အဆောက်အအုံဆိုင်ရာ ဥပဒေ အဆိုပြုမူကြမ်း ရှင်းလင်းတင်ပြပွဲ အခမ်းအနား ပြုလုပ်စဉ်
နိုင်ငံခြားသား ၃၅ ရာခိုင်နှုန်း ပိုင်ဆိုင်ခွင့် တိုက်ခန်းကိုပေါင်နှံ၍ ဘဏ်မှငွေချေးယူနိုင်ခွင့် စသည့် အချက်အလက်များ ပါဝင်သည့် တိုက်ခန်းအိမ်ရာ အဆောက်အအုံဆိုင်ရာ ဥပဒေအဆိုပြု မူကြမ်းကို ပြည်သူ့လွှတ်တော်သို့ ပေးပို့ထားကြောင်း မြန်မာနိုင်ငံ လိုင်စင်ရ ကန်ထရိုက်တာများ အသင်းမှ သိရသည်။
အဆိုပါ အသင်းက ဦးဆောင်၍ တိုက်ခန်းအိမ်ရာ အဆောက်အအုံဆိုင်ရာ ဥပဒေ အဆိုပြုမူကြမ်းနှင့် ပတ်သက်၍ ၎င်းတို့၏ အသင်းဝင်များ၊ လုပ်ငန်းရှင်များ၊ မြေပိုင်ရှင်များ၊ ဆောက်လုပ်ရေးဆိုင်ရာ အသိပညာရှင် အတတ်ပညာရှင်များနှင့် ဇူလိုင် ၂၁ ရက်တွင် တာမွေမြို့နယ် အရှေ့မြင်းပြိုင်ကွင်းလမ်းရှိ Sky Star ဟိုတယ်တွင် တွေ့ဆုံ၍ အဆိုပါ ဥပဒေမကြမ်းနှင့် ပတ်သက်ပြီး ရှင်းလင်းဆွေးနွေးပွဲ ပြုလုပ်ခဲ့သည်။
ယင်းဥပဒေတွင် အခန်း ၁၁ ခန်းပါဝင်ပြီး ဒေသအသီးသီးတွင် မြို့ပြဆိုင်ရာနှင့် ပတ်ဝန်းကျင် ဖွံ့ဖြိုးရေး စီမံကိန်းများကို အထောက်အကူပြုစေရန်၊ အိမ်ရာကဏ္ဍ ဖွံ့ဖြိုးတိုးတက်လာစေရေးနှင့် ဝင်ငွေအသင့်အတင့်ရှိ ပြည်သူများ လူနေမှုအဆင့်အတန်း မြင့်မားစွာ နေထိုင်နိုင်ရေးကို အထောက်အကူ ပြုစေရန်၊ တိုက်ခန်းအိမ်ရာ အဆောက်အအုံ၏ အိမ်ခန်းများကို တရားဝင်ပိုင်ဆိုင် လက်ရှိထားခွင့် အကျိုးခံစားခွင့်နှင့် စနစ်တကျ လွှဲပြောင်းခွင့် ရရှိစေရန်၊ မြို့ပြအိမ်ရာ အဆောက်အအုံ စနစ်တွင် မြေပိုင်ဆိုင်မှု အိမ်ခန်းပိုင်ဆိုင်မှုများနှင့် စပ်လျဉ်း၍ အငြင်းပွားမှုများ လျော့နည်း ပပျောက်စေရန်၊ ယင်းဥပဒေနှင့်အညီ တိုက်ခန်းအိမ်ရာ အဆောက်အအုံ ဆောက်လုပ်ခွင့် ရရှိသူများ၊ အိမ်ခန်းပိုင်ဆိုင်သူများ အနေဖြင့် ဘဏ်၊ ငွေကြေး အဖွဲ့အစည်းများနှင့် ချိတ်ဆက်ဆောင်ရွက်နိုင်ရန်၊ အိမ်ခန်းပိုင်ဆိုင်မှု လက်ရှိထားနေထိုင်မှု၊ လွဲပြောင်းမှုများကို စနစ်တကျ ကြီးကြပ်ထိန်းသိမ်း ဆောင်ရွက်နိုင်ရန် စသည့် ရည်ရွယ်ချက်တို့ဖြင့် ရေးဆွဲခြင်းဖြစ်ကြောင်း ယင်းအသင်းက ဆိုသည်။
