ကတ္တရာလမ်းမထက်က တံလျှပ်တွေ တငွေ့ငွေ့နဲ့နွေဦး၏ သရုပ်သကန်သည် အလျှံတငြီးငြီး ရှိနေ၏။ “ကဆုန်နယုန်စွေ့စွေ့ခုန်”ဆိုသည့်အတိုင်း အခုလို ရာသီတွင် အပူပိုင်းဒေသများသို့ ခရီးသွားရလာရသည်မှာ အခြားရာသီတွေထက် မောပန်းနွမ်းနယ်မှုဒဏ်ကို နှစ်ဆပိုမိုခံကြရသည်။ ခံစားရစေပါသည်။ ထိုကဲ့သို့ နွေအပူဒဏ်ကြား၌ ယာဉ်ကြီးယာဉ်ငယ် အသွယ်သွယ်တို့ ဥဒဟိုဖြတ်သန်းသွားလာမှု မပြတ်ရှိနေသည့် မန္တလေး-မုံရွာ ကားလမ်းနံဘေးညောင်ပင်ဝန်းရွာရှိ ခရီးတစ်ထောက်နားရာ စားသောက်ဆိုင်တန်းများတွင် ခရီးသည်၊ ဈေးသည်တို့ဖြင့် နေ့ညမပြတ် ရှိလှသည်။
ထိုထိုသော ညောင်ပင်ဝန်းတွင် ဆိုင်ကြီး ကန္နားကြီးများ၊ ခေါင်းရွက်ဈေးသည်များမှ ရောင်းချသော စာကလေးကြော်မှာ နာမည်ကြီးလှပြီး ရောက်ဖူးသွားဖူးသူတိုင်း အမှတ်ရကြပါလိမ့်မည်။ သို့သော်လည်း ထိုထိုသော ညောင်ပင်ဝန်းရွာ၏ နာမည်ကျော်သည့် စာကလေးကြော်သည် ဟိုမှာဘက် ညောင်ပင်ဝန်းတွင်ဖြစ်ပြီး ဒီမှာဘက် ညောင်ပင်ဝန်းတွင်တော့ စာကလေးကြော်ရောင်းချသည့် ခေါင်းရွက်ဈေးသည်တို့ကို မြင်တွေ့ရဖို့ ခဲယဉ်းလာသည်။ ခေါင်းရွက်ဈေးသည်တို့၏ ရောင်းချသည့် စားဖွယ်အမယ်စုံတို့ထဲ၌ စာကလေးကြော်ကို မမြင်တွေ့ရတော့ပေ။
ယင်းသို့ဒေသတစ်ခု၏ နာမည်ကျော် စားစရာတစ်မျိုး ပျောက်ကွယ်လုနီးပါး ဖြစ်လာခြင်းမှာ ညောင်ပင်ဝန်းရွာဝန်းကျင်ရှိ နှုံးတွင်း၊ ထီးဆောင်း၊ ပျော့ရွာ၊ မြင်းမူ စသည့် ရွာစဉ်တစ်လျှောက်၌ သစ်ကြီးဝါးကြီး နည်းပါးလာခြင်း၊ လယ်ယာလုပ်ငန်းခွင်အတွင်း ရာသီမှန် စိုက်ပျိုးရိတ်သိမ်းချွေလှေ့နိုင်ခြင်း မရှိတော့သောကြောင့် စာကလေးမျိုးစိတ်များ ရှင်သန်ကျက်စားပေါက်ဖွားမှု လျော့လာခြင်းကြောင့်ဖြစ်သည်ဟု ညောင်ပင်ဝန်းရွာခံ တောင်သူကြီးတစ်ဦးက သုံးသပ်ပြရာ ကတ္တရာလမ်းမထက်က တံလျှပ်ထနေသည့် အပူရှိန်က ပိုမိုပူပြင်းလာသည်ဟု ခံစားလိုက်ရပြီး ရာသီဥတုသပ္ပာယ မမျှတတော့ခြင်းကြောင့် ကျေးငှက်သာရကာတို့ အသိုက်အမြုံများ ဤဒေသမှ စွန့်ခွာသွားခြင်းလော။ လူတို့၏ ပယောဂကြောင့် ဤဒေသဝန်းကျင်တွင် ကျေးငှက်သာရကာတို့မျိုးသုဉ်းပျောက်ကွယ်လုနီးဖြစ်လာခြင်းလော. . . ဆိုသည့် အတွေးများက ေ၀ဝါးလို့နေတော့သည်။
တကယ်တော့ ရာနှင့်ချီရှိသော စာကလေးငှက် မျိုးစိတ်မျိုးကွဲပေါင်း အသေးစိတ်ကို ဆရာဦးမျိုးသူရက ညောင်ပင်ဝန်းသို့ တစ်ခေါက်ဆိုသည့် ဆောင်းပါးဖြင့် ရာချီသော စာကလေးငှက်မျိုးစိတ်တို့ မျိုးသုဉ်းပျောက်ကွယ်လာသည်ကို သတိချပ်မိစေရန် ရေးသားထားသည်ကို အမှတ်ရမိလိုက်သည်။
