လက်ရှိဘဏ္ဍာနှစ်တွင် မြန်မာနိုင်ငံမှ ချုပ်ပြီးအထည်များကို နိုင်ငံပေါင်း ၈၀ ကျော်သို့ တင်ပို့လျက်ရှိပြီး ဂျပန်၊ပိုလန်၊ စပိန်၊ဂျာမနီ၊ကိုရီးယား၊ယူကေ၊နယ်သာလန်၊ အီတလီ၊ USA၊ ပြင်သစ်၊ ဒိန်းမတ်၊ဘယ်လ်ဂျီယံတို့မှာ အဓိကတင်ပို့နေသည့်စျေးကွက်များဖြစ်ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီးဦး မင်းမင်းက ဒီဇင်ဘာ ၈ ရက်တွင် ပြောကြားခဲ့သည်။

မြန်မာနိုင်ငံအထည်ချုပ်လုပ်ငန်းရှင်များအသင်း(MGMA) နှင့် တရုတ်အထည်ချုပ်လုပ်ငန်းရှင်များအသင်း(CTGA)တို့ ပူးပေါင်းကာ Zhejiang International Trade Exhibition Myanmar ကို ၂၀၂၃ ခု နှစ် ဒီဇင်ဘာ ၈၊ ၉ နှင့် ၁၀ ရက်တွင်  ရန်ကုန်မြို့ရှိ YCC , Yangon Convention Center(Inya Lake Compound) ၌ ကျင်းပလျက်ရှိရာ ဒီဇင်ဘာ ၈ ရက်က ကျင်းပခဲ့သည့် ပြပွဲဖွင့်ပွဲ အခမ်းအနားတွင် ဒုတိယဝန်ကြီး ဦးမင်းမင်းက အထက်ပါအတိုင်း ပြောကြားခဲ့ခြင်းဖြစ်သည်။

“မြန်မာနိုင်ငံအနေနဲ့ အထည်ချုပ်ကဏ္ဍမှ ပြည်ပတင်ပို့မှုမှာ CMP စနစ်နဲ့ ဆောင်ရွက်တဲ့လုပ်ငန်းဟာဆိုရင် အများဆုံး ဖြစ်ပါတယ်။ ပြီးခဲ့တဲ့ ဘဏ္ဍာဖြစ်တဲ့ ၂၀၂၂ -၂၀၂၃ ဘဏ္ဍာနှစ်မှာ အထည်ချုပ်ကနေ ဒေါ်လာ  ၅ ဒသမ ၃ ဘီလျံတင်ပို့နိုင်ခဲ့ပါတယ်။ ချုပ်ပြီးအထည်တွေကို နိုင်ငံပေါင်း ၁၀၀ ကျော်ကို တင်ပို့နိုင်ခဲ့ပါတယ်။ လက်ရှိ  ဘဏ္ဍာနှစ်မှာလည်း နိုင်ငံပေါင်း ၈၀ ကျော်ကို အဓိကထားပြီးတင်ပို့လျက်ရှိပါတယ်။ ဂျပန်၊ပိုလန်၊စပိန်၊ဂျာမနီ၊ ကိုရီးယား၊ ယူကေ၊နယ်သာလန်၊ အီတလီ၊USA ၊ ပြင်သစ်၊ ဒိန်းမတ်၊ ဘယ်လ်ဂျီယံတို့ဟာ အဓိကတင်ပို့ တဲ့ စျေးကွက်များဖြစ်ပါတယ်”ဟု စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီးဦးမင်းမင်းက ပြောကြားသည်။

၂၀၂၃-၂၀၂၄ဘဏ္ဍာနှစ် ပထမသုံးလပတ်အတွင်း ပြည်ပသို့ ချုပ်ပြီးအထည်တင်ပို့မှုမှ ဝင်ငွေဒေါ်လာ ၉၉၄ ဒသမ ၁ သန်း ရရှိခဲ့ကြောင်း ဗဟိုစာရင်းအင်းအဖွဲ့မှ ထုတ်ပြန်ချက်အရ သိရသည်။

၂၀၂၂-၂၃ ဘဏ္ဍာနှစ်အတွင်း ပြည်ပသို့ ချုပ်ပြီးအထည်တင်ပို့မှုမှ ဝင်ငွေဒေါ်လာ ၅၃၈၈ ဒသမ ၈ သန်းရရှိပြီး ဒုတိယ သုံးလပတ်အတွင်းက ဒေါ်လာ ၁၈၄၁ သန်းကျော်ဖြင့် အများဆုံးတင်ပို့ခဲ့ကြောင်း စီမံကိန်းနှင့် ဘဏ္ဍာရေးဝန်ကြီးဌာန၊ဗဟိုစာရင်းအင်းအဖွဲ့မှ ထုတ်ပြန်ချက်အရ သိရသည်။

