ချယ်လ်ဆီးအသင်းသည် လက်ရှိအသင်းပိုင်ရှင် တော့ဒ်ဘိုလီလက်ထက်တွင် ကစားသမားသစ်ခေါ်ယူမှုများအတွက် ငွေကြေးများစွာ သုံးစွဲ ထားသည့်အတွက် ပရီးမီးယားလိဂ်၏ ဘဏ္ဍာရေးစည်းမျဉ်းအရ အဲဗာတန်နှင့် နော်တင်ဟမ်ဖောရက်စ်တို့ထက် ပိုပြင်းထန်သည့် အမှတ်လျှော့ပြစ် ဒဏ်ကျခံရဖွယ်ရှိကြောင်း ဘဏ္ဍာရေးကျွမ်းကျင်သူ စတီဖန်ဘော်ဆန်က သုံးသပ်ခဲ့သည်။
ပရီးမီးယားလိဂ်အဖွဲ့ချုပ်သည် ကလပ်အသင်းများအား ငွေကြေးသုံးစွဲမှု ပရမ်းပတာပြုလုပ်ခြင်းမရှိရန် ထိန်းချုပ်ထားရာ (၃)ရာသီအတွင်း အရှုံးငွေ အများဆုံးပေါင် (၁၀၅)သန်းသာရှိရမည်ဟု ကန့်သတ်ထားသည်။
အဆိုပါကန့်သတ်ချက်ထက် ကျော်လွန်ပါက အရေးယူအပြစ်ပေးမှုနှင့် ရင်ဆိုင်ရမည်ဖြစ်ပြီး အဲဗာတန်နှင့် နော်တင်ဟမ်ဖောရက်စ်အသင်းတို့မှာ စည်းမျဉ်းနှင့် ကိုက်ညီခြင်းမရှိသည့်အတွက် အမှတ်လျှော့ပြစ်ဒဏ် ကျခံရခြင်းဖြစ်သည်။
ပရီးမီးယားလိဂ်အဖွဲ့ချုပ်သည် အဲဗာတန်အသင်းကို (၁၀)မှတ်လျှော့ပြစ်ဒဏ် ချမှတ်ခဲ့ပြီးမှ အယူခံအောင်မြင်ခဲ့သည့်အတွက် (၆)မှတ်လျှော့ပြစ်ဒဏ်အဖြစ် လျှော့ချပေးခဲ့ပြီး နော်တင်ဟမ်အသင်းကို (၄)မှတ်လျှော့ပြစ်ဒဏ် ချမှတ်ခဲ့ခြင်း ဖြစ်သည်။
ချယ်လ်ဆီးအသင်းသည် လက်ရှိအချိန်အထိ စုံစမ်းစစ်ဆေးမှုနှင့် ရင်ဆိုင်ရခြင်းမရှိသေးသော်လည်း နောက်ဆုံး (၃)ရာသီအတွင်း ၎င်းတို့၏ ဝင်ငွေထွက်ငွေ အသုံးစရိတ်မှာ များစွာအရှုံးပြနေသည်။
ထို့ကြောင့် လာမည့်နွေရာသီ၌ ဟန်ချက်ညီအောင် ဖြေရှင်းနိုင်ခြင်းမရှိပါက အရှုံးငွေပမာဏအရ အဲဗာတန်နှင့် နော်တင်ဟမ်တို့ထက် ပိုမိုအမှတ် လျှော့ခံရနိုင်ခြင်းဖြစ်သည်။
