တနင်္သာရီတိုင်းဒေသကြီး ထားဝယ်ခရိုင်မှ မြန်မာ-ထိုင်း နယ်စပ်ဂိတ် ထီးခီးနယ်စပ်ရှိ ဌာနဆိုင်ရာ အရာရှိအချို့ အဂတိလိုက်စားနေကြောင်း တိုင်ကြားထားမှုနှင့် ပတ်သက်၍ စုံစမ်းစစ်ဆေးရာ၌ တိုင်ကြားသူ၏ နေရာလိပ်စာများ မှားယွင်းနေသော်လည်း တိုင်ကြားစာတွင် ပါဝင်သည့် Resort ၌ တရားမဝင် ကာစီနိုလုပ်ငန်းများ ဆောင်ရွက်နေသည်ကို တွေ့ရှိထားကြောင်း စုံစမ်းစစ်ဆေးရေးအဖွဲ့မှ သိရသည်။
ပြီးခဲ့သည့် ဧပြီလကုန်ပိုင်းက နိုင်ငံတော်သမ္မတ ဦးဝင်းမြင့်ထံ လိပ်မူ၍ မင်းဇေခ အမည်ရှိ ဒေသခံတစ်ဦးက တိုင်ကြားခဲ့သည့် တိုင်ကြားစာအပေါ် စုံစမ်းစစ်ဆေးရန် တိုင်းဒေသကြီးအစိုးရအဖွဲ့က မေ ၂၉ ရက်တွင် ညွှန်ကြားသဖြင့် ဇွန် ၄ ရက်တွင် အဖွဲ့ဝင် သုံးဦးပါ စုံစမ်းစစ်ဆေးရေးအဖွဲ့ကို ဖွဲ့စည်းပြီးနောက် တိုင်ကြားသူများနှင့် တိုင်ကြားခံရသူများအား ခေါ်ယူ စစ်ဆေးခဲ့ကြောင်း၊ လက်ရှိတွင် တိုင်ကြားခံရသူ ငါးဦးဖြစ်သည့် ထီးခီးဒေသတွင် တာဝန်ကျနေသော ကုန်သွယ်ရေးဦးစီးဌာန၊ လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာန၊ အကောက်ခွန်ဦးစီးဌာန၊ အထွေထွေအုပ်ချုပ်ရေးဦးစီးဌာနမှ တာဝန်ရှိသူများ နှင့် Power Nine ကုမ္ပဏီတိ့ုမှ တာဝန်ရှိသူများကို ခေါ်ယူ စစ်ဆေးပြီးဖြစ်ကာ တိုင်ကြားသူများ၏ နေရပ်လိပ်စာများနှင့် မှတ်ပုံတင်အမှတ်များကို မှန်မမှန် စစ်ဆေးရာတွင် အမည်နှင့်နေရပ်လိပ်စာ မှားယွင်းနေသည်ကို တွေ့ရှိခဲ့ရသော်လည်း တိုင်ကြားစာတွင် ပါဝင်သည့် Resort များ၌ ကာစီနို လောင်းကစားဝိုင်းများ ရှိနေကြောင်းကိုမူ စုံစမ်းစစ်ဆေးရာ၌ တွေ့ရှိရသည်ဟု စုံစမ်းစစ်ဆေးရေးအဖွဲ့ ခေါင်းဆောင် ထားဝယ်ခရိုင် အုပ်ချုပ်ရေးမှူးက ပြောကြားသည်။
“အခုကတော့ စစ်နေတုန်းပဲ။ မနေ့ကတော့ ထီးခီးက ရာအိမ်မှူးနဲ့ ဆယ်အိမ်မှူးတွေကို ခေါ်စစ်ပြီးပြီ။ နောက် အတိုင်ခံရတဲ့သူ ငါးယောက်ရယ်၊ လက်ရှိ ခရိုင်မြေစာရင်း ဦးစီးမှူးအဖြစ် တာဝန်ယူနေတဲ့သူရယ် စစ်ပြီးသွားပြီ။ တိုင်တဲ့သူက တစ်ယောက်မှ ရှာလို့မရဘူး။ တိုင်တဲ့သူရယ် တိုင်ကြားစာကို ထောက်ခံတဲ့သူ ၁၄ ယောက်ကို တိုင်ကြားစာမှာ ပါတဲ့အတိုင်း ခရိုင်လဝကကို ပေးလိုက်ပြီး စိစစ်ခိုင်းလိုက်တယ်။ စိစစ်တော့ တိုင်ကြားစာမှာ ပါတဲ့လူနာမည်၊ အဖေနာမည်၊ မှတ်ပုံတင်နဲ့ နေရပ်လိပ်စာတွေက အကုန်လုံး မှန်ကန်မှု မရှိပါဘူးလို့ အထောက်အထားနဲ့ ပြန်ကြားလာတယ်။ အဲဒါကြောင့် တိုင်တယ်ဆိုတဲ့သူကို