“နိုင်ငံခြားသား ၃၅ ရာခိုင်နှုန်းဆိုတာ အကြမ်းဖျင်း သတ်မှတ်ပေးထားတာပဲ ရှိပါသေးတယ်။ လွှတ်တော်ကို ရောက်သွားတဲ့ အခါကြရင် ကိုယ်စားလှယ်တွေက ပြန်လည်ဆွေးနွေးတဲ့ အချက်ကလေးတွေလည်း ရှိဦးမှာပါ” ဟု နိုင်ငံတော်ဖွဲ့စည်းပုံ အခြေခံဥပဒေဆိုင်ရာ ခုံရုံးအဖွဲ့ဝင် အငြိမ်းစား ရှေ့နေချုပ်ရုံး ဒုတိယညွန်ကြားရေးမှူးချုပ် အငြိမ်းစား ဒေါ်ကျင်စန်းက ဆွေးနွေးပွဲတွင် ပြောကြားသည်။
ယင်းအပြင် အိမ်ရာဆောက်လုပ်ရာ၌ ဥပဒေ၊ နည်းဥပဒေ ပြဌာန်းချက်များနှင့်အညီ ဆောက်လုပ်ပြီး အိမ်ခန်းပိုင်ဆိုင်မှု အချိုးအရ တာဝန်ယူမှု တာဝန်ခံမှုစနစ် ဖော်ထုတ်ရန်၊ တိုက်ခန်းအိမ်ရာ တန်ဖိုးများ မျှတညီညွတ် တည်ငြိမ်စေရေး ထိန်းသိမ်းပေးရန်နှင့် ရသင့် ရထိုက်သော နိုင်ငံတော်၏ အခွန်ဘဏ္ဍာ အပြည့်အ၀ ရရှိစေရန်၊ မြို့ပြအိမ်ရာ ဖွံ့ဖြိုးရေး စီမံကိန်းများတွင် ပြည်တွင်းမှ ရည်ရွယ်ချက်တူ အဖွဲ့အစည်းများ၊ ညီနောင်အဖွဲ့အစည်းများ၊ မိတ်ဖက်အဖွဲ့အစည်းများ၊ ဆောက်လုပ်ရေးကုမ္ပဏီများ၊ ဆောက်လုပ်ရေးလုပ်ငန်းနှင့် ဆက်စပ်သော ဝန်ဆောင်မှုလုပ်ငန်း ကုမ္ပဏီများ၊ ဆောက်လုပ်ရေး လုပ်ငန်းသုံးပစ္စည်း ထုတ်လုပ်ဖြန့်ဖြူး ရောင်းချသူများ၊ ပုဂ္ဂလိက လုပ်ငန်းရှင်များ၊ ပြည်တွင်းနှင့် နိုင်ငံတကာ အဖွဲ့အစည်းများ၊ ဒေသဆိုင်ရာ အဖွဲ့အစည်းများ ပူးပေါင်းဆောင်ရွက်နိုင်ရန်၊ နိုင်ငံခြား ရင်းနှီးမြှုပ်နှံမှုများ အရှိန်အဟုန်ဖြင့် စီးဝင်စေရန်နှင့် နိုင်ငံခြားငွေ တိုးတက်ရရှိစေရန် အိမ်ရာဆောက်လုပ်ရေး အခန်းကဏ္ဍ စနစ်တကျ တည်ငြိမ်ဖွံ့ဖြိုး တိုးတက်လာစေရန်နှင့် မြို့ပြလူနေမှုစနစ် တိုးတက်မြင့်မား လာစေရန် တို့ဖြစ်ကြောင်း ဥပဒေ၏ ရည်ရွယ်ချက်ထဲ၌ ရေးသားထားသည်ကို တွေ့ရသည်။
