မောင်တောမြို့နယ်ရှိ ကညင်ချောင်းစီးပွားရေးဇုန် စီမံကိန်းတစ်နေရာကို တွေ့ရစဉ်
မောင်တောကညင်ချောင်း စီးပွားရေးဇုန်အား ကညင်ချောင်းစီးပွားရေး ဖွံ့ဖြိုးတိုးတက်ရေး ကုမ္ပဏီလီမိတက်က ဆက်လက် အကောင်အထည် ဖော်သွားမည်ဖြစ်ကြောင်း သိရသည်။
အဆိုပါ ကညင်ချောင်း စီးပွားရေး ဖွံ့ဖြိုးတိုးတက်ရေး ကုမ္ပဏီလီမိတက်သည် ရခိုင်ပြည်နယ် အစိုးရအဖွဲ့နှင့် နားလည်မှု စာချွန်လွှာကို မေ ၈ ရက်က လက်မှတ်ရေးထိုးခဲ့ပြီး ဖြစ်ကြောင်း သိရသည်။ လက်ရှိအစိုးရနှင့် နားလည်မှု စာချွန်လွှာ ရေးထိုးကာ အကောင်အထည်ဖော်မည့် ကညင်ချောင်းစီးပွားရေး ဖွံ့ဖြိုးတိုးတက်ရေး ကုမ္ပဏီလီမိတက်တွင် ကုမ္ပဏီနှစ်ခု ပါဝင်ကြောင်းနှင့် အဆိုပါကုမ္ပဏီများမှာ မောင်တောနယ်စပ် အခြေစိုက် Family Aye Chan ကုမ္ပဏီနှင့် ရန်ကုန်အခြေစိုက် Golden Key ကုမ္ပဏီတို့ ပါဝင်ကြောင်း သိရသည်။
“အစက ကညင်ချောင်း စီးပွားရေးဇုန်ကို အကောင်အထည်ဖော်တဲ့ အခါမှာ ပြည်နယ် အစိုးရနဲ့ နတ်မြစ် အလင်းတန်း ကုမ္ပဏီနဲ့ MoU ရေးထိုးခဲ့တယ်။ ဒါပေမဲ့ Developer ကုမ္ပဏီတွေထဲမှာပါတဲ့ ကုမ္ပဏီတချို့ရဲ့ ငွေကြေးအခြေအနေကြောင့် လုပ်ငန်းအချို့ နှောင့်နှေးတာတွေ ဖြစ်ပေါ်တဲ့အတွက် အခုတစ်ဖန် အမှန်တကယ်လုပ်မယ့် ကုမ္ပဏီတွေကို ဖိတ်ခေါ်ပြီးတော့ ငွေကြေးထည့်ဝင်ခိုင်းပြီးတော့ လုပ်တဲ့အခါ ကုမ္ပဏီနှစ်ခု ပါလာတယ်။ အဲဒီကုမ္ပဏီ နှစ်ခုပေါင်းပြီး ကညင်ချောင်း စီးပွားရေး ဖွံ့ဖြိုးတိုးတက်ရေး ကုမ္ပဏီလီမိတက် ဖြစ်လာပြီး အစိုးရနဲ့ ထပ်မံပြီးတော့ နားလည်မှု စာချွန်လွှာ ရေးထိုးတာ ဖြစ်ပါတယ်” ဟု ကညင်ချောင်း စီးပွားရေးဇုန် တည်ဆောက်ရေး ဆပ်ကော်မတီ ဒုတိယဥက္ကဋ္ဌ ဦးအောင်မြင့်သိန်းက ပြောကြားသည်။
ကညင်ချောင်း စီးပွားရေးဇုန် အကောင်အထည် ဖော်ရေးအတွက် နတ်မြစ်အလင်းတန်း ကုမ္ပဏီနှင့် ပြည်နယ်အစိုးရအဖွဲ့တို့သည် ၂၀၁၇ ခုနှစ် အောက်တိုဘာ ၃၀ ရက်က MoU လက်မှတ်ရေးထိုး အကောင်အထည် ဖော်ခဲ့ကြောင်းနှင့် လက်ရှိတွင် အဆိုပါ MoU မှာ ပျက်ပြယ်သွားပြီး ကညင်ချောင်းစီးပွားရေး ဖွံ့ဖြိုးတိုးတက်ရေး ကုမ္ပဏီလီမိတက်ဖြင့် ထပ်မံ MoU ရေးထိုးခြင်းဖြစ်ကြောင်း သိရသည်။