“စာကလေးအသိုက်လိုက် ကျက်စားတာမျိုး မရှိတော့ဘူး။ စပါးခင်းတွေလည်း အရင်လိုမရှိတော့ စာကလေးမျိုးစိတ်တွေလည်း အသိုက်အမြုံ နေရာပြောင်း ကျက်စားကုန်တယ်လို့ထင်တယ်။ မျိုးသုဉ်းပျောက်ကွယ်တာတော့ မဖြစ်နိုင်ပါဘူး”ဟူသော တောင်သူကြီး၏စကားကြောင့် “လယ်ကွင်းပြောင်ပြောင် တောခေါင်ခေါင်” ဆိုသကဲ့သို့ သတ်မှတ်ရမလိုပင်။
သည်လိုနှင့် မန္တလေး-စစ်ကိုင်း-မုံရွာ၊ ပခုက္ကူ၊ ပေါက်၊ မကွေး စသည့်ဒေသများသို့သွားရာ လမ်းခုလတ်တစ်ထောက်နားရာ ညောင်ပင်ဝန်းတွင် ဒေသခံတို့၏ စားသောက်ဖွယ်ရောင်းချမှု ပုံသဏ္ဌာန် နှင့် ပုံပြင် တစ်ခေတ်ဆန်းလာသည်။ နာမည်ကြီးလာ၏။ သည်မှာဘက် ညောင်ပင်ဝန်းပုံပြင်မှာ ရှေးဒဏ္ဍာရီ လာပုံပြင်တော့ မဟုတ်။ ကြက်သားရေကြိုချက်၊ ပဲပုတ်ချက်၊ ငရုတ်သီး အတောင့်ကြော်၊ လတ်ဆက်သည့် အတို့အမြှုပ်စသော ဟင်းအမယ်စုံဖြင့် မြိန်ရည်ရှက်ရည်စားနိုင်သော တစ်ခါပြင် ငါးရာကျပ်တန် တန်ဖိုးနည်း ညောင်ပင်ဝန်းပုံပြင် ထမင်းဆိုင်လေးတွေ ဖြစ်လာတော့၏။
“ဒီမှာဈေးရောင်းလာတာ အမေတို့ တစ်သက်ရှိပြီ။ အခုခေတ်နောက်ပိုင်း ခရီးတစ်ထောက်နားတဲ့ ဧည့်သည်တွေက ဆိုင်ကြီး ကန္နားကြီးတွေမှာ သိပ်ပြီး စားလေ့စားထ နည်းလာပြီး ခေါင်းရွက်ဈေးသည်တွေ၊ ပေါ့ပေါ့ပါးပါးစားလို့ရတဲ့ ထမင်းပုံပြင်ဆိုင်လေးတွေမှာပဲ စားကြတော့တယ်။ အဲလိုအခြေအနေမှာ ဆိုင်ကြီးကန္နားကြီးတွေကနေ ရပ်ဆွေရပ်မျိုး၊ ဆွေမကင်း မျိုးမကင်းတွေကို အရင်းအနှီးထုတ်ပေးပြီး အကျိုးတူ ကျွန်းကိုင်းမှီကိုင်း ကျွန်းမှီဆိုသလို ရောင်းချတာမျိုးပဲ။ ခေါင်းရွက်ဈေးသည်က ရာနဲ့ ချီရှိပြီး ဈေးကွက်ဝေစုမျှသွားတာပေါ့။ အခုဆိုရင် ညောင်ပင်ဝန်းက ကြက်သားရေကြိုချက်နဲ့ ပုံပြင်ပေးတဲ့ ဆိုင်တွေကို အုန်းတော၊ဆားတောင်၊ရွာသစ်ကြီး၊ စစ်ကိုင်း စတဲ့နေရာတွေကတောင် တကူးတကလာပြီး စားကြတာ”ဟု ညောင်ပင်ဝန်းရှိ နုယဉ်စားသောက်ဆိုင်ပိုင်ရှင်က ပြောင်းလဲလာသည့် အခြေအနေကို ပြောပြနေချိန်တွင် ပြင်ပနေရောင်သည် ညနေစောင်းလာပြီဖြစ်ပေမယ့် အပူရှိန်ကတော့ မလျှော့သေး။ယာဉ်ကြီးယာဉ်ငယ်နှင့် ခရီးသွားဧည့်သည်တို့လည်း ညောင်ပင်ဝန်းဈေးဆိုင်တန်းများတွင် ပျားပန်းခတ်ရှိနေဆဲ။ တစ်ချို့သော သစ်ပင်ကြီးများထက်တွင် အိပ်တန်းတက် ငှက်ကလေးများနဲ့ကျေးငှက်သံသာများ လွှင့်ပျံ့လာမလား နား စွင့်မိသော်လည်း အချည်းအနှီးသာပင်။ သည်လိုနှင့် ပတ်ဝန်းကျင်တစ်ခုလုံးမှာ မှောင်ရိပ်သန်းလာခဲ့ပြီ နီကျင်ကျင် မီးအလင်းတစ်ချို့ကြားက ခရီးဆက်မည့်သူတို့ ပြန်လည်ထွက်ခွာသူထွက် ခရီးတစ်ထောက်နားမည့် ယာဉ်အချို့လည်း ဝင်လာမစဲနှင့် ညောင်ပင်ဝန်းတွင် ခရီးတထောက်နားမြင်ကွင်းတွေကို လည်ပြန်ကြည့်ရင်း အတွေးဆတို့ဖြင့် ခရီးဆက်ခဲ့ဖြစ်တော့သည်။