ရှာလို့မရဘူး ဖြစ်နေတယ်။ Resort တွေ ဆောက်ထားတာနဲ့ ပတ်သက်ပြီး ခွင့်ပြုထားခြင်း ရှိ မရှိ အသေးစိတ်ကို ဟိုတယ်၊ခရီး ဆီမေးထားတယ်။ တိုင်စာထဲမှာပါတဲ့ Resort က ဘန်ဂလိုတွေရဲ့နောက်မှာ ကာစီနိုပါ တွဲဖွင့်ထားတာ။ လာရောက် စစ်ဆေးခံသူတွေဆီကနေ တောင်းခံရရှိတဲ့ ဓာတ်ပုံ မှတ်တမ်းတွေအရ တွေ့ရတယ်။ နောက် Resort တစ်ခုမှာကတော့ ကာစီနိုလုပ်ဖို့ စီစဉ်နေတုန်းဆိုပြီး တွေ့ရတယ်။ စစ်ဆေး တွေ့ရှိချက်တွေကိုတော့ တိုင်းဒေသကြီးအစိုးရဆီ တင်ပြသွားမယ်” ဟု စုံစမ်းစစ်ဆေးရေး အဖွဲ့ခေါင်းဆောင် ထားဝယ်ခရိုင် အုပ်ချုပ်ရေးမှူး ဦးမောင်မောင်ဇင်က ပြောကြားသည်။
ထားဝယ်ခရိုင်ရှိ မြန်မာ-ထိုင်း နယ်စပ်ဂိတ် တစ်ခုဖြစ်သော ထီးခီးနယ်စပ်တွင် တရားမဝင် ကာစီနိုဝိုင်းများ ဖွင့်လှစ်၍ ဘတ်ငွေ သန်းချီ ရယူမှုနှင့် နယ်စပ် အဝင်အထွက်၌ လူတစ်ဦး ဘတ်ငွေ ၄၀၀၀ ရယူထားကြောင်း နိုင်ငံတော်သမ္မတ ဦးဝင်းမြင့်ထံ တိုင်ကြားခဲ့သည့် မင်းဇေခပါ ၁၅ ဦး၏ အမည်၊ မှတ်ပုံတင် နှင့် နေရပ်လိပ်စာများ မှားယွင်းနေသည့်အပြင် ယင်းအနက် တစ်ဦး၏ မှတ်ပုံတင် နံပါတ်မှာ လဝကမှ တရားဝင် အသုံးပြုခြင်း မရှိသေးသည့် နံပါတ်ဖြစ်ကြောင်း၊ ယင်းသို့ တိုင်ကြားသူကို စုံစမ်းရှာဖွေ၍ မရရှိသောကြောင့် စစ်ဆေးမှုအပိုင်းတွင် အခက်အခဲများ ဖြစ်ပေါ်သော်လည်း တိုင်ကြားသူအား မတွေ့ရှိသဖြင့် စစ်ဆေးမှုကို မရပ်တန့်ဘဲ တိုင်ကြားစာအတွင်း ပါဝင်သည့်အချက်များ မှန် မမှန် ဆက်လက် စုံစမ်းစစ်ဆေးနေသည်ဟု ၎င်းက ဆက်လက်ပြောကြားသည်။ စုံစမ်း စစ်ဆေးချက်များအရ တိုင်ကြားစာတွင် ပါဝင်သည့် ဘန်ဂလို ၂၅ လုံးပါ Resort တစ်ခုတွင် ကာစီနိုဝိုင်းများ ရှိနေကြောင်း တွေ့ရှိရပြီး နောက်ထပ် Resort တစ်ခုတွင်မူ ကာစီနို လောင်းကစားဝိုင်း ပြုလုပ်ရန် စီစဉ်နေဆဲ အခြေအနေရှိသည်ကို တွေ့ရှိခဲ့ရကြောင်း၊ ၎င်း Resort နှင့် ကာစီနိုဝိုင်းများမှာ ပြီးခဲ့သည့် ဧပြီ ၁၄ ရက်က တိုင်းဒေသကြီး ရဲတပ်ဖွဲ့မှ ဒုရဲမှူးကြီးနှင့်အဖွဲ့က ထီးခီးဒေသ၌ တရားဝင်ခွင့်ပြုချက်မရှိဘဲ Resort များ ဆောက်လုပ်မှုကို သွားရောက် စစ်ဆေးပြီး လက်ရှိ ရပ်နားထားကြောင်း၊ ထို့ပြင် နယ်စပ်အဝင်အထွက်၌ လူတစ်ဦးလျှင် ဘတ်ငွေ ၄၀၀၀ ရယူကြောင်းကို စုံစမ်းရာ၌လည်း ငွေပေးရကြောင်း တွေ့ရှိထားပြီ စုံစမ်းစစ်ဆေးရာ၌ တွေ့ရှိချက်များ အားလုံး တိုင်းဒေသကြီး အစိုးရအဖွဲ့ထံ တင်ပြမည်ဖြစ်ကြောင်း သိရသည်။
