ ၇ ရက်တွင် စီမံကိန်းနှင့် ဘဏ္ဍာရေးဌာနစီးပွား ရေးကော်မတီသို့ လမ်းညွှန်မှုခံယူထားကြောင်း ဖြေကြားသည်။

တစ်ရှူးငှက်ပျောခင်းများနှင့်ပတ်သက်၍ ကချင်တိုင်းရင်းသား လက်နက်ကိုင်အဖွဲ့များကလည်း တရုတ်စိုက်ပျိုးရေး လုပ်ကိုင်သူများကိုခေါ်ယူပြီး တရုတ်ယွမ်ငွေ သိန်းနှင့်ချီကာ ငွေကြေးကောက်ခံခဲ့ကြောင်း ဒေသခံတို့ အဆိုအရ သိရသည်။

တရုတ်တစ်ရှူးငှက်ပျောစိုက်ကုမ္ပဏီများသည် လက်ရှိတွင် မြန်မာနိုင်ငံသား အလုပ်သမားများကို အပင်လိုက်ထိန်းသိမ်းစောင့်ရှောက်စေပြီး အရည်အသွေးမီ ငှက်ပျောသီးများကို တစ်ကျင် (၃၃ ကျပ်သားခန့်) ကို တရုတ်ယွမ်ငွေ သုံးယွမ်နှုန်းဖြင့် ဝယ်ယူနေကြောင်း သိရသည်။

ကျင်စားလုပ်သားတစ်ဦးက “ကျင်စားဆိုတာကတော့ အပင်ငါးထောင်၊ တစ်သောင်း ကိုယ်နိုင်သလောက်ယူပေါ့။ ဧကနဲ့ပြောရင် ငါးဧကအထက်ပေါ့။ ထွက်လာတဲ့ငှက်ပျောက ကိုယ့်ငှက်ပျောပဲ။ အလုပ်သမားခ၊ ပိုးသတ်ဆေး၊ ငှက်ပျောနဲ့ ပတ်သက်တာတွေကို ကိုယ်ကခံရတယ်။ ငှက်ပျောထွက်လာရင် အပြင်မှာ ဘယ်ဈေးပေါက်ပေါက် ကျွန်တော်တို့က တစ်ကျင်သုံးယွမ်ပဲရတယ်။ မအောင်ရင် ကိုယ်က လုပ်အားရှုံး၊အချိန်ရှုံး။ အပင်တစ်သောင်း လောက်အောင်ရင် သိန်း ၇၀ လောက်အထိ ကျန်တတ်တယ်။ ငှက်ပျောက ဂရုအရမ်းစိုက်ရတယ်။ လက်သည်းခြစ်ရာတောင်ရှိရင် မယူဘူး။ ကြီးလွန်းရင်၊ ငယ်လွန်းရင်၊ ပုရင်ပယ်ပစ်လိုက်တာ။ ဈေးကွက်ပို့မယ့် ငှက်ပျောက ဘာမှထိခိုက်လို့ရတာမဟုတ်။ တရုတ်လုပ်ကွက်တွေမှာ မြန်မာနိုင်ငံသားအားလုံးက ဒီအတိုင်း လုပ်စားနေကြတာပေါ့။ တရုတ်ကရှုံးရင် နည်းတယ်။ မြတ်ရင်များတယ်။ ကျွန်တော်တို့က ရှုံးရင်လုပ်အားခမရဘူး။ ရာသီမှန်ရင် ရှုံးခဲပါတယ်” ဟု ပြောကြားသည်။

ကချင်ပြည်နယ်တွင် အစိုးရအဖွဲ့က ၂၀၁၇ ခုနှစ် မေက ကောက်ယူထားသော စာရင်းများအရ တရုတ်တစ်ရှူးငှက်ပျောစိုက် ဧကလေးသောင်းကျော်ရှိကြောင်း သိရပြီး ကချင်ပြည်နယ် စိုက်ပျိုး၊ မွေးမြူရေးနှင့် ဆည်မြောင်းဝန်ကြီးဌာန၏ စာရင်းများအရ ခွင့်ပြုချက်ရပြီးသော မြေလွတ် ၊ မြေရိုင်းတွင် ဧက ၄၉၆၀၊ ခွင့်ပြုချက်မရသေးသော မြေလွတ်မြေရိုင်းတွင် ၆၁၆၇ ဧက၊ ပုံစံ(၇)ရပြီး မြေတွင် ၃၁၆၇ ဧက၊ ပုံစံ (၇)မရရှိသေးသည့် မြေတွင် ၉၃၄၈ ဧက၊ သစ်တောမြေတွင် ဧက ၄၂၀၅ ရှိကြောင်း သိရသည်။

ကချင်ပြည်နယ်ရှိ တရုတ်တစ်ရှူးငှက်ပျောခင်းများ နိုင်ငံနှင့် ဒေသခံပြည်သူများ နစ်နာမှုမရှိစေရေး ကြပ်မတ်စီမံဆောင်ရွက်ရေးအဆိုကို ၂၀၁၇ ခုနှစ် သြဂုတ် ၄ ရက်က ဒုတိယအကြိမ် ကချင်ပြည်နယ်လွှတ်တော် အဋ္ဌမပုံမှန်အစည်းအဝေးတွင် တင်သွင်းဆုံးဖြတ်ရာ အဆိုအောင်မြင်ခဲ့သည်။ ယင်းအဆိုမှာ ကချင်ပြည်နယ်လွှတ်တော်တွင် တစ်ရှူးငှက်ပျောခင်းများနှင့်ပတ်သက်ပြီး နှစ်ကြိမ်မြောက် တင်သွင်းသည့်အဆိုဖြစ်ပြီး လက်ရှိအချိန်အထိ ဆက်လက်တိုးချဲ့စိုက်ပျိုးနေသည့် တရုတ်တစ်ရှူးငှက်ပျောခင်းကိစ္စများကို ပြည်ထောင်စုအစိုးရက ထိရောက်စွာ တားဆီးနိုင်ခြင်း မရှိသေးကြောင်း  လွှတ်တော်ကိုယ်စားလှယ်များက ဝေဖန်ထောက်ပြကြသည်။

မြစ်ကြီးနားနှင့် ဝိုင်းမော်မြို့နယ်မှ ဒေသခံများက တရုတ်တစ်ရှူးငှက်ပျောခင်း အလိုမရှိကြောင်း မြစ်ကြီးနားမြို့တွင် ဖေဖော်ဝါရီ ၃ ရက်က ဆန္ဒထုတ်ဖော်ခဲ့ကြသည်။ ကေအိုင်အိုအဖွဲ့ကလည်း တစ်ရှူးငှက်ပျောစိုက်ခင်းများ ထပ်မံတိုးချဲ့လာမှုကြောင့် ၂၀၁၇ ခုနှစ် နိုဝင်ဘာလအတွင်း စစ်ရှောင်ကျေးရွာများ၏ မြေများ၊ ပတ်ဝန်းကျင်များကို အဓမ္မသိမ်းယူခြင်းမပြုရန် ထုတ်ပြန်ချက်များ ထုတ်ပြန်ခဲ့သည်။