ရန်ကုန်မြို့ရှိ Money Changer တစ်ခုတွင် ဇွန် ၂၈ ရက် ညနေပိုင်းက ငွေကြေးလဲလှယ်မှုဈေးနှုန်းများ ဖော်ပြထားသည်ကို တွေ့ရစဉ် (ဓာတ်ပုံ-အောင်မျိုးသန့်)

ကမ္ဘာ့ဈေးကွက်တွင် ဒေါ်လာဈေးဆက်လက် အားကောင်းနေသောကြောင့် ပြည်တွင်းဈေးကွက်တွင် နိုင်ငံခြားငွေလဲနှုန်း နှစ်ပတ်ကျော်အတွင်း ကျပ် ၆၀ ခန့် မြင့်တက်ခဲ့ပြီး တစ်ဒေါ်လာ ၁၄၀၇ ကျပ်အထိ ရောက်ခဲ့ကာ စံချိန်တင်ဈေးနှုန်းကို ချိုးနိုင်ရန် ကျပ် ၃၀ ကျော်သာလိုကြောင်း ဈေးကွက်အတွင်း နိုင်ငံခြားငွေကြေး ရောင်းဝယ်နေသူများထံမှ သိရသည်။

အမေရိကန်-တရုတ် ကုန်သွယ်ရေးပဋိပက္ခ အရှိန်သည် ဆက်လက်ကြီးထွားနေဆဲဖြစ်ခြင်းကြောင့် ဒေါ်လာသည် ဆက်လက် အားကောင်းနေပြီး ဈေးကွက်၏ အဓိကကုန်စည်ဖြစ်သော ရွှေမှာ နာလန်မထူနိုင်ဘဲ ဖြစ်နေသည်။ အမေရိကန်လွှတ်တော်၏ တရုတ်ရင်းနှီးမြှုပ်နှံမှု ကန့်သတ်ရန် အားထုတ်မှုက တရုတ်-အမေရိကန် ကုန်သွယ်ရေး အငြင်းပွားမှုကို အားကောင်းစေခြင်းကြောင့် ဒေါ်လာသည် အမြင့်တန်းတွင် ဆက်လက်ရှိနေခြင်းဖြစ်သည်။ အမေရိကန်သမ္မတ ဒေါ်နယ်ထရမ့်က တရုတ်၏ အမေရိကန်နည်းပညာ စုဆောင်းမှုကို တားမြစ်ရန် အားကောင်းသော အမျိုးသားလုံခြုံရေးလုပ်ငန်းစဉ်ကို အသုံးပြုမည်ဟု ပြောကြားမှုကို ဈေးကွက်ကို သက်ရောက်မှုရှိဦးမည်ဖြစ်ပြီး အမေရိကန်၏ မြင့်မားသော အတိုးနှုန်းနှင့် ငွေတိုက်စာချုပ် အတိုးနှုန်းများက ဒေါ်လာကို ဆက်လက်အားကောင်းစေဦးမည် ဖြစ်သည်။

၂၀၁၈ ခုနှစ် မေလမှစတင်ကာ ကမ္ဘာ့ဒေါ်လာဈေး အညွှန်းကိန်း သိသိသာသာ ပြန်လည်မြင့်တက်ခဲ့ခြင်းဖြစ်ပြီး ပြည်တွင်းဈေးကွက်၌ ငါးလအတွင်း လအလိုက်ဖြစ်ပေါ်သော နိုင်ငံခြားငွေလဲနှုန်း အနိမ့်ဆုံးနှင့် အမြင့်ဆုံးနှုန်းများမှာ ဇန်နဝါရီတွင် ၁၃၂၃-၁၃၅၄ ကျပ်၊ ဖေဖော်ဝါရီလတွင် ၁၃၂၃-၁၃၃၁ ကျပ်၊ မတ်လတွင် ၁၃၂၆-၁၃၃၄ ကျပ်၊ ဧပြီလတွင် ၁၃၂၄-၁၃၃၂ ကျပ်၊ မေလတွင် ၁၃၃၂-၁၃၅၁ တို့ဖြစ်ပြီး ဇန်နဝါရီတွင် ကွာဟချက် အများဆုံး ဖြစ်ပေါ်ခဲ့သည်။

