တာချီလိတ်နယ်စပ် တစ်နေရာတွင် တရားမဝင် ကုန်သွယ်မှုတားဆီးရေးအတွက် သက်ဆိုင်ရာက စစ်ဆေးနေသည်ကို တွေ့ရစဉ်
မူးယစ်ဆေးဝါး ရောင်းဝယ်မှု၊ လက်နက်နှင့် အခြားမှောင်ခိုမှုများ အပါအဝင် တရားမဝင်ကုန်သွယ်မှုများကို ကာကွယ်တားဆီးနိုင်ရန် မြန်မာ-လာအို ဗဟိုအဆင့် နယ်ခြားကော်မတီက ဆောင်ရွက်သွားမည်ဖြစ်ကြောင်း အဆိုပါကော်မတီမှ သိရသည်။
မြန်မာ-လာအို ဗဟိုအဆင့် နယ်ခြားကော်မတီ (မြန်မာဘက်) ကို ဧပြီလအတွင်းက ဖွဲ့စည်းထားပြီး ယင်းကော်မတီတွင် ပြည်သူ့စစ်နှင့် နယ်ခြားတပ်များ ညွှန်ကြားရေးမှူးရုံး၊ ကာကွယ်ရေးဝန်ကြီးဌာနမှ နိုင်ငံတကာနှင့် ပြည်တွင်းရေးရာဦးစီးဌာန၊ မြန်မာနိုင်ငံရဲတပ်ဖွဲ့ဌာနချုပ် နိုင်ငံဖြတ်ကျော်မှုခင်းဌာနကြီး၊ စစ်ဥပဒေချုပ်ရုံး၊ တပ်မတော်စစ်ဘက်ရေးရာ လုံခြုံရေးအရာရှိချုပ်ရုံး၊ ကာကွယ်ရေးဦးစီးချုပ်ရုံး (ရေ)၊ ကာကွယ်ရေးဦးစီးချုပ်ရုံး (ကြည်း) စစ်ဆင်ရေးဌာနခွဲ၊ မြန်မာစစ်သံ (ကြည်း၊ ရေ၊ လေ) ရုံး၊ ဗီရန်ကျင်းမြို့၊ တြိဂံတိုင်းစစ်ဌာနချုပ်၊ အမှတ် (၁၈) စစ်ဆင်ရေးကွပ်ကဲမှုဌာနချုပ်၊ စစ်ဗျူဟာအဖွဲ့ (အခြေချ) (တာချီလိတ်)၊ နိုင်ငံခြားရေးဝန်ကြီးဌာန၊ ပြည်ထဲရေးဝန်ကြီးဌာနတို့မှ တာဝန်ရှိသူများ ပါဝင်ကြောင်း သိရသည်။
မြန်မာ-လာအို ဗဟိုအဆင့် နယ်ခြားကော်မတီသည် နိုင်ငံတကာနှင့် ဒေသတွင်းအေးချမ်းတည်ငြိမ်မှုနှင့် လုံခြုံမှုများကို သက်ရောက်မှုရှိနေသည့် အပြောင်းအလဲများနှင့် ပဋိပက္ခများတွင် ရင်ဆိုင်ကြုံတွေ့နေရသည့် ရှုပ်ထွေးစိုးရိမ်ရမှု အခြေအနေများနှင့် စပ်လျဉ်း၍ အမြင်ယူဆချက်ကို မျှဝေခြင်း၊ နှစ်နိုင်ငံနယ်စပ်များဖြစ်သော လာအိုနိုင်ငံ လွမ်နမ့်ထာနှင့် ဘော်ကဲအိုပြည်နယ်များနှင့် မြန်မာနိုင်ငံ ရှမ်းပြည်နယ်တို့ အကြား နယ်စပ်ဒေသငြိမ်းချမ်းရေး၊ တည်ငြိမ်ရေး၊ လုံခြုံရေးကဏ္ဍများတွင် ပူးပေါင်းကာကွယ်စောင့်ရှောက်ရေးကို တိုးမြှင့်ဆောင်ရွက်ခြင်းတို့ကို ဆောင်ရွက်မည်ဖြစ်ကြောင်း သိရသည်။
ထို့ပြင် နယ်စပ်ဖြတ်ကျော် မှုခင်းများဖြစ်သော မူးယစ်ဆေးဝါး ရောင်းဝယ်မှု၊ လူကုန်ကူးမှု၊ တရားမဝင် ရွှေ့ပြောင်းနေထိုင်မှု၊ တောရိုင်းတိရစ္ဆာန်များနှင့် သဘာ၀ သယံဇာတများခိုးထုတ်မှု၊ ရှေးဟောင်းပစ္စည်းများ၊ လက်နက်နှင့် အခြားသော မှောင်ခိုမှုများ အပါအဝင် တရားမဝင်ကုန်သွယ်မှုများကို ကာကွယ်တားဆီးနိုင်ရေး၊ နှစ်နိုင်ငံနယ်စပ်တစ်လျှောက် တရားဥပဒေစိုးမိုးရေးနှင့် တည်ငြိမ်အေးချမ်းရေးတို့အတွက် နီးကပ်စွာပူးပေါင်း ဆောင်ရွက်ခြင်းတို့ကိုလည်း လုပ်ဆောင်သွားမည်ဖြစ်ကြောင်း သိရသည်။
အဆိုပါ ကော်မတီသည် မည်သည့် အဖျက်သမားများ သို့မဟုတ် အဖျက်အုပ်စုများကိုမျှ သက်ဆိုင်ရာ ပိုင်နက်နယ်နိမိတ်အတွင်း အခြေချ နေထိုင်မှုနှင့် လှုပ်ရှားမှုများ မပြုရန် ဆောင်ရွက်ခြင်း၊ မဲခေါင်မြစ်တစ်လျှောက်ရှိ မြန်မာ-လာအိုနယ်နိမိတ် မှတ်တိုင်များကို ပကတိအတိုင်း ထိန်းသိမ်းစောင့်ရှောက်ရန်၊ ပြန်လည်သတ်မှတ်ရန်၊ ပြုပြင်ရန်နှင့် တည်ဆောက်ရန်တို့ကို လိုအပ်ပါက ပူးတွဲလေ့လာဆန်းစစ်မှုပြုရေး ညှိနှိုင်း ဆောင်ရွက်ခြင်း၊ နယ်စပ်တစ်လျှောက် လူသားချင်းစာနာထောက်ထားမှုဆိုင်ရာ အကူအညီနှင့် သဘာ၀ ဘေးအန္တရာယ်ကူညီရေးကိစ္စများတွင် ပူးပေါင်းဆောင်ရွက်ခြင်းတို့ကိုလည်း ဆောင်ရွက်မည်ဖြစ်ကြောင်း သိရသည်။
