၂၀၁၈ ခုနှစ် ဇွန်လကုန်အထိ ရင်းနှီး မြှုပ်နှံမှုကဏ္ဍ ၁၁ ခုတွင် မြန်မာနိုင်ငံသား ရင်းနှီးမြှုပ်နှံမှု ပမာဏမှာ ကျပ် ၁၇၅၂၃ ဘီလျံ ကျော်ရှိပြီး စိုက်ပျိုးရေးကဏ္ဍတွင် ရင်းနှီးမြှုပ်နှံမှု အနည်းဆုံးဖြစ်ကြောင်း ရင်းနှီးမြှုပ်နှံမှု နှင့် ကုမ္ပဏီများညွှန်ကြားမှုဦးစီးဌာနမှ ထုတ် ပြန်သည့် အချက်အလက်များအရ သိရသည်။
ရင်းနှီးမြှုပ်နှံမှုကဏ္ဍအလိုက် ခွင့်ပြုထားသည့် မြန်မာနိုင်ငံသား ရင်းနှီးမြှုပ်နှံမှုပမာဏမှာ အိမ်ခြံမြေဖွံ့ဖြိုးရေးကဏ္ဍတွင် ကျပ် ၄၁၆၂ ဘီလျံကျော်၊ သယ်ယူပို့ဆောင်ရေးနှင့် ဆက်သွယ်ရေးကဏ္ဍတွင် ကျပ် ၂၈၄၆ ဘီလျံကျော်၊ ကုန်ထုတ်လုပ်ငန်းကဏ္ဍတွင် ကျပ် ၃၀၁၆ ဘီလျံကျော်၊ ဟိုတယ်နှင့် ခရီးသွားကဏ္ဍတွင် ကျပ် ၁၈၁၁ ဘီလျံကျော်၊ ဆောက်လုပ်ရေးကဏ္ဍတွင်ကျပ် ၁၀၂၉ ဘီလျံ ကျော်၊ စက်မှုဖွံ့ဖြိုးတိုးတက်ရေးကဏ္ဍတွင် ကျပ် ၈၆၂ ဘီလျံကျော်၊ စွမ်းအင်ကဏ္ဍတွင် ကျပ် ၆၃၇ ဘီလျံကျော်၊ သတ္တု ကဏ္ဍတွင် ကျပ် ၁၄၇ ဘီလျံကျော်၊ မွေးမြူရေးနှင့် ရေလုပ်ငန်းကဏ္ဍတွင် ကျပ် ၁၅၀ ဘီလျံကျော်၊ စိုက်ပျိုးရေးကဏ္ဍတွင် ကျပ် ၅၁ ဘီလျံကျော်နှင့် အခြားဝန်ဆောင်မှုကဏ္ဍများတွင် ကျပ် ၂၈၀၇ ဘီလျံကျော် အသီးသီး မြှုပ်နှံထားခြင်းဖြစ်ကြောင်း သိရသည်။
မြန်မာနိုင်ငံသားများ ရင်းနှီးမြှုပ်နှံမှု ပမာဏများပြားသည့်ကဏ္ဍများတွင် အိမ်ခြံ မြေ၊ သယ်ယူပို့ဆောင်ရေးနှင့် ဆက်သွယ်ရေး၊ ကုန်ထုတ်လုပ်ငန်း၊ အခြားဝန်ဆောင်မှု လုပ်ငန်းများ၊ ဟိုတယ်နှင့်ခရီးသွားကဏ္ဍတို့ ပါဝင်ပြီး ရင်းနှီးမြှုပ်နှံမှုအနည်းဆုံးကဏ္ဍများမှာ စိုက်ပျိုးရေး၊ မွေးမြူရေးနှင့် သတ္တုတူးဖော်ရေး ကဏ္ဍတို့ဖြစ်ကြောင်း သိရသည်။
