တရုတ်-မြန်မာနယ်စပ်ရှိ မူဆယ်နယ်စပ် ကုန်သွယ်ရေးစခန်း တစ်နေရာကို တွေ့ရစဉ် (ဓာတ်ပုံ-ထွန်းနေလှိုင်)
တရုတ်နိုင်ငံ ယူနန်ပြည်နယ်မှအစပြု ၍မန္တလေးမြို့သို့ ချဲ့ထွင်ကာ ရန်ကုန်နှင့် ရခိုင်ရှိ အထူးစီးပွားရေးဇုန်များနှင့် ချိတ်ဆက်မည့် တရုတ်-မြန်မာ စီးပွားရေးစြင်္ကံ ထူထောင်ရေးအတွက် လာမည့်နိုဝင်ဘာတွင် MoU နားလည်မှုစာချွန်လွှာ ရေးထိုးနိုင်ရန် တရုတ်အစိုးရ ကြိုတင်စီစဉ်နေကြောင်း မြန်မာဘာသာဖြင့် ထုတ်ဝေသည့် တရုတ်အခြေစိုက် သတင်းစာ ပေါက်ဖော် သတင်းဌာန၏ ဖော်ပြချက်အရ သိရသည်။
တရုတ်ခေါင်းဆောင်များမှ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သို့ တင်သွင်းထားသော တရုတ်-မြန်မာ စီးပွားရေးစြင်္ကံလမ်းနှင့် ပတ်သက်၍ နှစ်နိုင်ငံအစိုးရက သဘောတူညီပြီးဖြစ်ကာ အဆိုပါစီမံကိန်းဆိုင်ရာ ဆွေးနွေးပွဲတစ်ခုကို မေ ၂၈ ရက်က ရန်ကုန်မြို့ Lotte Hotel တွင် ပြုလုပ်ခဲ့ပြီးဖြစ်သည်။
ယင်းဆွေးနွေးပွဲတွင် စီးပွားရေး ဖွံ့ဖြိုးတိုးတက်မှု၊ ငြိမ်းချမ်းရေးနှင့် သဘာဝပတ်ဝန်းကျင် ထိန်းသိမ်းရေးတို့အပြင် ဆက်သွယ်ရေး၊ စွမ်းအင်နှင့် နှစ်ဖက်ပြည်သူလူထု ဆက်ဆံရေးဆိုင်ရာ ခေါင်းစဉ်များကို ဆွေးနွေးခဲ့ကြသည်။
“မြန်မာနိုင်ငံအနေနဲ့ ရင်ဆိုင်နေရတဲ့ ရေရှည်စိန်ခေါ်မှုကြီး နှစ်ခုက ရာသီဥတု ပြောင်းလဲလာခြင်းနဲ့ အိမ်နီးချင်း တရုတ်နိုင်ငံ အင်အားကြီးလာခြင်းတို့ ဖြစ်ပါတယ်။ ပထမတစ်ခုက မကောင်းပေမယ့် ကျန်တစ်ခုက အခွင့်အလမ်းတစ်ခု ဖြစ်ပါတယ်။ တရုတ်နိုင်ငံနဲ့ ဆက်ဆံရေးကို အလေးထား စီမံခန့်ခွဲတာဟာ အလွန်အရေးကြီးရုံသာမက မြန်မာနိုင်ငံအတွက် အလှည့်အပြောင်း ဖြစ်စေမယ့် ကစားကွက်တစ်ခု ဖြစ်လာနိုင်ပါတယ်။ စစ်တုရင်ကစားပွဲမှာ အနိုင်ရမယ့် အကွက်တစ်ခု ဖြစ်ပါတယ်။ တခြားပြဿနာတွေအတွက် ဖြေရှင်းချက်တွေ ရှာတွေ့နိုင်မယ့် အခွင့်အရေးတစ်ခု ဖြစ်ပါတယ်။ မြန်မာနိုင်ငံအနေနဲ့ နည်းမှန်လမ်းမှန် ဆောင်ရွက်ဖို့ပဲ လိုပါတယ်” ဟု ဦးသန့်မြင့်ဦးက အဆိုပါ ဆွေးနွေးပွဲတွင် ပြောကြားသည်။
၂၀၁၇ ခုနှစ်နှောင်းပိုင်းတွင် တရုတ်နိုင်ငံခြားရေးဝန်ကြီး ဝမ်ယီက နိုင်ငံတော်၏ အတိုင်ပင်ခံပုဂ္ဂိုလ်၊ နိုင်ငံခြားရေးဝန်ကြီး ဒေါ်အောင်ဆန်းစုကြည်နှင့် တွေ့ဆုံစဉ်က တရုတ် -မြန်မာ စီးပွားရေးစြင်္ကံလမ်း အဆိုကို တင်သွင်းခဲ့ခြင်း ဖြစ်သည်။ ၎င်းစြင်္ကံလမ်းသည် တရုတ်နိုင်ငံ ယူနန်ပြည်နယ်တွင် အစပြု၍ မြန်မာနိုင်ငံ မန္တလေးမြို့ကို တိုးချဲ့ကာ ရန်ကုန်မြို့နှင့် ရခိုင်အထူးစီးပွားရေးဇုန်များသို့ ဆက်သွယ်ထားသည့် မဏ္ဍိုင်သုံးရပ်ပါ ပူးပေါင်းဆောင်ရွက်မှု စီမံကိန်းအဖြစ် ရည်ရွယ်ထားခြင်း ဖြစ်သည်။
