ပြည်ထောင်စုဝန်ကြီး ဒေါက်တာဖေမြင့် ရှင်းလင်းပြောကြားနေမှုအား လွှတ်တော်တွင်း ပြသထားသည့် တီဗီမှတစ်ဆင့် သတင်းရယူနေသည့် သတင်းထောက်များအား တွေ့ရစဉ်

နိုင်ငံပိုင် စီးပွားရေးလုပ်ငန်းဖြစ်သည့် သတင်းနှင့် စာနယ်ဇင်းလုပ်ငန်း အနေဖြင့် အရှုံးနည်းစေရန် ကြော်ငြာဝင်ငွေ တိုးတက်ရရှိရန် ဆောင်ရွက်ခြင်း၊ စောင်ရေတိုးမြှင့်ခြင်း၊ အသုံးစရိတ်စိစစ်ခြင်းများ ပြုလုပ်သွားမည်ဟု ပြန်ကြားရေးဝန်ကြီးဌာန ပြည်ထောင်စုဝန်ကြီး ဒေါက်တာဖေမြင့်က ပြောကြားခဲ့သည်။

စက်တင်ဘာ ၆ ရက်က ပြုလုပ်သည့် ပြည်ထောင်စုလွှတ်တော် အစည်းအဝေးတွင် ၂၀၁၈-၂၀၁၉ ခုနှစ် အမျိုးသားစီမံကိန်းဥပဒေကြမ်းနှင့် ပြည်ထောင်စု၏ ဘဏ္ဍာငွေ အရအသုံးဆိုင်ရာ ဥပဒေကြမ်းနှင့်စပ်လျဉ်းပြီး ပူးပေါင်းကော်မတီနှစ်ရပ်၏ လေ့လာတွေ့ရှိချက်နှင့် သဘောထားမှတ်ချက် အစီရင်ခံစာပါ မူသဘော အကြောင်းအရာများ၊ လွှတ်တော်ကိုယ်စားလှယ်များ၏ ဆွေးနွေးချက်များအား ပြန်လည်ရှင်းစဉ် ပြောကြားခဲ့ခြင်း ဖြစ်သည်။

ဒေါက်တာဖေမြင့်က သတင်းနှင့် စာနယ်ဇင်းလုပ်ငန်း အနေဖြင့် ယနေ့အထိ အရှုံးပေါ်ခဲ့ခြင်း မရှိသေးကြောင်း၊ သို့ရာတွင် ၂၀၁၈-၂၀၁၉ခုနှစ် ဘဏ္ဍာရေးနှစ်အတွက် ခန့်မှန်းတွက်ချက် တင်ပြရာတွင် ဝင်ငွေထက်ပိုသည့် အသုံးစရိတ် ြ့ဖစ်နေသည်ကို တွေ့ရကြောင်း၊ ယင်းသို့ဖြစ်ပေါ်ရခြင်းသည် ကုန်ကြမ်းပစ္စည်းများ ဝယ်ယူရာတွင် နိုင်ငံခြားငွေလဲလှယ်နှုန်း မြင့်တက်လာခြင်း၊ သတင်းစာရိုက်နှိပ်သည့် စက္ကူ၊ မင် အပါအဝင် ကုန်ကြမ်းဈေးနှုန်း မြင့်တက်လာခြင်း၊ ပြောင်းလဲလာသည့် နည်းပညာ တိုးတက်မှုအရ အွန်လိုင်းမီဒီယာ အသုံးပြုမှုများလာပြီး ပုံနှိပ်မီဒီယာများတွင် ကြော်ငြာထည့်သွင်းမှု လျော့နည်းလာသည့်အတွက် ကြော်ငြာဝင်ငွေရရှိမှု လျော့နည်းလာခြင်းများကြောင့်ဖြစ်ကြောင်း၊ ထို့အတွက် ကျပ် ၁၁၅၇ ဒသမ ၅၇၇ သန်းခန့် အရှုံးဖြစ်ပေါ်နိုင်သည်ဟု တွက်ချက် တင်ပြခဲ့ရခြင်းဖြစ်ကြောင်း ပြည်ထောင်စုလွှတ်တော်တွင် ပြောကြားခဲ့သည်။

