အချိန်အခါမဟုတ် ရွာသွန်းခဲ့သည့်မိုးကြောင့် ကြက်သွန်နီ အဓိကစိုက်ပျိုးသည့် စစ်ကိုင်းတိုင်း၊ မန္တလေးတိုင်း၊ မကွေးတိုင်းဒေသကြီးရှိ ကြက်သွန်နီစိုက်ခင်းများ ရေနစ်မြုပ်မှု ဖြစ်ပေါ်သဖြင့် မန္တလေးဈေးကွက်တွင် ကြက်သွန်နီဈေး ဆက်လက် မြင့်တက်ဖွယ်ရှိကြောင်း စားဖိုချောင်သီးနှံ စိုက်ပျိုးထုတ်လုပ် ရောင်းချသူများ အသင်းမှ သိရသည်။
ယင်းကဲ့သို့ အချိန်အခါမဟုတ ်ရွာသွန်းခဲ့သည့်မိုးကြောင့် ကြက်သွန်နီစိုက်ခင်းများ ရေနစ်မြုပ်မှုများ ဖြစ်ပေါ်ခဲ့သဖြင့် ဈေးကွက်အတွင်းသို့ အချိန်မီ မရောက်ရှိနိုင်သည့်အတွက် ဈေးဆက်လက် မြင့်တက်လာမည်ဖြစ်ပြီး လက်ရှိတွင် မန္တလေး ကြက်သွန်နီဈေးကွက်မှာ ကြက်သွန်နီထိပ်စ တစ်ပိဿာလျှင် (ပွဲရုံဈေး) ငွေကျပ် ၂၅၀၀ ရှိရာမှ ထပ်မံ၍ ထိပ်စတစ်ပိဿာလျှင် ငွေကျပ် ၅၀၀ ခန့်အထိ ဈေးထပ်တက်လာနိုင်ကြောင်း စားဖိုချောင်သီးနှံ စိုက်ပျိုးထုတ်လုပ် ရောင်းချသူများ အသင်းမှ အတွင်းရေးမှူး ဦးဝင်းမြင့်က ပြောကြားသည်။
“မုန်တိုင်းမိုးတွေကြောင့် တိုင်းသုံးတိုင်းမှာပေါ့။ (စစ်ကိုင်းတိုင်း၊ မန္တလေးတိုင်း၊ မကွေးတိုင်း) မှာ ကြက်သွန်စိုက် တောင်သူတွေမှာ ဘယ်လိုဖြစ်လာလဲဆိုရင် မိုးက သုံးလေးရက် စိုသွားလိုက်တဲ့အတွက် တိုင်းသုံးတိုင်းမှာရှိတဲ့ ချောင်းစိုက်ပေါ့နော်။ ဆင်တဲဝချောင်း၊ ယောချောင်း၊ မြင်းမူနီး တစ်ဝိုက်က ချောင်းနီးဝန်းကျင်မှာစိုက်တဲ့ ကြက်သွန်စိုက်တောင်သူတွေ တော်တော်များများ ရေမြုပ်ကုန်တယ်။ လူတစ်ရပ်လောက် အချို့နေရာတွေမှာ မြုပ်တယ်လို့ ကျွန်တော်တို့ ဆိပ်ဖြူဘက်က သတင်းကို သိရတယ်။ ဆူးလေးကုန်းကျေးရွာဆိုရင် လူတစ်ရပ်လောက်ကို မြုပ်သွားတယ်လို့ ကျွန်တော်တို့ ကြားသိရတယ်။ အဲဒီတော့ အပျက်အစီး စာရင်းတွေကတော့ လက်ရှိအခြေအနေမှာ မပြောနိုင်သေးဘူးပေါ့နော်။ ရေမြုပ်သွားတာတော့ သိရတယ်” ဟု ၎င်းက ပြောကြားသည်။
ကြက်သွန်နီ အဓိကထွက်သည့် တိုင်းသုံးတိုင်းရှိ ကြက်သွန်နီစိုက်ခင်းများ အချိန်အခါမဟုတ် ရွာသွန်းခဲ့သည့် မိုးကြောင့် ရေနစ်မြုပ်ခဲ့သည့်အတွက် ဈေးကွက်အတွင်း အချိန်မီ မရောက်ရှိနိုင်သည့်အတွက် ဈေးဆက်လက် မြင့်တက်လာနိုင်ကြောင်း အတွင်းရေးမှူး ဦးဝင်းမြင့်က ပြောကြားသည်။
တောင်သူများ အနေဖြင့် နောက်ထပ် အစားထိုး စိုက်ပျိုးရန်မှာ ရာသီချိန် ကျော်လွန်သွားသည့်အတွက် မစိုက်ပျိုးတော့ကြောင်း၊ ယင်းကြောင့် ၂၀၁၈ အတွက် အထွက်လျော့ နိုင်ကြောင်း သိရသည်။