၂၀၁၈ ခုနှစ် ဧပြီ ၂ ရက်တွင် ကုန်သည်စက်မှုအသင်းချုပ်၌ ပြုလုပ်သည့် ဒုတိယသမ္မတ (၁) ဦးမြင့်ဆွေ၊ ပြည်ထောင်စု ဝန်ကြီးများနှင့် ပုဂ္ဂလိကကဏ္ဍ ကိုယ်စားလှယ်များ ပုံမှန်တွေ့ဆုံပွဲတွင် တရုတ်-မြန်မာ စီးပွားရေးစြင်္ကံလမ်း စီမံကိန်းတွင် အတူတကွ ရင်းနှီးမြှုပ်နှံလိုသော လုပ်ငန်းရှင်များကို ဖိတ်ခေါ်ထားကြောင်း သိရသည်။
တရုတ်-မြန်မာ စီးပွားရေးစြင်္ကံလမ်းသည် တရုတ်အစိုးရက ချမှတ်ထားသော One Belt One Road စီမံကိန်း၏ မြန်မာနိုင်ငံဆိုင်ရာ အဓိကစီမံကိန်း တစ်ခုဖြစ်ပြီး မြို့ပြအိမ်ရာများ၊ စက်မှုဇုန်များ၊ စိုက်ပျိုးရေးဇုန်များ၊ ဆိပ်ကမ်းများ၊ ထောက်ပံ့ပို့ဆောင်ရေးဆိုင်ရာ အခြေခံ အဆောက်အအုံများ၊ အိုင်တီလုပ်ငန်းများ၊ ကုန်သွယ်ရေး အခြေခံကဏ္ဍများ၊ နယ်စပ်ကုန်သွယ်ရေး၊ ခရီးသွားကဏ္ဍ စသည့်ဘက်စုံ စီမံကိန်းများ ပါဝင်မည့် စီးပွားရေးစြင်္ကံလမ်း စီမံကိန်းဖြစ်သည်။
တရုတ်-မြန်မာ စီးပွားစြင်္ကံလမ်း၏ မြန်မာဘက်ခြမ်း စီမံကိန်းများတွင် စက်မှုဥယျာဉ်ဇုန်များ တည်ထောင်ခြင်း၊ ကားလမ်း၊ ရထားလမ်း၊ လေကြောင်း၊ ပိုက်လိုင်းနှင့် အင်တာနက် အခြေခံ အဆောက်အအုံ ကွန်ရက်များ တည်ဆောက်ခြင်း၊ တရုတ်ရွှေလီ၊ ကျန်းဖုန်းမှ မြန်မာဗန်းမော်ဆိပ်ကမ်း ချိတ်ဆက်နိုင်မည့် တရုတ်-မြန်မာ ဧရာဝတီမြစ် ကုန်းကြောင်း ရေကြောင်း ပူးတွဲပို့ဆောင်ရေး ကားလမ်းမ စီမံကိန်း၊ ရွှေလီ-မန္တလေးကားလမ်း အဆင့်မြှင့်တင်မှု စီမံကိန်း၊ တရုတ်-မြန်မာ စီးပွားရေးစြင်္ကံ၏ ရထားလမ်း၊ အမြန်လမ်း တည်ဆောက်မှုစီမံကိန်း၊ စွမ်းအင်နှင့် ဆက်သွယ်ရေး အခြေခံ အဆောက်အအုံ စီမံကိန်းများ ပါဝင်ကြောင်း ပေါက်ဖော်သတင်းစာ၏ ဖော်ပြချက်အရ သိရသည်။
တရုတ်-မြန်မာ စီးပွားရေး စြင်္ကံလမ်း၏ စီမံကိန်းများကို တရုတ်နိုင်ငံ တစ်နိုင်ငံတည်းက ရင်းနှီးမြှုပ်နှံမှု ပြုလုပ်မည် မဟုတ်ဘဲ မြန်မာနိုင်ငံသားများ၊ နိုင်ငံခြား ရင်းနှီးမြှုပ်နှံမှုများလည်း ပါဝင်နိုင်ကြောင်း မြန်မာအစိုးရ ဝန်ကြီးဌာနမှ အကြီးတန်း တာဝန်ရှိသူများက ပြောကြားထားသည်။
