ဂျိမ်းစ်ကင်မရွန်း၏ Avatar နောက် ဆက်တွဲရုပ်ရှင်ဖြစ်သည့် The Way of Water သည် ၁၄ ရက် အတွင်းကမ္ဘာလုံးဆိုင်ရာ လက်မှတ်ရောင်းအား ဒေါ်လာတစ်ဘီလျံ အထိရောက်ရှိခဲ့ကာ ယခုနှစ်အတွင်း ယင်းစံချိန်ကို အမြန်ဆုံးရောက်ရှိခဲ့သည့် ရုပ်ရှင်ဖြစ်လာခဲ့သည်ဟု Variety သတင်းတွင် ဒီဇင်ဘာ ၂၈ ရက်၌ ဖော်ပြထားသည်။

ယင်းသည် ၂၀၂၂ ခုနှစ်တွင် Box Office သမိုင်းမှတ်တိုင်ကို ချိုးခဲ့သည့် ရုပ်ရှင်သုံးကားတွင် တစ်ကားအပါအဝင်ဖြစ်ခဲ့ပြီး Top: Gun Maverick က ယင်းစံချိန်ကို ၃၁ ရက်အတွင်း ရောက်ရှိခဲ့ကာ Jurassic  World Dominion က ယင်းစံချိန်ကို ရောက်ရှိရန် လေးလကျော်ကြာခဲ့သည်။

၂၀၁၉ ခုနှစ်က ထွက်ရှိခဲ့သည့် ရုပ်ရှင် ကိုးကားသည် ယင်းစံချိန်ကို ရောက်ရှိခဲ့သည်ဟုလည်း Variety တွင် ဖော်ပြထားသည်။

၂၀၂၁ ခုနှစ်က ထွက်ရှိခဲ့သည့် Spider Man: No Way Home သည် ယင်းစံချိန်ကို ရောက်ရှိရန် ၁၂ ရက်ကြာမြင့်ခဲ့သည့်အတွက် The Way of Water ရုပ်ရှင်သည် ယင်းစံချိန်ကို ရောက်ရှိရန် Spider Man ထက် ရက် အနည်းငယ် ပိုသွားခဲ့သည်။

၂၀၀၉ ခုနှစ်တွင် မူလ Avatar ရုပ်ရှင် ထွက်ရှိလာခဲ့ပြီး ကမ္ဘာတစ်ဝန်းတွင် ဝင်ငွေ ဒေါ်လာ၂.၉၇ ဘီလျံဖြင့် ဝင်ငွေအမြင့်ဆုံးရရှိခဲ့ပြီးနောက် ၁၃ နှစ်အကြာတွင် Avatar: The Way of Water ထွက်ရှိလာခဲ့ခြင်းဖြစ်သည်။ သရုပ်ဆောင် ဆမ်ဝေါ်သင်တန်နှင့် ဇိုးဆယ်ဒါနာတို့သည် ဂျိတ်ဆူလီနှင့် နေတီရီ ဇာတ်ကောင်များအဖြစ် ပြန်လည်ပါဝင်လာသည်ကို မြင်တွေ့ရမည်ဖြစ်သည်။