![Photo : Getty Images](https://news-eleven.com/sites/news-eleven.com/files/styles/news_detail_image/public/news-images/3272766-66972588-2560-1440.jpg?itok=3SPgB2l8)
လက်စတာဝါရင့်တိုက်စစ်မှူး ဗာဒီက အသက်အရွယ်မှာ ကိန်းဂဏန်းတစ်ခုသာဖြစ်ပြီး ခန္ဓာကိုယ်အဆင်ပြေသရွှေ့ကစားသွားမည်ဖြစ်ကြောင်း ပြောကြားခဲ့သည်။
အသက် (၃၈)နှစ်ကျော်ပြီဖြစ်သည့် အင်္ဂလန်ဝါရင့်တိုက်စစ်မှူး ဗာဒီသည် သြဂုတ် (၁၉)ရက်က ကစားခဲ့သည့် လက်စတာ (၁-၁) စပါးပွဲတွင် လက်စတာအတွက် ချေပဂိုးကို သွင်းယူပေးခဲ့သူဖြစ်သည်။
ယင်းဂိုးမှာ ဗာဒီအတွက် ပရီးမီးယားလိဂ်ရာသီအဖွင့်ပွဲများတွင် (၈) ဂိုးမြောက်သွင်းဂိုး ဖြစ်ခဲ့ပြီး ၎င်းထက် ဂိုးပိုသွင်းနိုင်သူမှာ လီဗာပူးလ်တိုက်စစ်ကစားသမား ဆာလာ(၉ ဂိုး)သာ ရှိသည်။ ဗာဒီအနေဖြင့် အသက် (၄၀) အရွယ်ထိ ကစားရန် ဆန္ဒရှိနေကြောင်း Daily Mail က ဖော်ပြခဲ့သည်။
ဗာဒီက "ကျွန်တော်ကတော့ အသက်အရွယ်ဆိုတာ ကိန်းဂဏန်းတစ်ခုလို့ပဲ မြင်ပါတယ်။ ကျွန်တော့်အနေနဲ့ ခန္ဓာကိုယ်အဆင်ပြေနေသေး တယ်ဆိုတဲ့အထိ ဆက်ကစားသွားမှာပါ။ အခုအချိန်မှာ ကျွန်တော်အထူး လုပ်ဆောင်တာက ကြံ့ခိုင်မှုပြန်လည် ပြည့်ဝဖို့ပါပဲ"ဟု ပြောကြားခဲ့သည်။
ဗာဒီသည် စပါးအသင်းနှင့်ကစားခဲ့သည့် ပွဲတွင် စပါးနောက်ခံလူ ရိုမဲရိုးနှင့် အချင်းများခဲ့ပြီး လူစားလဲချိန်တွင် စပါးအသင်းပရိသတ်များကို ၎င်းအနေဖြင့် ပရီးမီးယားလိဂ်တစ်ကြိမ်ရဖူးပြီး စပါးအသင်းမရဖူးသည်ကို လက်အမူအရာဖြင့် လုပ်ပြခဲ့ကြောင်းသိရသည်။