ညောင်ဦးမြို့နယ် ချောင်းရှည်ကျေးရွာတွင် ရာအိမ်မှူးတစ်ဦး၊ ၎င်း၏ သမီးနှင့်သားဖြစ်သူ မြေစာရင်းဝန်ထမ်းတို့ သေနတ်ဖြင့်ပစ်သတ်ခံရကြောင်း မြန်မာနိုင်ငံရဲတပ်ဖွဲ့၏ သတင်းထုတ်ပြန်ချက်အရ သိရသည်။
ဇွန် ၂၅ ရက် နံနက် ၆ နာရီ ၁၀ မိနစ်တွင် ညောင်ဦးမြို့နယ် ချောင်းရှည်ကျေးရွာ၌ သေနတ်ဖြင့် ပစ်ခတ်ခံရ၍ အမျိုးသားနှစ်ဦးနှင့် အမျိုးသမီးတစ်ဦးတို့ သေဆုံးကြောင်းသတင်းအရ လုံခြုံရေးတပ်ဖွဲ့ဝင်များက သွားရောက် စစ်ဆေးခဲ့ရာ အဆိုပါကျေးရွာနေရာအိမ်မှူးဖြစ်သူ ဦးအောင်ဆန်းဦး (၅၂ နှစ်)သည် ဇနီးဖြစ်သူ ဒေါ်ခိုင်ခိုင်ဝင်း (၄၉ နှစ်)၊ သားဖြစ်သူ ညောင်ဦးမြို့နယ်မြေစာရင်းရုံးမှ မြေတိုင်းအဆင့်-၄ ကိုညီညီလင်း(၂၈ နှစ်)၊ သမီးဖြစ်သူ မခင်မြတ်မြတ်ဦး(၂၅ နှစ်)တို့နှင့်အတူ နေအိမ်၌ရှိနေစဉ် PDF ရှစ်ဦးက ဆိုင်ကယ်သုံးစီးဖြင့် ရောက်ရှိလာပြီး သေနတ်ဖြင့်ပစ်ခတ်ကာ ဆိုင်ကယ်နှစ်စီးအား ယူဆောင်သွားခဲ့ကြောင်း၊ ဦးအောင်ဆန်းဦး၊ ကိုညီညီလင်းနှင့် မခင်မြတ်မြတ်ဦးတို့တွင် ကျည်ထိမှန်ဒဏ်ရာများရရှိကာ သေဆုံးခဲ့ပြီး ဒေါ်ခိုင်ခိုင်ဝင်းမှာ ထွက်ပြေးလွတ်မြောက်ခဲ့ကြောင်း သိရသည်။
ထိုသို့ နိုင်ငံ့ဝန်ထမ်း၊ အုပ်ချုပ်ရေးပိုင်းဆိုင်ရာ တာဝန်ရှိသူနှင့် အရပ်သားတစ်ဦးတို့ကို ပစ်ခတ်သတ်ဖြတ်ခဲ့သူများအား အရေးယူနိုင်ရေးလုံခြုံရေးတပ်ဖွဲ့ဝင်များက ဆောင်ရွက်နေကြောင်းသိရသည်။
