အလုပ်သမားရေးရာ အငြင်းပွားမှုဖြေရှင်းရေး ဥပဒေတွင် ထောင်ဒဏ် ပါဝင်နေမှုနှင့် ပတ်သက်၍ အပြည်ပြည်ဆိုင်ရာ အလုပ်သမားရေးရာအဖွဲ့ (ILO) အနေဖြင့် သဘောမတူကြောင်း သိရသည်။
“အလုပ်သမားရေးရာ အငြင်းပွားမှုဖြေရှင်းရေး ဥပဒေမှာ (ပြစ်မှုပြစ်ဒဏ်အခန်း) မှာ ထောင်ဒဏ်ကို ကျင့်သုံးတာ ILO က သဘောမတူပါဘူး။ အဲဒီလိုပြောတာနဲ့ ILO က အလုပ်သမားတွေရဲ့ သဘောဆန္ဒကို ဆန့်ကျင်တာ မဟုတ်ပါဘူး။ ပထမဦးဆုံး အကြောင်းပြချက်ကတော့ အလုပ်ရှင်တွေ အနေနဲ့ ထောင်ဒဏ် ပါဝင်နေမှုကို မလိုလားဘူးဆိုတာ ကျွန်မတို့ သိလို့ပါ။ အဲဒီလို ထောင်ဒဏ် ပါဝင်နေမှုဟာ ပြည်တွင်းပြည်ပ ရင်းနှီးမြှုပ်နှံမှုတွေကို ဟန့်တားရာ ရောက်ပါတယ်။ နိုင်ငံခြား ရင်းနှီးမြှုပ်နှံသူတွေက တကယ်ကို အဟန့်ဖြစ်နေတာပါ။ နောက်ပြီး ကျွန်မတို့က အလုပ်သမားတွေဘက်က ကြည့်မယ်ဆိုရင်လည်း အလုပ်သမားတွေရဲ့ဆန္ဒကို သေချာ နားထောင်ကြည့်မယ် ဆိုရင်လည်း သူတို့က တရားမျှတမှု ဆိုတာကိုပဲ လိုချင်တာပါ။ လွန်ခဲ့တဲ့ နှစ်နှစ်လောက်က ထောင်ဒဏ် ပါစေချင်ပေမယ့် အခုအဲဒီလို မဟုတ်တော့ပါဘူး။ သူတို့ တကယ်လိုလားတာက ဥပဒေ စည်းမျဉ်းစည်းကမ်းတွေကို လိုက်နာမှုကို လိုလားတာပါ။ ထောင်ဒဏ်က အဓိက မဟုတ်ပါဘူး။ အလုပ်သမားတွေနဲ့ အလုပ်သမား အဖွဲ့အစည်းတွေရဲ့ အခွင့်အရေးတွေကို အပြည့်အဝရဖို့ပဲ လိုလားကြတာ ဖြစ်ပါတယ်” ဟု ILO ၏ အလုပ်အကိုင်ဈေးကွက် စီမံအုပ်ချုပ်မှုဌာန Cheif Technical Advisor ဖြစ်သူ Ms. Natsu Nogami က ပြောကြားသည်။
သြဂုတ် ၃၀ ရက်တွင် Internews Office ၌ ပြုလုပ်သည့် “အလုပ်သမား အငြင်းပွားမှုများ လျှော့ချရေးအတွက် ဝိုင်းဝန်းအဖြေရှာခြင်း” ဆွေးနွေးဝိုင်းတွင် ပြောကြားခဲ့သည်။
အလုပ်သမားရေးရာ အငြင်းပွားမှုဖြေရှင်းရေး ဥပဒေတွင် ထောင်ဒဏ် ပါဝင်နေမှုမှာ ပြစ်မှုပြစ်ဒဏ်မမျှ ဖြစ်နေသောကြောင့်သာ သဘောမတူရခြင်း ဖြစ်ပြီး ကလေးသူငယ် အလုပ်သမား၊ အတင်းအကျပ် ခိုင်းစေခြင်းနှင့် လုပ်ငန်းခွင် လုံခြုံစိတ်ချရမှု မရှိခြင်းကဲ့သို့ ပြစ်မှုများတွင် ထောင်ဒဏ်အဖြစ် အပြစ်ပေးခြင်းကို ILO အနေနှင့် အပြည့်အ၀ လက်ခံကြောင်း ၎င်းက ဆိုသည်။
