ပါရီနွေရာသီအိုလံပစ်ပြိုင်ပွဲဝင်လျက်ရှိသည့် ကနေဒါအမျိုးသမီးဘောလုံးအသင်းသည် ဒရုန်းပြဿနာကြောင့် ကမ္ဘာ့ဘောလုံးအဖွဲ့ချုပ် (FIFA) ၏ ခြောက်မှတ်လျှော့ ပြစ်ဒဏ် ချမှတ်ခံရမှုအပေါ် ကနေဒါဘောလုံးအဖွဲ့ချုပ် (CSA) က နိုင်ငံတကာအားကစားခုံရုံး (CAS) သို့ အယူခံတင်သွင်းခဲ့ကြောင်း သိရသည်။
CSA အနေဖြင့် ရာထူးမှ ထုတ်ပယ်ခံထားရသည့် နည်းပြ ပရီးစ်မန်း၊ ဘောလုံးလေ့လာသုံးသပ်သူ ဂျိုးဆက်လွန်ဘာဒီ၊ လက်ထောက်နည်းပြ ဂျက်စမင်မန်ဒါတို့၏ ဘောလုံးလောကနှင့် တစ်နှစ်ပိတ်ပင်ခံရသည့် ပြစ်ဒဏ်ကိုမူ အယူခံဝင်ခဲ့ခြင်းမရှိဟု BBC Sport က ဖော်ပြခဲ့သည်။
CAS သည် ကနေဒါ၏ အယူခံကို ဇူလိုင် ၃၁ ရက် (ယနေ့) မြန်မာ စံတော်ချိန် ညနေ ၄ နာရီခွဲတွင် ဆုံးဖြတ်ဖွယ်ရှိကြောင်း သိရသည်။ CSA ၏ အယူခံတင်သွင်းမှုသည် အရေးယူမှု၏ အချိုးအစား မညီမျှမှုအပေါ် အခြေခံကြောင်း ပြောကြားခဲ့သည်။ ထို့ပြင် CSA က ကနေဒါနည်းပြ အဖွဲ့၏ ဥပဒေနှင့်မညီ လုပ်ဆောင်မှုလုပ်ရပ်သည် မပါဝင်ခဲ့သော ကစားသမားများအပေါ် မမျှတသည့် အရေးယူမှုဟုလည်း ယုံကြည်လျက်ရှိသည်။
ကနေဒါအသင်းသည် အုပ်စု (A) တွင် နယူးဇီလန်နှင့် အိမ်ရှင် ပြင်သစ်အသင်းများကို အနိုင်ကစားထားပြီး ခြောက်မှတ်လျှော့ပြစ်ဒဏ်ကြောင့် အုပ်စုရပ်တည်မှုတွင် နောက်ဆုံးနေရာ၌ ရပ်တည်နေကြောင်း သိရသည်။ ကနေဒါအသင်းအနေဖြင့် အုပ်စုနောက်ဆုံးပွဲအဖြစ် ယနေ့တွင် ကိုလံဘီယာ အသင်းနှင့် ယှဉ်ပြိုင်ကစားရမည်ဖြစ်ပြီး အနိုင်ရလျှင် နောက်တစ်ဆင့်တက်ရောက်မည်ဖြစ်သည်။