၂၀၂၂-၂၀၂၃ ဘဏ္ဍာနှစ်အတွင်း ပြည်ပသို့ချုပ်ပြီးအထည်တင်ပို့မှုအနေဖြင့် ပထမသုံးလပတ်အတွင်း ဒေါ်လာ ၁၃၆၃ ဒသမ ၉သန်း၊ ဒုတိယသုံးလပတ်အတွင်း ဒေါ်လာ ၁၈၄၁ ဒသမ ၁သန်း၊ တတိယသုံးလပတ်အတွင်း ဒေါ်လာ ၁၁၃၆ ဒသမ ၄ သန်း၊ စတုတ္ထသုံးလပတ်အတွင်း ဒေါ်လာ ၁၀၄၇ ဒသမ ၄ ဖြင့် စုစုပေါင်း ဒေါ်လာ ၅၃၈၈ ဒသမ ၈ သန်း ရရှိခဲ့ခြင်းဖြစ်သည်။

၂၀၂၂-၂၀၂၃ ဘဏ္ဍာနှစ်သည့် ဧပြီမှ မတ်လအထိဖြစ်သည်။၂၀၂၂-၂၀၂၃ဘဏ္ဍာ နှစ် ပထမသုံးလပတ်ဖြစ်သည့် ၂၀၂၂ ခုနှစ် ဧပြီမှဇွန်လအတွင်း ပြည်ပသို့ချုပ်ပြီးအထည် တင်ပို့မှုမှဝင်ငွေ ဒေါ်လာ ၁၃၆၃ ဒသမ၉ သန်းရရှိခဲ့သည်။ ဒုတိယသုံးလပတ်အတွင်း ဒေါ်လာ ၁၈၄၁ ဒသမ ၁ သန်း၊ တတိယသုံး လပတ်အတွင်း ဒေါ်လာ ၁၁၃၆ ဒသမ ၄ သန်းရရှိခဲ့ခြင်းဖြစ်သည်။

၂၀၂၂-၂၀၂၃ ဘဏ္ဍာနှစ် ဧပြီမှ ဒီဇင်ဘာလအထိကာလအတွင်း ပြည်ပသို့ချုပ်ပြီး အထည်တင်ပို့မှုမှ ဝင်ငွေဒေါ်လာ ၄၃၄၁ ဒသမ ၄ သန်းရရှိထားသည်။

၂၀၂၁-၂၀၂၂ ဘဏ္ဍာနှစ် အောက်တိုဘာမှ မတ်လအထိ (Mini Budget) ခြောက်လအတွင်း ပြည်ပသို့ ချုပ်ပြီးအထည် တင်ပို့မှုမှ ဒေါ်လာ ၂၂၂၉ သန်းကျော် ရရှိခဲ့ပြီး လအလိုက်တင်ပို့မှုအနေဖြင့် ဒီဇင်ဘာလတွင် အများဆုံးတင်ပို့ခဲ့ခြင်းဖြစ်ကြောင်း စီမံကိန်းနှင့်ဘဏ္ဍာရေးဝန်ကြီးဌာနမှ သိရသည်။

၂၀၂၁-၂၀၂၂ ဘဏ္ဍာနှစ် အောက်တို ဘာမှ မတ်လအထိ (Mini Budget) ခြောက်လအတွင်း လအလိုက် ပြည်ပသို့ချုပ်ပြီးအထည်တင်ပို့မှုအနေဖြင့် အောက်တိုဘာတွင် ဒေါ်လာ ၃၀၂ ဒသမ ၉ သန်း၊ နို ဝင်ဘာတွင် ၃၃၇ ဒသမ ၉ သန်း၊ ဒီဇင်ဘာတွင်၄၁၄ ဒသမ ၃ သန်း၊ ဇန်နဝါရီတွင် ၄၁၀ ဒသမ ၃ သန်း၊ ဖေဖော်ဝါရီတွင် ၃၆၀ ဒသမ ၆ သန်း၊ မတ်လတွင် ဒေါ်လာ၄၀၃ ဒသမ ၈ သန်းဖြင့် စုစုပေါင်းဒေါ်လာ ၂၂၂၉ ဒသမ  ၈ သန်းရရှိခဲ့ကြောင်း သိရသည်။