“အရင်တုန်းက တိုက်ခန်းတွေပိုင်တဲ့ သူတွေက သွားပေါင်ပြီဆိုလို့ရှိရင် အပေါင်မခံဘူး။ ငွေချေးမယ် ဆိုလို့ရှိရင် မရဘူး။ အာမခံခွင့် မရှိဘူး။ ဒီနေ့ကျွန်တော်တို့က အာမခံချက်ရှိအောင် ဒီအခန်းတွေကို မှတ်ပုံတင်စာချုပ်နဲ့ ဝယ်တယ်။ အခွန်ဆောင်တယ်။ ဒါကြောင့်မို့ ဒီအခန်းတွေကို ကျွန်တော်တို့က အစိုးရနဲ့ညှိမယ်။ ဘဏ်နဲ့ချိတ်ဆက်မယ်၊ ငွေကြေး အဖွဲ့အစည်းတွေနဲ့ ချိတ်ဆက်မယ်ဆိုရင် ကျွန်တော်တို့ မိတ်ဆွေများ ဒီအခန်းကို တန်ရာတန်ကြေးနဲ့ ဝယ်ထားရင် အဲဒီအခန်းနဲ့ ညီတဲ့ငွေကို ကျွန်တော်တို့က ဘဏ်တွေမှာ သွားပြီးတော့ ငွေချေးလို့ရမယ်။ အပေါင်ခံလို့ရမယ်။ အဲဒီလို စီးပွားရေး လုပ်ငန်းတွေ လည်ပတ်မယ် သွားချင်တဲ့ သဘောတရား ရှိလာပါပြီ” ဟု မြန်မာနိုင်ငံ လိုင်စင်ရ ကန်ထရိုက်တာများ အသင်း၏ နာယက (ဥပဒေအကြံပေး) တရားလွှတ်တော်ရှေ့နေ ဦးအုန်းမောင်က ပြောကြားသည်။
ယင်းဆွေးနွေးပွဲသို့ စီးပွားရေးလုပ်ငန်းရှင်များ၊ လွှတ်တော်ကိုယ်စားလှယ်များလည်း တက်ရောက်ခဲ့ကြောင်း သိရသည်။
“ကျွန်တော်တို့ အခုလုပ်နေတာသည် မြန်မာနိုင်ငံမှာ နေပြီးတော့ မြန်မာနိုင်ငံမှာ နေတယ်။ စီးပွားရှာတယ်။ ပြီးတော့ အခွန်ဆောင်တယ်။ သေတဲ့အထိ မြန်မာနိုင်ငံမှာပဲ လုပ်တဲ့အတွက် မြန်မာနိုင်ငံတော် အတွက်ပဲ ဆောင်ရွက်နေတာ ဖြစ်ပါတယ်။ ဒီ Apartment Law ဟာ ဆိုလို့ရှိရင် ကျွန်တော်တို့ အခုဖြစ်နေတဲ့ အိမ်ရှင်အိမ်ငှားတွေ၊ မြေပိုင်ရှင်တွေ ကျွန်တော်လည်း တိတိကျကျတော့ သေချာမသိဘူးဗျ။ ဒါပေမဲ့ အများကြီးပဲ ပြဿနာပေါင်း သောင်းခြောက်ထောင် ရှိနေတာ ဖြစ်တဲ့အခါကြတော့ ကျွန်တော်တို့လည်း ဥပဒေကို အားကိုးရမှာပဲ။ လက်ရှိ ရှိနေတဲ့ဥပဒေမှာ အားနည်းချက်တွေ အများကြီးရှိတယ်။ အဲဒီအတွက်ကြောင့် ဒီဟာကို (ဥပဒေကို) ကျွန်တော်တို့ အသင်းသားတွေ အနေနဲ့ အသင်းသားတွေ ဆိုတာလည်း နိုင်ငံသားတွေပါပဲ” ဟု မြန်မာနိုင်ငံ လိုင်စင်ရ ကန်ထရိုက်တာများအသင်း ဥက္ကဋ္ဌ ဦးကျော်ဝင်း (ရွှေသံလွင်) က ပြောကြားသည်။
