နိုဝင်ဘာ ၂၈ ရက်ညပိုင်းက ဂျပန်နိုင်ငံရှိ Tokyo Dome  မိုးလုံလေလုံအားကစားရုံတွင်ကျင်းပသည့်  2023 MA MA Awards  တေးဂီတဆုပေးပွဲတွင် BTS က Worldwide Icon Of The Year ဆုကို ဆွတ်ခူးသွားပြီး ထို ဆုကို ခြောက်နှစ်ဆက်တိုက်ရယူလိုက်ခြင်း ဖြစ်သည်။

ထို့ပြင် Worldwide  Fans Choice ဆုကိုလည်း BTS က ဆွတ်ခူးလိုက်သေးသည်။ ထိုဆုကို BTS ၊ Enhypen ၊ NCT Dream၊ Seventeen ၊ Stray Kids ၊TXT နှင့်Twice အပါအဝင် အဖွဲ့ ၁၀ ဖွဲ့က ရခဲ့သည်။ ထိုဆုကို ရသည့် မိန်းကလေးကေပေါ့အဖွဲ့က Twice  တစ်ဖွဲ့တည်းဖြစ်ပြီး ငါးကြိမ်မြောက်ဆွတ်ခူးမှု ဖြစ်သည်။

ဆုပေးပွဲကို BTS အဖွဲ့ မတက်ရောက်ခဲ့ဘဲ အသက်အငယ်ဆုံးအဖွဲ့ဝင်ဂျန်ကွတ်က  ဗီဒီယိုဖြင့် ကျေးဇူးတင်စကား ပြောခဲ့သည်။ “ ဒီနေ့ကျွန်တော်တို့အားလုံး ဒီမှာမရှိကြပေမဲ့  မကြာခင်ပြန်ဆုံကြပါမယ်။အဲဒီမတိုင်ခင်တော့ ကျန်းမာအောင်နေကြပါ။ အချိန်တိုင်း ပျော်အောင်နေပါ။ကျွန်တော်တို့ရဲ့ ARMY တွေကို ဘယ်လောက်အလေးထားတယ်ဆိုတာ သိကြတယ်မလား။ပိုကောင်းတဲ့ပုံစံနဲ့ နောက်တစ်ကြိမ်ပြန်ဆုံဖို့ စောင့်နေပါတယ်”ဟု ဂျန်ကွတ်ကပြောသည်။

ယခုနှစ် MA MA Awards ဆုပေးပွဲကို  နိုဝင်ဘာ ၂၈-၂၉ ရက် နှစ်ရက်ကျင်းပပြီး ပထမနေ့တွင်  TXT၊ Kepler နှင့်  ဂျန်ဆိုမီတို့၏ တင်ဆက်မှုများကို မြင်ရပြီး ဂျန်ဆိုမီက  အခမ်းအနားမှူးအဖြစ် ဆောင်ရွက်သည်။

ဆုပေးပွဲ ဒုတိယနေ့ နိုဝင်ဘာ ၂၉ ရက် ညတွင်မူ တောင်ကိုရီးယားသရုပ်ဆောင်ပတ် ဘိုဂမ်က အခမ်းအနားမှူးဖြစ်ပြီး Seventeen ၊ Ateez ၊ LE SSERAFIM နှင့် (G)I-DLE တို့က တင်ဆက်ခဲ့ကြသည်။