ဒေါက်တာဖေမြင့်က “စာရင်းသဘောအရ အရှုံးဖြစ်ပေါ်နိုင်မှု အခြေအနေကို တင်ပြခဲ့သော်လည်း နိုင်ငံပိုင်စီးပွားရေး လုပ်ငန်းတစ်ခုအနေနဲ့ တတ်နိုင်သမျှ အရှုံးနည်းနိုင်သမျှ နည်းရအောင် နည်းလမ်းရှာပြီး ကြိုးပမ်း ဆောင်ရွက်သွားမှာ ဖြစ်ပါတယ်။ အဲဒီနည်းလမ်းတွေကတော့ ကျေးလက်ဒေသတွေကို သတင်းစာရောက်ရှိရေး အပါအဝင် စောင်ရေတိုးမြှင့်ရေး ဆောင်ရွက်ခြင်း၊ အသုံးစရိတ်တွေ လျော့နိုင်သမျှ လျော့နည်းစေရန် စိစစ် ဆောင်ရွက်ခြင်း၊ ကြော်ငြာဝင်ငွေ အတိုင်းအတာတစ်ခုအထိ တိုးတက်ရရှိစေဖို့ ဆောင်ရွက်ခြင်းပဲ ဖြစ်ပါတယ်” ဟု ပြောကြားခဲ့သည်။

ကြော်ငြာဝင်ငွေ တိုးတက်ရရှိအောင် ဆောင်ရွက်နေသော်လည်း တစ်ဖက်တွင်ရှိသည့် ပုဂ္ဂလိကသတင်းစာ၊ ဂျာနယ်၊ စာစောင်များ၏ ကြော်ငြာဈေးကွက်ကို ထည့်သွင်း စဉ်းစားရကြောင်း၊ မြန်မာ့အလင်းနှင့် ကြေးမုံသတင်းစာများတွင် ထည့်သွင်းဖြန့်ချိနေသည့် ကြော်ငြာအချပ်ပို ရှစ်မျက်နှာကို ၂၀၁၆ ခုနှစ် ဇွန် ၁ ရက်မှစပြီး ရပ်ဆိုင်းခဲ့ကြောင်း၊ နိုင်ငံပိုင်စီးပွားရေးလုပ်ငန်း တစ်ခုဖြစ်သော သတင်းနှင့် စာနယ်ဇင်းလုပ်ငန်း အနေဖြင့် ယခင်က အရှုံးမရှိခဲ့သကဲ့သို့ ၂၀၁၈-၂၀၁၉ ဘဏ္ဍာနှစ်တွင်လည်း အကြောင်းအမျိုးမျိုးကြောင့် ကုန်ကျစရိတ်များတိုးသည့်တိုင် အရှုံးပမာဏ များပြားမှုမရှိစေရေးနှင့် သတင်းစာဈေးနှုန်း တိုးမြှင့်ရောင်းချခြင်းအစား တင်ပြခဲ့သည့် နည်းလမ်းများဖြင့် ဆောင်ရွက်မည်ဖြစ်ကြောင်း ဒေါက်တာဖေမြင့်က ပြောကြားသည်။

ထို့ပြင် ပြန်ကြားရေးဝန်ကြီးဌာန အနေဖြင့် နိုင်ငံပိုင်သတင်းစာများကို ရောင်းချရာတွင် အမြတ်အစွန်းရရှိရေးထက် ပြည်သူများထံ ဈေးနှုန်းချိုသာစွာဖြင့် သတင်းအချက်အလက် ပြည့်စုံစွာ ရောက်ရှိရေးဖြစ်ကြောင်း၊ စာမျက်နှာ ၃၂ မျက်နှာပါ သတင်းစာတစ်စောင်၏ ကုန်ကျစရိတ်သည် ၁၁၅ ကျပ်ခန့်ဖြစ်သော်လည်း ၅၀ ကျပ်ဖြင့်သာ ရောင်းချလျက်ရှိကြောင်း ဒေါက်တာဖေမြင့်က ပြောကြားခဲ့သည်။

