လူသေဆုံးမှုဖြစ်ပွားခဲ့သည့် Astroworld တေးဂီတဖျော်ဖြေပွဲတွင် ပါဝင်ပတ်သက်သူ ၁၂၅ ဦးကျော်က ဟစ်ဟော့ပ်အဆိုတော် Travis Scott နှင့်အခြားပွဲစီစဉ်သူများကို ဒေါ်လာသန်း ၇၅၀ ပေးဆောင်ရန် တရားစွဲဆိုခဲ့သည်။

ယင်းဖျော်ဖြေပွဲတွင် သေဆုံးခဲ့သူ ၁၀ ဦး၌ ပါဝင်သည့်အသက် ၂၁ နှစ်အရွယ် Axel Acosta ၏ မိသားစုက အမေရိကန်တွင် ယင်းတရားစွဲဆိုမှု၌ ပူးပေါင်းပါဝင်ခဲ့သည်။

Scott နှင့် ဧည့်သည်အဆိုတော် Drake တို့သည် လူအုပ်ကြီးကိုုဖြတ်၍ အသက်မဲ့နေသည့် အလောင်းများကို စတိတ်စင်ပေါ်မှာ တွေ့မြင်နေသော်လည်း ဖျော်ဖြေမှုကိုရပ်တန့်ခဲ့ခြင်းမရှိဘဲ ဆက်လက်ဖျော်ဖြေ တင်ဆက်ခဲ့သည်။ Scott ကမူ သူစင်ပေါ်မှ မဆင်းခင်အချိန်အထိ ယင်းဖြစ်စဉ်ကို သတိထားမိခဲ့ခြင်းမရှိကြောင်း ပြောကြားခဲ့သည်။

နိုဝင်ဘာ ၅ ရက်က တက္ကဆက်ပြည်နယ် ဟောက်စ်တန်မြို့တွင် ပြုလုပ်သည့် Astroworld ဖျော်ဖြေပွဲ၌ ဖြစ်ပွားခဲ့သည့် ယင်းဖြစ်စဉ်အတွက် စိတ်မကောင်းဖြစ်မိကြောင်း၊ နစ်နာခဲ့သည့်မိသားစုတိုင်းကို ကူညီထောက်ပံ့သွားမည်ဖြစ်ကြောင်း Scott က ကတိပြုပြောကြားခဲ့သည်။

Drake ကလည်း သေဆုံးခဲ့သူများ၏ ကျန်ရစ်သူ မိသားစုများ၊ သူငယ်ချင်းများနှင့် ထပ်တူဝမ်းနည်းမိကြောင်း ပြောကြားခဲ့သည်။

ယခင်ကလည်း အသက်ရှင်ခဲ့သူများနှင့် သေဆုံးခဲ့သူများ၏ ကျန်ရစ်သူမိသားစုဝင်များက ဒါဇင်နှင့်ချီသည့် တရားစွဲဆိုမှုများ လုပ်ဆောင်ထားပြီး ဖြစ်သည်။