ပြီးခဲ့သည့် မတ်လအတွင်း အမြင့်ဆုံး ဈေးနှုန်းအဖြစ် မတ် ၂၁ ရက်တွင် ၁၃၃၄ ကျပ် ဖြစ်ပေါ်ခဲ့သော ဒေါ်လာဈေးသည် မတ် ၂၉ ရက်တွင် ၁၃၂၈ ကျပ်အထိ၊ ဧပြီလဆန်းတွင် ၁၃၂၄ ဝန်းကျင်အထိ ကျဆင်းခဲ့သည်။ ထို့နောက် ဧပြီ ၂၈ ရက်တွင် ၁၃၃၁ ကျပ်၊ မေ ၂၁ ရက်တွင် ၁၃၅၁ ကျပ်အထိ မြင့်တက်ခဲ့ပြီး ဇွန် ၁၁ ရက်တွင် ၁၃၄၆ ကျပ်၊ ဇွန် ၁၅ ရက်တွင် ၁၃၅၅ ကျပ်၊ ဇွန် ၁၆ ရက်တွင် ၁၃၆၅ ကျပ်၊ ဇွန် ၂၀ ရက်တွင် ၁၃၆၈ ကျပ်၊ ဇွန် ၂၁ ရက်တွင် ၁၃၇၅ ကျပ်၊ ဇွန် ၂၆ ရက်တွင် ၁၃၈၃၊ ဇွန် ၂၇ ရက်တွင် ၁၃၉၅၊ ဇွန် ၂၈ ရက်တွင် ၁၄၀၇ ကျပ်ဝန်းကျင် ဖြစ်ပေါ်ခဲ့သည်။ ဇွန် ၂၈ ရက်တွင် သတ်မှတ်ထားသော ဗဟိုဘဏ် ရည်ညွှန်းငွေလဲနှုန်းမှာ ၁၃၉၅ ကျပ် ဖြစ်ကြောင်း သိရသည်။

၂၀၁၆ ခုနှစ် ဒီဇင်ဘာ ၁၆ ရက်တွင် သမိုင်းတစ်လျှောက် အမြင့်ဆုံးငွေလဲနှုန်းထား အဖြစ် ၁၄၃၈ ကျပ်အထိ ရောက်ရှိခဲ့ပြီး ၂၀၁၈ ခုနှစ် ဇွန် ၂၈ ရက်တွင် ဖြစ်ပေါ်သော တစ်ဒေါ်လာ ၁၄၀၇ ကျပ် ဈေးနှုန်းသည် ၂၀၁၆ ခုနှစ် ဒီဇင်ဘာနောက်ပိုင်း အမြင့်ဆုံးဈေးနှုန်း ဖြစ်သည်။

ပြည်တွင်းဈေးကွက်အတွင်း ဇွန် ၂၈ ရက်တွင် ဖြစ်ပေါ်သော အခြားနိုင်ငံခြားငွေကြေးများ၏ လဲလှယ်မှုနှုန်းထားများမှာ ယူရို ၁၆၂၅ ကျပ်၊ စင်ကာပူဒေါ်လာ ၁၀၂၅ ကျပ်၊ မလေးရှားရင်းဂစ် ၃၄၂ ကျပ်၊ ထိုင်းဘတ် ၄၂ ဒသမ ၆၅ ကျပ်၊ တရုတ်ယွမ် ၂၁၁ ကျပ်၊ ဂျပန်ယန်း ၁၂ ဒသမ ၆၀ ကျပ်၊ တောင်ကိုရီးယားဝမ် ၁ ဒသမ ၂၈ ကျပ်ဖြစ်ပြီး ဇွန် ၂၆ ရက်နှင့်နှိုင်းယှဉ်ပါက ယူရို ၁၅ ကျပ်၊ စင်ကာပူဒေါ်လာ ငါးကျပ်မြင့်တက်ခဲ့သည်။