ကချင်ပြည်နယ်၊ ဖားကန့်မြို့၊ လုံးခင်းကျေးရွာအုပ်စု၊ သာယာကုန်းမှော်ကျေးရွာ အနောက်ဘက်အခြမ်းရှိ ကျောက်ကမ်းပါးတွင် မြေစာပြိုကျရာမှ လက်ကျင်းတူးရေမဆေးကျောက်ရှာဖွေသူ အမျိုးသားတစ်ဦး သေဆုံးမှု ဇွန် ၁၃ ရက် ဖြစ်ပွားခဲ့ကြောင်း သိရသည်။
ဇွန်လ ၁၃ ရက် နံနက် ၉ နာရီခန့်က သာယာကုန်းကျေးရွာ အနောက်ဘက်အခြမ်းကျောက်ကမ်းပါးအား လက်ကျင်းတူးကျောက်ရှာဖွေနေစဉ် မြေစာပြိုကျပိမိရာမှ ကျင်းတူးနေသူ သေဆုံးခဲ့ခြင်းဖြစ်သည်။
" ပြိုတာက မြင့်တယ်။ပေနှစ်ရာကျော်မယ်။မများဘူး။ ဒဲ့ထိရင် လေးယောက်စလုံးမလွယ်ဘူး။အခုက တစ်ယောက်ဆုံးတယ်။ သုံးယောက်က ဒဏ်ရာပြင်းတယ်။ပွင်းလင်းရာသီတော့ စက်ကြီးဝင်တဲ့နေရာပဲ။ အခုက လိုင်းကြီးတွေနားလို့ လက်အဖွဲ့တွေဝင်တူးနေတာ"ဟု မျက်မြင်တွေ့ရှိသူက ဆိုသည်။
သေဆုံးသူဟာ အသက် ၃၀ အရွယ်ခန့်၊အမျိုးသားတစ်ဦးဖြစ်ပြီး၊ ၎င်းနဲ့ပါတ်သတ်တဲ့ ကိုယ်ရေးအချက်အလက်ကိုတော့ ကျင်းဦးဆောင်တူးသူ လောပန်းက မပြောလိုကြောင်း နီးစပ်သူများက ဆိုသည်။
"ကလေးမိဘတွေက မမုန်၊စပေါ့ဘက်နေကြတာ။အလောင်းက မိဘဆီပဲ သယ်သွားကြတယ်။ ကယ်ဆယ်ရေးတွေတောင် ဘာမှလုပ်ခိုင်းတာ မတွေဘူး"ဟု ဆိုသည်။
ဖားကန့်ဒေသသည် မိုးရာသီတွင် နှစ်စဉ် မြေပြိုသေဆုံးမှုများသည့် ဒေသတစ်ခုဖြစ်ပြီး ၂၀၁၂ခုနှစ် မှ ၂၀၂၁ ခုနှစ်အထိ နှစ်စဉ် လူတစ်ရာကျော် သေဆုံးနေခြင်းဖြစ်သည်။