စက်တင်ဘာ ၄ ရက်က ပြုလုပ်သည့် ပြည်ထောင်စုလွှတ်တော် အစည်းအဝေးတွင် ၂၀၁၈-၂၀၁၉ ခုနှစ် အမျိုးသားစီမံကိန်း ဥပဒေကြမ်းနှင့် ပြည်ထောင်စု၏ ဘဏ္ဍာငွေ အရအသုံးဆိုင်ရာ ဥပဒေကြမ်းတို့၏ မူနှင့် အခြေခံသဘောများ၊ စီမံကိန်းလုပ်ငန်းများ၊ ရငွေသုံးငွေများနှင့် စပ်လျဉ်းပြီး ဆွေးနွေးစဉ်တွင် ကျောက်တန်းမဲဆန္ဒနယ်မှ ဒေါ်အေးမြမြမျိုးက ဈေးကွက်ဝေစုနှင့် ကြော်ငြာအများကြီး ရရှိထားပြီး အရှုံးပေါ်နေသည့် သတင်းနှင့် စာနယ်ဇင်းလုပ်ငန်းအား မည်သည့်အတွက်ကြောင့် ရှုံးနေသနည်းဟု မေးခွန်းထုတ်ခဲ့ခြင်း ဖြစ်သည်။

ဒေါ်အေးမြမြမျိုးက “ပြန်ကြားရေးဝန်ကြီးဌာနရဲ့ သတင်းနဲ့စာနယ်ဇင်းလုပ်ငန်းရဲ့ အသုံးစရိတ်အဖြစ် ကျပ် ၂၁ ဒသမ ၅၃၇ ဘီလျံ၊ အရှုံးအဖြစ် ကျပ် ၁ ဒသမ ၁၅၈ ဘီလျံဆိုပြီး တွေ့ရပါတယ်။ ဒီစာနယ်ဇင်းလုပ်ငန်းတွေဟာဆိုရင် နိုင်ငံတော်ရဲ့ အရင်းအမြစ်တွေ၊ အဆောက်အအုံတွေ၊ မြေနေရာတွေ သုံးထားပါတယ်။ နိုင်ငံတော်က ဝန်ထမ်းတွေကိုလည်း နိုင်ငံတော်ဘတ်ဂျက်နဲ့ ခန့်ထားပေးထားပါတယ်။ ဈေးကွက်ဝေစု အကြီးမားဆုံးလည်း ရရှိထားပါတယ်။ ကြော်ငြာတွေလည်း အများကြီး ရရှိထားပါလျက်နဲ့ ဒီလောက်ရှုံးရတဲ့အပေါ်မှာ ဘာကြောင့်ရှုံးရတာလဲ ဆိုတာကို မေးချင်ပါတယ်” ဟု ဆွေးနွေးခဲ့သည်။

၂၀၁၈-၂၀၁၉ ခု ဘဏ္ဍာရေးနှစ်ရ သုံးမှန်းခြေငွေစာရင်းအရ နိုင်ငံတော်ပိုင် စီးပွားရေးအဖွဲ့အစည်းပေါင်း ၃၂ ခုရှိသည့်အနက် အမြတ်ရရှိသည့်အဖွဲ့အစည်း ၂၂ ခုရှိပြီး အရှုံးပေါ်ခဲ့သည့် အဖွဲ့အစည်း ၁၀ ခုရှိခဲ့ကြောင်း၊ အရှုံးပေါ်ခဲ့သည့် အဖွဲ့အစည်း ၁၀ ခုထဲတွင် ပြန်ကြားရေးဝန်ကြီးဌာန၊ သတင်းနှင့် စာနယ်ဇင်းလုပ်ငန်း ပါဝင်ကြောင်း၊ ပြည်သူ့ငွေစာရင်းပူးပေါင်းကော်မတီ၏ အစီရင်ခံစာတွင် ဖော်ပြထားသည်။