တရုတ်သမ္မတ ရှီကျင်းပင်သည် ဇူလိုင် ၂ ရက်က နိုင်ငံတော်အဆင့် ခရီးစဉ်အဖြစ် ကာဇက်စတန်သို့ ရောက်ရှိလာခဲ့ပြီး ယင်းခရီးစဉ်အတွင်း ကာဇက်စတန်၏မြို့တော် အက်စတာနာတွင် ကျင်းပမည့်  ရှန်ဟိုင်းပူး ပေါင်းဆောင်ရွက်ရေးအဖွဲ့ (SCO) အစည်းအဝေးသို့ တက်ရောက်မည်ဖြစ်သည်။

SCO အဖွဲ့အစည်းတွင် အဖွဲ့ဝင်နိုင်ငံကိုးနိုင်ငံပါဝင်ပြီး ရုရှားမှသည် တရုတ်အထိ ကမ္ဘာ့နေရာဒေသများကို ကျယ်ကျယ်ပြန့်ပြန့် လွှမ်းခြုံထားပြီး ကမ္ဘာ့လူဦးရေ၏ ထက်ဝက်ခန့်ကိုလည်း လွှမ်းခြုံထားသည်။

SCO အမြဲတမ်းအဖွဲ့ဝင် နိုင်ငံများမှာ ယခုနှစ်အစည်းအဝေးကို အိမ်ရှင်အဖြစ်လက်ခံကျင်းပမည့် ကာဇက်စတန်၊ အိန္ဒိယ၊ တရုတ်၊ ကာဂျစ္စတန်၊ ပါကစ္စတန်၊ ရုရှား၊ တာဂျစ်ကစ္စတန်၊ ဥဇဘက်ကစ္စတန်နှင့် ယမန်နှစ်ကအဖွဲ့ ဝင်အဖြစ် ပါဝင်လာသည့် အီရန်တို့ဖြစ်သည်။

ယခုနှစ်တွင် ဘီလာရုစ်နိုင်ငံကလည်း အဖွဲ့ဝင်အဖြစ် ပါဝင်လာဖွယ်ရှိသည်။

“တရုတ်သမ္မတရှီကျင်းပင်ဟာ ရှန်ဟိုင်း ပူးပေါင်းဆောင်ရွက်ရေးအဖွဲ့ဝင် နိုင်ငံခေါင်း ဆောင်တွေရဲ့ ၂၄ ကြိမ်မြောက် ကောင်စီအစည်းအဝေးတက်ရောက်ဖို့နဲ့ နိုင်ငံတော်ခရီးစဉ်အတွက် ကာဇက်စတန်ကို ရောက်ရှိလာ တယ်”ဟု နိုင်ငံပိုင် ဆင်ဟွာသတင်းဌာနက အက်စတာနာမြို့မှ သတင်းပေးပို့ခဲ့သည်။

သမ္မတရှီ စီးနင်းလိုက်ပါလာသော လေယာဉ်ကာဇက်စတန် လေပိုင်နက်ထဲသို့ရောက်ရှိလာချိန်တွင် ကာဇက်စတန် ဂျက်တိုက်လေယာဉ်နှစ်စင်းက လိုက်ပါစောင့်ရှောက်ပေးခဲ့သည်ဟု တရုတ်နိုင်ငံပိုင်ရုပ်သံ CCTV က ဖော်ပြခဲ့သည်။

သမ္မတရှီကျင်းပင်နှင့်အတူ တရုတ်ကွန်မြူနစ်ပါတီ၏ ထိပ်တန်းတာဝန်ရှိသူ ခိုင်ချီ၊ နိုင်ငံခြားရေးဝန်ကြီး ဝမ်ယိတို့လည်း လိုက်ပါလာခဲ့ကြောင်း ဆင်ဟွာက ဖော်ပြခဲ့သည်။

