ရန်ကုန်တိုင်းဒေသကြီး ဒဂုံဆိပ်ကမ်းမြို့နယ် ဒဂုံဆိပ်ကမ်းစက်မှုဇုန် (၁) ရှိ ဖုယွင် အထည်ချုပ်စက်ရုံ ရှေ့တွင် အလုပ်သမားအချင်းချင်း အပြန်အလှန် ဆန္ဒပြမှု သြဂုတ် ၂၉ ရက် နံနက်က ဖြစ်ပွားခဲ့ကြောင်း သိရသည်။
ဖုယွင် အထည်ချုပ်စက်ရုံ တာဝန်ရှိသူများသည် အနည်းဆုံးလုပ်ခ တိုးမြှင့်ပေးခဲ့သဖြင့် ကုန်ကျစရိတ် များလာခြင်း၊ စက်ရုံ၏ စီးပွားရေးလုပ်ငန်း တွက်ခြေကိုက်မှု မရှိတော့ဘဲ အရှုံးပေါ်နေခြင်း၊ စက်ရုံတွင် (EC) စာချုပ်အတိုင်း အလုပ်လုပ်ကိုင်မှု မရှိသူများ၊ ခွင့်မဲ့ ပျက်ကွက်ရက် များသူများ၊ ကုန်ထုတ်လုပ်မှု ကျဆင်းစေရန် ရည်ရွယ်၍ သွေးထိုးလှုံ့ဆော်သူများ၊ စက်ရုံ၏ (EC) စာချုပ်ပါ စည်းကမ်း သတ်မှတ်ချက်များကို ချိုးဖောက်သူ ၃၀ ကို တည်ဆဲ အလုပ်သမားရေးရာ ဥပဒေပြဋ္ဌာန်းချက်အရ အလုပ်ရပ်စဲမှု နစ်နာကြေးများပေး၍ လုပ်သားအင်အား လျှော့ချမည်ဟူ၍ ကြေညာချက် ထုတ်ပြန်၍ အလုပ်သမားသမဂ္ဂ ခေါင်းဆောင်များ အပါအဝင် အလုပ်သမား ၃၀ ကို သြဂုတ်၂၁ ရက်တွင် အလုပ်မှ ထုတ်ပယ်ခဲ့သည်။
ထိုသို့ အလုပ်သမား ၃၀ အလုပ်ထုတ်ခံရသည်ကို ကျေနပ်မှုမရှိသဖြင့် စက်ရုံအလုပ်သမား ၂၀၀ ခန့်သည် သြဂုတ် ၂၁ ရက်မှစ၍ လုပ်ငန်းခွင် မဝင်ဘဲ စက်ရုံရှေ့၌ ပိတ်ဆို့၍ သပိတ်မှောက် ဆန္ဒပြလျက်ရှိကြောင်း သိရသည်။
ယင်းသို့ စက်ရုံရှေ့တွင် ပိတ်ဆို့ ဆန္ဒပြနေသည့်အတွက် အခြားအလုပ်သမားများမှာ လုပ်ငန်းခွင်သို့ ဝင်ရောက်၍ အလုပ်လုပ်ကိုင်ခွင့် မရချေ။ ထိုသို့ အလုပ်လုပ်ခွင့် မရသဖြင့် စက်ရုံရှေ့တွင် ဆန္ဒပြနေသည့် အလုပ်သမားများကို အခြားအလုပ်သမားများက သြဂုတ် ၂၉ ရက် နံနက်ပိုင်းတွင် ဆန္ဒပြမှု ဖြစ်ပွားခဲ့ကြောင်း စုံစမ်းသိရှိရသည်။
သပိတ်မှောက် ဆန္ဒပြရာတွင် မပါဝင်သော အလုပ်သမားများက ဆိုင်းဘုတ်များ ကိုင်ဆောင်၍ “အလုပ်ပြန်ဆင်းရေး ဒို့အရေး”ဟူသည့် ကြွေးကြော်သံများဖြင့် ဆန္ဒပြခဲ့ကြောင်း၊ ၎င်းတို့ စက်ရုံရှေ့တွင် ဆန္ဒပြနေရခြင်းမှာ အလုပ်ရှင်က အလုပ်ထုတ်ခဲ့သည့်အတွက် ဖြစ်ကြောင်း အလုပ်ထုတ်ခံရသည့် အလုပ်သမား ၃၀ အနက် တစ်ဦးဖြစ်သူ ဦးဆန်းဝင်း၏ ပြောကြားချက်အရ သိရသည်။
ဖုယွင်အထည်ချုပ်စက်ရုံတွင် အလုပ်သမားအချင်းချင်း အပြန်အလှန် ဆန္ဒပြခြင်း နှင့် ပတ်သက်၍ စက်ရုံမန်နေဂျာအား ဖုန်းဖြင့် ဆက်သွယ်ခြင်း၊ မက်ဆေ့ပေးပို့ခြင်းများ ပြုလုပ်ခဲ့သော်လည်း ဆက်သွယ်၍ မရခဲ့ချေ။
