ကြားဖြတ်ရွေးကောက်ပွဲတွင် ဆန္ဒမဲပေးပိုင်ခွင့်ရှိသည့် ဂျပန်ရောက် မြန်မာနိုင်ငံသားများအနေဖြင့် ကြိုတင်မဲပေးရန် ပုံစံ (၁၅) ကို ပြည့်စုံစွာဖြည့်စွက်၍ သံရုံးသို့ ဇူလိုင် ၉ ရက်အရောက်ပေးပို့ရန် ဂျပန်နိုင်ငံဆိုင်ရာ မြန်မာသံရုံးက ထုတ်ပြန်ထားသည်။

ကြိုတင်ဆန္ဒမဲပေးနိုင်ရေးအတွက် သက်ဆိုင်ရာမဲဆန္ဒနယ် ပြင်ပရောက်ဆန္ဒမဲပေး ပိုင်ခွင့်ရှိသူများနှင့်ပတ်သက်၍ ဖြည့်သွင်းရန် ပုံစံ (၁၅) တွင် ဖြည့်စွက်၍ ပေးပို့ရမည်ဖြစ်ပြီး ပုံစံ (၁၅) ကို သံရုံး၏ဝက်ဘ်ဆိုက်၊ Facebook တို့တွင် ရယူနိုင်ကြောင်းနှင့် ကောင်စစ်ဌာနစိတ်တွင်လည်း ရယူနိုင်ကြောင်း မြန်မာသံရုံးက ထုတ်ပြန်ထားသည်။

ထို့ပြင် ကြိုတင်ဆန္ဒမဲပေးပိုင်ခွင့်ရှိသည့် ပြည်ပရောက် မြန်မာနိုင်ငံသားများ (နိုင်ငံတော်မှ တရားဝင်ထုတ်ပေးထားသော သက်တမ်းရှိ နိုင်ငံကူးလက်မှတ်ကိုင်ဆောင်ထားသူများ) မှ ပုံစံ (၁၅) များ ဖြည့်စွက်ရာ၌ ပုံစံပါ အချက်အလက်များအား ပြည့်စုံမှန်ကန်စွာ ဖြည့်စွက်ပေးနိုင်ပါရန် အထူးသဖြင့် တောင်းဆိုသူ၏ အမည်၊ မှတ်ပုံတင်အမှတ်၊ မွေးသက္က ရာဇ် (အသက်)၊ ကျေးရွာ/ရပ်ကွက်/ကျေးရွာအုပ်စု၊ မြို့နယ်၊ တိုင်းဒေသကြီး/ပြည်နယ်တို့ကို မှန်ကန်ပြည့်စုံစွာ ဖြည့်စွက်ပေးရန် မြန်မာသံရုံးက မေတ္တာရပ်ခံထားသည်။

ထို့အတူ ဂျပန်နိုင်ငံဆိုင်ရာ မြန်မာသံရုံးက ဆန္ဒမဲပေးပိုင်ခွင့်ရှိသည့် ပြည်ပရောက် နိုင်ငံသားများမှ အဆိုပါ ပုံစံ (၁၅) များကို မှန်ကန်ပြည့်စုံစွာ ဖြည့်စွက်၍ သက်တမ်းရှိသော မြန်မာနိုင်ငံကူးလက်မှတ်မိတ္တူ၊ အမြဲတမ်းနေရပ်လိပ်စာ၊ ဆက်သွယ်ရန်ဖုန်းနံပါတ်၊ အီးမေးလ်လိပ်စာများနှင့်အတူ စာတိုက်မှ မှတ်ပုံတင်ပြုလုပ်ပြီး မြန်မာသံရုံး တိုကျိုမြို့သို့ ဇူလိုင် ၉ ရက်အရောက် ပြန်လည်ပေးပို့ပေးရန် မေတ္တာရပ်ခံ အသိပေးကြေညာထားသည်။

ကြားဖြတ်ရွေးကောက်ပွဲ၌ ကြိုတင်ဆန္ဒမဲပေးမည့် စင်ကာပူရောက် မြန်မာနိုင်ငံသားများအနေဖြင့် ပုံစံ (၁၅) ကိုဖြည့်စွက်ကာ ဇွန် ၁၈ ရက်မှ ဇူလိုင် ၁၂ ရက်အတွင်း ပေးပို့ရမည် ဖြစ်ပြီး ကြိုတင်ဆန္ဒမဲပေးပွဲ၏ နေ့ရက်နှင့် အချိန်ကို ထပ်မံ ကြေညာမည်ဖြစ်ကြောင်း စင်ကာပူနိုင်ငံဆိုင်ရာ မြန်မာသံရုံးကလည်း ထုတ်ပြန်ကြေညာထားသည်။

ပြည်ထောင်စုရွေးကောက်ပွဲကော်မရှင်က ၂၀၁၈ ခုနှစ် ကြားဖြတ်ရွေးကောက်ပွဲကို နိုဝင်ဘာ ၃ ရက်တွင် လစ်လပ်မဲဆန္ဒနယ် ၁၃ နေရာ၌ ကျင်းပမည်ဖြစ်ကြောင်း ကြေညာထားသည်။

ကြားဖြတ်ရွေးကောက်ပွဲကျင်းပမည့် လစ်လပ်ပြည်သူ့လွှတ်တော် မဲဆန္ဒနယ်များမှာ ကန်ပက်လက်၊ လဲချား၊ တာမွေ၊ မြင်းခြံတို့ ဖြစ်ပြီး လစ်လပ်အမျိုးသားလွှတ်တော်မဲဆန္ဒနယ်မှာ ကချင်ပြည်နယ် အမျိုးသားလွှတ်တော် မဲဆန္ဒနယ်အမှတ် (၂) (အကျုံးဝင်သော မြို့ နယ်မြစ်ကြီးနား) ဖြစ်သည်။

ထို့အတူ တိုင်းဒေသကြီးလစ်လပ်မဲဆန္ဒနယ်များမှာ တမူးမဲဆန္ဒနယ်အမှတ် (၂)၊  အုတ် တွင်းမဲဆန္ဒနယ် အမှတ် (၁)၊ သပိတ်ကျင်း မဲဆန္ဒနယ် အမှတ် (၁) နှင့် မန္တလေးတိုင်းဒေသကြီး ရှမ်းတိုင်းရင်းသားလူမျိုးရေးရာ မဲဆန္ဒနယ် (ရှမ်းတိုင်းရင်းသားလူမျိုးရေးရာဝန်ကြီး)၊ မင်းဘူးမဲဆန္ဒနယ်အမှတ် (၂) နှင့် ဆိပ်ကမ်းမဲဆန္ဒနယ် အမှတ် (၂) တို့ဖြစ်သည်။

ပြည်နယ်လွှတ်တော် လစ်လပ်မဲဆန္ဒနယ်များမှာ မတူပီမဲဆန္ဒနယ် အမှတ် (၁) နှင့် ရသေ့တောင်မဲဆန္ဒနယ် အမှတ် (၂) တို့ဖြစ်သည်။