စားသုံးသူကာကွယ်ရေး ဥပဒေမူကြမ်းတွင် စားသုံးသူအား တရားပြန်စွဲနိုင်သည့် ပုဒ်မပြဋ္ဌာန်းချက်အား ပယ်ဖျက်ပေးရန် လွှတ်တော်သို့စာတင်ထားကြောင်း မြန်မာနိုင်ငံ စားသုံးသူ ကာကွယ်ရေးအသင်းမှ ဥက္ကဋ္ဌ ဦးဗအုပ်ခိုင်က ပြောကြားသည်။
သြဂုတ်ပထမပတ်က ထိုပုဒ်မပြဋ္ဌာန်းချက်အား ပယ်ဖျက်ပေးရန် ပြည်သူ့လွှတ်တော်သို့ စာပေးပို့ တင်ထားကြောင်း သိရသည်။
“ဒီလိုစားသုံးသူတွေကို ပြန်ပြီးတရားစွဲနိုင်တဲ့ ပြဋ္ဌာန်းချက်တွေပါတော့ တိုင်တန်းတဲ့ စားသုံးသူတွေအတွက် ခြိမ်းခြောက်သလို ဖြစ်နေတယ်။ တိုင်တန်းဖို့အတွက် အဟန့်အတား တစ်ခုလို ဖြစ်နေတယ်။ တစ်ဖက်က ဓနအင်အား ကြီးမားတဲ့ လုပ်ငန်းရှင်တွေက သူတို့ကိုတိုင်တဲ့အခါမှာ စားသုံးသူကို လီဆယ်တိုင်တာပါဆိုပြီး ပြန်တရားစွဲလိုက်ရင် အားနည်းတဲ့ဘက်မှာ ရှိနေတဲ့ စားသုံးသူတွေက တိုင်ဖို့အတွက် ဒီပြဋ္ဌာန်းချက်ကြီးက အဟန့်အတား တစ်ခုလို ဖြစ်နေတယ်။ အဲဒါကြောင့်မို့လို့ ဆရာတို့က ပယ်ဖျက်ခိုင်းတာပါ” ဟု ဦးဗအုပ်ခိုင်က ပြောကြားသည်။
ထိုဥပဒေမူကြမ်း ရေးဆွဲစဉ်က လုပ်ငန်းရှင်များ ပါဝင်ရေးဆွဲသောကြောင့် ယခုလို ပုဒ်မပြဋ္ဌာန်းချက်များ ပါလာရခြင်းဖြစ်ပြီး မည်သည့်နိုင်ငံတွင်မှ စားသုံးသူအား ပြန်လည်တရားစွဲနိုင်သည့် ဥပဒေမရှိကြောင်း ၎င်းက ပြောကြားသည်။
“စားသုံးသူတွေဘက်က လီဆယ်တိုင်တန်းတယ်ဆိုရင် ရာဇသတ်ကြီးပုဒ်မနဲ့ တရားစွဲလို့ရတယ်။ စားသုံးသူကို ကာကွယ်တဲ့ ဥပဒေဟာ စားသုံးသူတွေကို ကာကွယ်တဲ့ ပြဋ္ဌာန်းချက်တွေ၊ ပုဒ်မတွေ၊ ပြစ်မှုပြစ်ဒဏ်တွေပဲ ဖြစ်သင့်တယ်။ စားသုံးသူတွေကို ပြန်အရေးယူတဲ့ ပြစ်မှုပြစ်ဒဏ်တွေ မဖြစ်သင့်ဘူး” ဟု ဦးဗအုပ်ခိုင်က ပြောကြားသည်။
စားသုံးသူကာကွယ်ရေး ဥပဒေမူကြမ်း အခန်း (၂၄)၊ ပုဒ်မ (၆၆) တွင် မည်သူမဆို စားသုံးသူ သို့မဟုတ် စီးပွားရေး လုပ်ငန်းရှင် တစ်ဦးဦးကို ထိခိုက်နစ်နာစေရန် မရိုးမဖြောင့်သော သဘောဖြင့် စားသုံးသူကို သွေးဆောင်ဖြားယောင်း၍ တိုင်ကြားစေခြင်း စသောကိစ္စများကို ဆောင်ရွက်ခြင်းများ မပြုလုပ်ရဟု ပါရှိသည်။