အဆိုပါ ကညင်ချောင်း စီးပွားရေးဇုန်တွင် ဆိပ်ကမ်းနှစ်ခု တည်ဆောက်ပြီးဖြစ်ကာ ရှင်းလင်းဆောင်၊ အရောင်ပြခန်းပါ ဂိုဒေါင်အလုံး ၂၀ ကိုလည်း တည်ဆောက်ပြီး ဖြစ်သဖြင့် တည်ဆောက်ရေး လုပ်ငန်းများ ဆောင်ရွက်နေစဉ်မှာ ကုန်သွယ်မှု စတင်ဆောင်ရွက်နိုင်ပြီ ဖြစ်ကြောင်း သိရသည်။
မောင်တောမြို့ ကညင်ချောင်း စီးပွားရေးဇုန် တည်ဆောက်ရေးလုပ်ငန်း စတင်ခြင်း အထိမ်းအမှတ် အခမ်းအနားကို ၂၀၁၇ ခုနှစ် ဒီဇင်ဘာ ၁ ရက် နံနက်ပိုင်းက ကျင်းပခဲ့ပြီး ရခိုင်ပြည်နယ် ဝန်ကြီးချုပ် ဦးညီပုနှင့် တာဝန်ရှိသူများက ကညင်ချောင်းစီးပွားရေးဇုန် တည်ဆောက်ခြင်းကို ဖွင့်လှစ်ပေးခဲ့သည်။
မောင်တော ကညင်ချောင်း စီးပွားရေးဇုန်တွင် ကုန်သွယ်ရေးနှင့် ပတ်သက်ပြီး ဂိုဒေါင်များ၊ ကုန်ချကွင်းနှင့် တည်းခိုခန်း၊ စားသောက်ဆိုင်၊ အအေးခန်းတို့ ပါဝင်မည်ဖြစ်ပြီး လက်ရှိ စလုပ်ရန်ရှိသည့် လုပ်ငန်းခုနစ်ခု ရှိကြောင်းနှင့် ဇုန်အတွင်း ပတ်လမ်းဖောက်လုပ်ခြင်း၊ ခြံစည်းရိုးကာရံခြင်း၊ ဇုန်မှ မောင်တောသို့ ဆက်သွယ်မည့် ၁ ဒသမ ၄ မိုင်ရှိ သီးသန့်လမ်း ဖောက်လုပ်ခြင်း၊ ကုန်ချကွင်း ပြုလုပ်ခြင်းနှင့် ဇုန်မြေဖို့ လုပ်ငန်းတို့ကို ဆောင်ရွက်သွားမည် ဖြစ်ကြောင်း သိရသည်။
ကညင်ချောင်းစီးပွားရေးဇုန်ကို ဧက ၂၀၀ အထိ တိုးချဲ့ရန် မျှော်မှန်းထားပြီး ပထမအဆင့်အနေဖြင့် ဧက ၁၀၀ တွင် တည်ဆောက်သွားမည်ဖြစ်ကာ လက်ရှိတွင် အဆောက်အအုံနှင့် ဆိပ်ကမ်းများ တည်ဆောက်ထားပြီး ဖြစ်ကြောင်းနှင့် ဘင်္ဂလားဒေ့ရှ်နှင့်သာမက အိန္ဒိယနှင့်ပါ ကုန်သွယ်နိုင်မည်ဖြစ်သည်။
ကညင်ချောင်း စီးပွားရေးဇုန်သည် မောင်တောမြို့မှ အနောက်မြောက်ဘက် နှစ်မိုင်ခန့်အကွာ ကညင်ချောင်းဘေးတွင် တည်ရှိပြီး သင်္ဘောများ ၂၄ နာရီ ဝင်ထွက်နိုင်ခြင်း၊ တစ်ဖက်ဘင်္ဂလားဒေ့ရှ်နိုင်ငံ ဆိပ်ကမ်းနှင့် လေးမိုင်ခန့်သာ ကွာဝေးကြောင်း သိရသည်။