အလုပ်သမားရေးရာ အငြင်းပွားမှုဖြေရှင်းရေး ဥပဒေကို ဒုတိယအကြိမ် ပြင်ဆင်သည့် ဥပဒေကြမ်းတွင် အလုပ်ရှင်နှင့် အလုပ်သမားကြား အငြင်းပွားမှု စပ်လျဉ်းပြီး ညှိနှိုင်းဖျန်ဖြေရေးအဖွဲ့ ရှေ့မှောက်တွင် ချုပ်ဆိုသည့် သဘောတူစာချုပ်ပါ စည်းကမ်းချက်ကို လိုက်နာဆောင်ရွက်ရန် ပျက်ကွက်ပါက ထောင်ဒဏ် ခြောက်လဖြစ်စေ၊ ကျပ်သိန်း တစ်ရာဖြစ်စေ၊ ဒဏ်နှစ်ရပ်စလုံး ဖြစ်စေ ချမှတ်မည့် ပုဒ်မ ပြင်ဆင်ချက်တစ်ခု ပါရှိသည်။
ဖြစ်ပွားလျက် ရှိသော အလုပ်ရှင် အလုပ်သမား အငြင်းပွားမှုများကို ဖြေရှင်းနိုင်ရန်အတွက် ထောင်ဒဏ်ကဲ့သို့ ပြင်းထန်သော ပြစ်ဒဏ်များသည် ပြေလည်စေသည့် နည်းလမ်း မဟုတ်ဘဲ ဥပဒေ နည်းဥပဒေများတွင် ပြဋ္ဌာန်းထားသကဲ့သို့ ဖျန်ဖြေမှု အဆင့်ဆင့်သာ လုပ်သင့်ကြောင်းနှင့် အလုပ်ရှင် အလုပ်သမား ဆက်ဆံရေး ပိုမိုကောင်းမွန်စေရန်အတွက်လည်း စဉ်းစားရမည် ဖြစ်ကြောင်း ၎င်းက ဆိုသည်။
ထောင်ဒဏ် မဟုတ်ဘဲ အခြားဖြေရှင်းနိုင်မှု နည်းလမ်းများကို မေးမြန်းရာတွင် “ရေတို ရေရှည်ဆိုပြီး နှစ်မျိုးပြောနိုင်ပါတယ်။ ရေတို ဖြေရှင်းနည်းကတော့ ထောင်ဒဏ် မဟုတ်တဲ့ အခြားပြင်းထန်တဲ့ ပြစ်ဒဏ်မျိုး ဖြစ်ပါတယ်။ ပြင်းထန်တဲ့ ပြစ်ဒဏ်ဆိုတာက နိုင်ငံနေရာလိုက်ပြီး ကွာခြားနိုင်ပါတယ်။ အကယ်၍ အလုပ်ရှင်က သမဂ္ဂဝင်တွေကို ပစ်မှတ်ထားပြီး အလုပ်ထုတ်တာမျိုး တစ်ကြိမ်ထက်မက လုပ်ရင် ထောင်ဒဏ်လိုမျိုး ပြင်းထန်တဲ့ ပြစ်ဒဏ်တွေ လုပ်မလား။ ဒီနေရာမှာလည်း ဘယ်နှကြိမ်ဆိုတာ သတ်မှတ်ထားဖို့ လိုပါတယ်။ ရေရှည်အတွက်ကတော့ ကြားခံ စေ့စပ်ညှိနှိုင်းတဲ့ အဖွဲ့အစည်းတွေကို အရည်အသွေး မြှင့်တင်ပေးဖို့နဲ့ တကယ့်ကို သီးခြားလွတ်လပ်တဲ့ အဖွဲ့တွေဖြစ်စေဖို့ ဖြစ်ပါတယ်။ အဲဒါမှ အလုပ်ရှင်ရော၊ အလုပ်သမားရောက ဒီအဖွဲ့တွေရဲ့ ဆုံးဖြတ်ချက်တွေကို လေးစားလိုက်နာမှာ ဖြစ်ပါတယ်” ဟု Ms. Natsu Nogami က ဆိုသည်။
အဆိုပါ ထောင်ဒဏ်ပါသည့် ဥပဒေကို ဇွန် ၁ ရက်က ကျင်းပသည့် အမျိုးသားလွှတ်တော် အစည်းအဝေးတွင် အတည်ပြုခဲ့ပြီး လာမည့်လထဲတွင် ပြည်သူ့လွှတ်တော်တွင် ဆွေးနွေးမည် ဖြစ်ကြောင်း သိရသည်။