SCO ထိပ်သီးအစည်းအဝေးသည် အဖွဲ့ဝင်နိုင်ငံများအကြား တူညီဆန္ဒများကို ပိုမိုပုံဖော်တည်ဆောက်နိုင်ပြီး အဖွဲ့ဝင်နိုင်ငံများ၏ လုံခြုံမှု၊ တည်ငြိမ်မှုနှင့် ဖွံ့ဖြိုးတိုးတက်မှုများကို အထောက်အကူပြုကာ ကမ္ဘာကြီး၏ ဘုံ အကျိုးစီးပွားနှင့် ငြိမ်းချမ်းရေး အဓွန့်ရှည်တည်တံ့စေရေးအတွက် ကြိုးပမ်းဆောင်ရွက်ရာတွင် အထောက်အကူပြုနိုင်မည်ဟု တရုတ်နိုင်ငံက ယုံကြည်ပါကြောင်း နိုင်ငံခြားရေးဝန်ကြီးဌာနပြောခွင့်ရ မော်နင်က ဇူလိုင် ၁ ရက်တွင် ပြောကြားခဲ့သည်။

ကာဇက်စတန်သို့ ပÍ္စမအကြိမ် သွားရောက်သည့် ခရီးစဉ်အတွင်း ရှီသည် ကြိုဆိုဧည့်ခံပွဲ၊ လက်မှတ်ရေးထိုးပွဲနှင့် ဂုဏ်ပြုညစာ စားပွဲအပါအဝင် နိုင်ငံတော်အဆင့် အခမ်းအနားများကို တက်ရောက်မည်ဖြစ်သည်။

ရှီသည် ကာဇက်စတန်သမ္မတ ကက်ဆင်ဂျိုမာ့တ် တိုကာယက်ဗ်နှင့် တွေ့ဆုံ၍ နှစ်နိုင်ငံဆက်ဆံရေး၊ အဓိကကျသော နယ်ပယ်များတွင် ပူးပေါင်းဆောင်ရွက်ရေး၊ ဒေသတွင်းနှင့်နိုင်ငံတကာ အခင်းအကျင်းတို့နှင့် ပတ်သက်၍ ခြေခြေမြစ်မြစ်ဆွေးနွေးမှုများ ပြုလုပ်မည်ဖြစ်ကြောင်း မော်နင်က ဆိုသည်။

ထို့နောက် ရှီသည် ဒုတိယမြောက် နိုင်ငံတော်အဆင့် ခရီးစဉ်အဖြစ် တရုတ်နိုင်ငံအနောက်ဘက်ရှိ အိမ်နီးချင်း တာဂျစ်ကစ္စတန်သို့ သွားရောက်မည်ဖြစ်သည်။ ယင်းခရီးစဉ်၌ ရှီသည် နှစ်နိုင်ငံဆက်ဆံရေးတိုးတက်ဖြစ်ထွန်း စေမည့်အစီအမံသစ်များကို တာဂျစ်ကစ္စတန် သမ္မတအမ်မိုမာလီ ရာမွန်နှင့်အတူ ချမှတ်သွားမည်ဖြစ်ကြောင်း သိရသည်။

တရုတ်သည် ဗဟိုအာရှတွင် သံတမန်ရေး ကြိုးပမ်းမှုများကို အရှိန်မြှင့်လုပ်ဆောင်လျက်ရှိကာ ပြီးခဲ့သည့်မေလက တရုတ်တွင် ကျင်းပခဲ့သည့် ဗဟိုအာရှနိုင်ငံခေါင်းဆောင်များ တက်ရောက်ခဲ့သော ထိပ်သီးအစည်းအဝေးတစ်ခု၌ စီးပွားရေးဆိုင်ရာ ဆက်ဆံမှုများကို နက်နက်ရှိုင်းရှိုင်း ဖော်ဆောင်ရန် ရှီက တိုက်တွန်းခဲ့သည်။

ဗဟိုအာရှဒေသသည် တရုတ်၏အထင်ကရ စီမံကိန်းဖြစ်သော ရပ်ဝန်းနှင့်ပိုးလမ်းမအပြည်ပြည်ဆိုင်ရာ အခြေခံအဆောက်အအုံဖွံ့ဖြိုးတိုးတက်ရေး စီမံကိန်း၏ အလွန်အရေးပါသော ကွင်းဆက်တစ်ခုဖြစ်သည်။

Ref: AFP