မြန်မာနိုင်ငံသားရင်းနှီးမြှုပ်နှံသူများ၏ လုပ်ငန်း ၁၄၀၇ ခုကို လုပ်ငန်းကဏ္ဍ ၁၁ ခု တွင် ရင်းနှီးမြှုပ်နှံခွင့်ပြုထားခြင်းဖြစ်ပြီး စုစုပေါင်း ပမာဏ ကျပ် ၁၇၅၂၃၁၃၉ ဒသမ ၄၁၅ သန်း (ကျပ် ၁၇၅၂၃ ဘီလျံကျော်)ရှိ ကြောင်း သိရသည်။
၂၀၁၈ ခုနှစ် ဇွန်လကုန်အထိ ခွင့်ပြုထားသည့် မြန်မာနိုင်ငံသား ရင်းနှီးမြှုပ်နှံမှုပမာဏတွင် ခွင့်ပြုပြီးလုပ်ငန်းများမှ ရင်းနှီး မြှုပ်နှံမှုတိုးမြှင့်ခြင်း၊ ခွင့်ပြုပြီးလုပ်ငန်းများမှ ရင်းနှီးမြှုပ်နှံမှုလျှော့ချခြင်းတို့လည်း ပါဝင်ကြောင်း သိရသည်။
နိုင်ငံသား ရင်းနှီးမြှုပ်နှံသူများသည် နိုင်ငံအတွင်း ရင်းနှီးမြှုပ်နှံရာတွင် ကင်းလွတ်ခွင့်၊ သက်သာခွင့်များရရှိရန်အတွက် မြန်မာ နိုင်ငံ ရင်းနှီးမြှုပ်နှံမှုကော်မရှင်မှ ခွင့်ပြုမိန့်ရှိရမည်ဖြစ်ကြောင်း သိရသည်။
ယခင် ရင်းနှီးမြှုပ်နှံမှုလုပ်ငန်းများ ဆောင်ရွက်မည်ဆိုပါက မြန်မာနိုင်ငံရင်းနှီးမြှုပ်နှံမှု ကော်မရှင်သို့သာ တင်ပြလျှောက်ထားခဲ့ရသော်လည်း ယခုအခါတွင် အမေရိကန်ဒေါ်လာ ငါးသန်း သို့မဟုတ် ကျပ်သန်း ၆၀၀၀ အထိ မတည်ပြီး ရင်းနှီးမြှုပ်နှံမည့်လုပ်ငန်းများကို တိုင်းဒေသကြီးနှင့် ပြည်နယ်ရင်းနှီးမြှုပ်နှံမှု ကော်မတီများမှ အတည်ပြုမိန့် ထုတ်ပေးနိုင်ကြောင်း မြန်မာနိုင်ငံရင်းနှီးမြှုပ်နှံမှု ကော်မရှင်က ထုတ်ပြန်ခဲ့ပြီးဖြစ်ကြောင်း သိရသည်။
ပြည်နယ်/တိုင်းဒေသကြီးဝန်ကြီးချုပ်များ ဥက္ကဋ္ဌအဖြစ်ပါဝင်သည့် ပြည်နယ်နှင့် တိုင်းဒေသကြီး ရင်းနှီးမြှုပ်နှံမှုကော်မတီများကို မြန်မာနိုင်ငံရင်းနှီးမြှုပ်နှံမှုကော်မရှင်က ၂၀၁၇ ခုနှစ် ဇူလိုင်လအတွင်း ဖွဲ့စည်းပေးခဲ့ ပြီး ဖြစ်ကြောင်း သိရသည်။ ရင်းနှီးမြှုပ်နှံမှု ကော်မတီများကို ပြည်နယ်နှင့် တိုင်းဒေသကြီး ၁၄ ခုနှင့် နေပြည်တော်ကောင်စီတို့အတွက် ဖွဲ့စည်းပေးခဲ့ခြင်းဖြစ်ကြောင်း သိရသည်။
