မန်ယူကွင်းလယ်ကစားသမား ပေါ့ဘာနှင့် ဒေါ့မွန်တိုက်စစ်မှူး ဟော်လန်းတို့၏ အေးဂျင့်အဖြစ် ဆောင်ရွက်နေသော ရိုင်အိုလာက ၎င်း၏ကစားသမားနှစ်ဦးစလုံး ယခုနွေရာသီတွင် အသင်းသစ်ရှာဖွေမည်မဟုတ်ဘဲ လက်ရှိအသင်းများတွင်သာဆက်ရှိမည်ဟု အတည်ပြု ပြောကြားခဲ့သည်။ ပေါ့ဘာနှင့် ဟော်လန်းတို့ နှစ်ဦးစလုံးမှာ ရီးယဲလ်အသင်းခေါ်ယူရန် ပစ်မှတ်ထားနေသူများဖြစ်သလို၊ ရိုင်အိုလာကလည်း အပြောင်းအရွှေ့ဖြစ်မြောက်အောင် ကြိုးစားပေးနေကြောင်း သတင်းထွက်ခဲ့ဖူးသည်။ မန်ယူအသင်းတွင် ပေါ့ဘာ မတည်မငြိမ်ဖြစ်ခဲ့စဉ်က ရိုင်အိုလာ၏ သွေးထိုးမှုကြောင့်ဖြစ်ကြောင်း ဝေဖန်ပြစ်တင်မှုများလည်း ရှိခဲ့သည်။ ထို့ပြင် ရိုင်အိုလာက ယခုနွေရာသီတွင် ရီးယဲလ် အသင်းထံ ထိပ်တန်းကစားသမားတစ်ဦး ပို့ဆောင်ပေးရန် စီစဉ်နေကြောင်းလည်း ပြောကြားခဲ့ဖူးသည်။ သို့သော် ယခုအခါ ရိုင်အိုလာက Sky Italia နှင့် တွေ့ဆုံရာတွင် ပေါ့ဘာနှင့် ဟော်လန်းတို့ အသင်းပြောင်းရွှေ့မည်မဟုတ်ဟု ပြောကြားခဲ့ခြင်းဖြစ်သည်။
ရိုင်အိုလာက ''ပေါလ်(ပေါ့ဘာ) မန်ယူအသင်းမှာ ဆက်ရှိမှာပါ။ သူက မန်ယူအသင်းရဲ့ အဓိကကစားသမားတစ်ယောက်ဖြစ်ပြီး အနာဂတ်စီမံကိန်းမှာ ရာနှုန်းပြည့်ပါဝင်နေပါတယ်။ ကျွန်တော်တို့ စာချုပ်သစ်အတွက် ဆွေးနွေးဖို့ စီစဉ်နေပါတယ်။ အလျင်လိုခြင်းလည်း မရှိပါဘူး။ စိုးရိမ်ပူပန်မှုလည်း မရှိပါဘူး''ဟု ပြောကြားခဲ့သလို၊ ဟော်လန်းနှင့်ပတ်သက်၍လည်း ''သူ ဘယ်ကိုမှ ပြောင်းရွှေ့မှာမဟုတ်ပါဘူး။ ဒေါ့မွန်အသင်းမှာ သူ အဆင်ပြေနေပါတယ်။ အပြောင်းအရွှေ့လုပ်ရမယ့်အချိန်လည်း မဟုတ်ပါဘူး။ သူ့ရဲ့ ပရော်ဖက်ရှင်နယ်ခရီးရှည်အတွက် ကျွန်တော်တို့ ဂရုတစိုက်လုပ်ဆောင်နေပါတယ်''ဟု ပြောကြားခဲ့သည်။
၂၀၂၁ ခုနှစ်တွင် မန်ယူအသင်းနှင့် စာချုပ်သက်တမ်းကုန်ဆုံးမည့် ပေါ့ဘာသည် ပြီးခဲ့သည့်တစ်နှစ်တာကာလအတွင်း အနာဂတ်မတည်မငြိမ်ဖြစ်ခဲ့ပြီး အသင်းဟောင်း ဂျူဗင်တပ်စ်သို့ ပြန်လည်ပြောင်းရွှေ့ရန် သို့မဟုတ် ရီးယဲလ်အသင်းသို့ ပြောင်းရွှေ့ရန် စီစဉ်နေကြောင်း သတင်းထွက်ခဲ့ပြီး ဘရူနိုဖာနန်ဒက်စ် ရောက်ရှိလာမှသာ အသင်း၌ဆက်နေရန် စိတ်ပြောင်းသွားခဲ့ခြင်းဖြစ်ကြောင်းလည်း သိရသည်။ သို့သော် ယခုအချိန်အထိ ဂျူဗင်တပ်စ်အသင်းက ၎င်းကို ပြန်လည်ခေါ်ယူရန် ချိန်ရွယ်နေဆဲဖြစ်ပြီး နည်းပြသစ် ပီယာလိုက ပေါ့ဘာနှင့် ပြန်လည်လက်တွဲရန် ဆန္ဒရှိနေသည်ဟုလည်း အီတလီမီဒီယာများက ဖော်ပြနေကြသည်။ ထို့ကြောင့် အေးဂျင့် ရိုင်အိုလာက လာမည့်ရာသီ၌ မန်ယူအသင်းတွင် ပေါ့ဘာ ဆက်ရှိမည်ဟု ဆိုခဲ့သော်လည်း စာချုပ်သက်တမ်းတိုးနိုင်ခြင်းရှိ၊ မရှိ ဆက်လက်စောင့်ကြည့်ရဖွယ်ရှိနေသည်။
