ဂေါ့ဖ်လောက၏ မေဂျာပြိုင်ပွဲကြီးတစ်ပွဲဖြစ်သည့် ၂၀၂၁ US Open ဂေါ့ဖ်ပြိုင်ပွဲတွင် စပိန်ကစားသမား ဂျွန်ရမ်က နောက်ဆုံးကျင်း (၂)ကျင်းတွင် အံ့အားသင့်ဖွယ် Birdie နှစ်လုံးရိုက်ပြီး အနိုင်ရဗိုလ်စွဲသွားခဲ့ကြောင်း သိရှိရသည်။
ဂျွန်ရမ်သည် ကျင်းနံပါတ် (၁၇) နှင့် ကျင်းနံပါတ် (၁၈) တို့တွင် Birdie နှစ်ကျင်းဆက်ရရှိခဲ့သဖြင့် တောင်အာဖရိကကစားသမား လူးဝစ်အော့စ်သူဇန်ကို (၁) ချက်အသာ (-၆)ချက်ဖြင့် အနိုင်ရဗိုလ်စွဲခဲ့ခြင်းဖြစ်ပြီး၊ စပိန်ကစားသမားများထဲတွင် US Open အောင်မြင်မှုရသည့် စတုတ္ထမြောက်ကစားသမားဖြစ်လာခဲ့သည်။
ဂျွန်ရမ်သည် တတိယနေ့အပြီးတွင် ရက်ဆဲလ်ဟန်လေ၊ မက်ကင်ဇီးဟုချ်၊ အော့စ်သူဇန်၊ ဒီချမ်ဘူ၊ မက်အီရွိုင်းတို့၏နောက် အဆင့် (၆)နေရာတွင်သာ ရပ်တည်နိုင်ခဲ့သော်လည်း နောက်ဆုံးနေ့တွင် အဖွင့် (၂)ကျင်းဆက်တိုက် Birdie ယူခဲ့ပြီးနောက် ဗိုလ်စွဲရန်မျှော်လင့်နိုင်သည့် အခြေအနေကို ရောက်ရှိလာခဲ့သည်။
သို့ရာတွင် ကျင်းနံပါတ် (၄)တွင် Boogey ရိုက်ခဲ့သဖြင့် (-၃)ဖြင့် ဆက်ကစားခဲ့ရပြီး ကျင်းနံပါတ် (၅)မှ စတင်ကာ ကျင်းနံပါတ် (၁၆) အထိ Boogey မရှိအောင် ကစားနိုင်ခဲ့သည်။
သူသည် ကျင်းနံပါတ် (၉)တွင် Birdie တစ်ကြိမ်ရခဲ့သဖြင့် ပထမ (၉)ကျင်းအပြီး (-၂)ချက်၊ (၄)ရက်ပေါင်းအနေဖြင့် (-၄) ချက်ဖြင့် ရပ်တည်နိုင်ခဲ့သည်။
ဒုတိယ (၉)ကျင်းတွင်လည်း ဗိုလ်စွဲရန်အပြိုင်ဖြစ်နေသည့် ကစားသမားအားလုံးထဲတွင် Boogey free ရိုက်နိုင်သည့် တစ်ဦးတည်းသော ကစားသမား ဖြစ်ခဲ့သည့်အပြင် နောက်ဆုံးနှစ်ကျင်းဆက် Birdie ရခဲ့သဖြင့် စုစုပေါင်း (-၆)ချက်ဖြင့် ဗိုလ်စွဲခဲ့ခြင်းဖြစ်ကြောင်းလည်း သိရှိရသည်။
သူသည် ကျင်းနံပါတ် (၁၇)တွင် ဒုတိယမြောက်ရိုက်ချက်ကို ကျင်းနှင့် (၂၅)ပေအကွာအထိ ကပ်နိုင်ခဲ့ပြီး ဝင်အောင် ကျင်းစိမ်နိုင်ခဲ့သဖြင့် (-၅)ချက် ဖြစ်ခဲ့သည်။
ယင်းနောက် Par 5 သတ်မှတ်ထားသည့် ကျင်းနံပါတ် (၁၈)၌ တီခုံရိုက်ချက်တွင် အကောင်းဆုံးနေရာကို ရောက်အောင် ရိုက်နိုင်ခဲ့သော်လည်း ဒုတိယရိုက်ချက်သည် ကျင်းအနီးရှိ သဲကျင်းထဲသို့ ရောက်ရှိသွားခဲ့သည်။
သဲကျင်းထဲမှ ကျင်းစိမ်မြက်ခင်း (Green) ပေါ်သို့ တင်ရာတွင် (၁၈)ပေအကွာအထိ ရောက်ရှိသွားခဲ့သော်လည်း Line အရွေးမှန်ခဲ့သဖြင့် Birdie ရရှိရန် အခွင့်အလမ်းသာခဲ့ပြီး စတုတ္ထမြောက်ကျင်းစိမ်ရိုက်ချက်ကို ဝင်အောင်သွင်းနိုင်ခဲ့သဖြင့် (-၆)ချက်ဖြင့် ပြီးဆုံးခဲ့ခြင်းလည်းဖြစ်သည်။
သူသည် ၁၉၈၂ ခုနှစ်က တွမ်ဝတ်ဆန်ဗိုလ်စွဲခဲ့ပြီးသည့်နောက်ပိုင်း နောက်ဆုံး (၂)ကျင်းဆက် Birdie ရရှိသည့် ပထမဆုံး ချန်ပီယံကစားသမားလည်းဖြစ်ခဲ့သည်။
ဂျွန်ရမ်သည် Memorial Tournament တွင် (၃)ရက်အပြီး၌ (-၆)ချက်ဖြင့် ဦးဆောင်နေခဲ့ပြီးမှ ကိုဗစ်ကူးစက်ခံထားရကြောင်း တွေ့ရှိရသဖြင့် နောက်ဆုံးနေ့ပွဲစဉ်ကို ဆက်ကစားခွင့်မရှိဘဲ နုတ်ထွက်ခဲ့ရသူဖြစ်ပြီး ယင်းနှင့်ပတ်သက်၍ ဂျွန်ရမ်က ''ကျွန်တော်က ကံတရားကို အရမ်းယုံကြည်သူတစ်ဦးဖြစ်ပြီး ပြီးခဲ့တဲ့လအတွင်းက ဖြစ်ခဲ့တဲ့ အဖြစ်အပျက်ကြီးရဲ့နောက်မှာ ကျွန်တော့်အတွက် တကယ်ထူးခြားကောင်းမွန်တဲ့အရာတစ်ခုခု ပြန်ရလာလိမ့်မယ်လို့ ယုံကြည်ခဲ့ပါတယ်''ဟု ဆိုခဲ့သည်။
သူသည် US Open ချန်ပီယံဆုအတွက် ဆုကြေးဒေါ်လာ (၂၂၅၀၀၀၀) ကို ဆွတ်ခူးခဲ့သည်။
