#Breaking_News (7:00) PM

သမ္မတဟောင်းဦးဝင်းမြင့်နှင့် အတိုင်ပင်ခံပုဂ္ဂိုလ်ဟောင်းဒေါ်အောင်ဆန်းစုကြည်တို့ကို အကျဉ်းထောင်မှ လုံခြုံစိတ်ချရသည့် နေရာသို့ရွှေ့ပြောင်းထား ကြောင်း သတင်း ထွက်ပေါ်မှုအရ သိရသည်။

ဦးဝင်းမြင့်သည် တောင်ငူထောင်တွင်လည်းကောင်း၊ ဒေါ်အောင်ဆန်းစုကြည်သည် နေပြည်တော် အချုပ်ထောင်တွင် လည်းကောင်း အကျဉ်းကျခံနေရခြင်းဖြစ်သည်။

လတ်တလောတွင် ဖြစ်ပေါ်လျက်ရှိသည် ရာသီဥတုအပူရှိန်ပြင်းထန်မှုကြောင့် ၎င်းတို့နှစ်ဦးကို ကျန်းမာရေးအရ လုံခြုံစိတ်ချရသည့် နေရာတွင် ရွှေ့ပြောင်းထားကြောင်း Eleven Media Group က စုံစမ်းမှုများ အရသိရသည်။

ထိုသို့ ဦးဝင်းမြင့်နှင့် ဒေါ်အောင်ဆန်းစုကြည်တို့ကို နေရာရွှေ့ပြောင်းမှုနှင့် ပတ်သက်၍ နစက သတင်းထုတ်ပြန်ရေးအဖွဲ့က ထုတ်ပြန်ခြင်းမရှိသေးဘဲ သတင်းထုတ်ပြန်လာပါက ထပ်မံ ဖော်ပြပေးမည် ဖြစ်ပါသည်။

ယခုလဆန်းပိုင်းကလည်း မန္တလေးအိုးဘိုထောင်တွင် ထောင်ဒဏ်ကျခံနေရသည့် NLD ပါတီ သဘာပတိအဖွဲ့ဝင် ဦးဝင်းထိန်သည်လည်း အပူဒဏ်ကြောင့် မန္တလေးပြည်သူ့ဆေးရုံကြီးတွင် တက်ရောက်ဆေးကုသမှုခံယူခဲ့ရသည်။

ဦးဝင်းမြင့်အ​ပေါ် ရာဇသတ်ကြီး ပုဒ်မ ၅၀၅ (ခ)၊ ရာဇသတ်ကြီးပုဒ်မ ၁၃၀ (က) နှင့် သဘာဝ​ဘေးအန္တရာယ်ဆိုင်ရာစီမံခန့်ခွဲမှုဥပ​ဒေပုဒ်မ (၂၅) တို့ဖြင့် တရားစွဲဆို၍ ​ထောင် ဒဏ်ချမှတ်ထား​သော အမှုများအတွက် ပြင် ဆင်မှု​လျှောက်ထားခြင်းများကို ပြည်ထောင်စုတရားလွှတ်တော်ချုပ်က လက်ခံထားကြောင်း သိရသည်။

ထို့ပြင် ​ဒေါ်​အောင်ဆန်းစုကြည်အ​ပေါ် ရာဇသတ်ကြီးပုဒ်မ ၅၀၅ (ခ)၊ ဆက်သွယ်ရေး ဥပ​ဒေ ပုဒ်မ (၆၇)၊ ပို့ကုန်သွင်းကုန်ဥပ​ဒေ ပုဒ်မ (၈)၊ သဘာဝ​​ဘေးအန္တရာယ်ဆိုင်ရာစီမံ ခန့်ခွဲမှုဥပ​ဒေ ပုဒ်မ (၂၅) ဖြင့် တရားစွဲဆိုသည့် အမှုနှစ်မှု၊ အဂတိလိုက်စားမှုတိုက်ဖျက်​ရေး ဥပ​ဒေများဖြင့် တရားစွဲဆိုသည့်အမှုငါးမှုနှင့် ရာဇသတ်ကြီးပုဒ်မ ၁၃၀ (က) တို့အတွက် ​​ထောင်ဒဏ်ချမှတ်ထား​သော ​အမှုများနှင့်ပတ်သက်၍ ပြင်ဆင်မှု​လျှောက်ထားခဲ့​မှုများကိုလည်း ပြည်​ထောင်စုတရားလွှတ်တော် ချုပ်က လက်ခံထား​ကြောင်း သိရသည်။

အထက်ပါအမှုများတွင် ၂၀၂၁ ခုနှစ် ဖေဖော်ဝါရီ ၇ ရက်နှင့် ဖေဖော်ဝါရီ ၁၃ ရက်​တွင် NLD ပါတီဗဟိုအလုပ်အမှုဆောင်အဖွဲ့ က ထုတ်ပြန်ခဲ့သည့် ​ကြေညာချက်များနှင့်ပတ်သက်၍ ဦးဝင်းမြင့်နှင့် ဒေါ်အောင်ဆန်းစုကြည်တို့သည် ရာဇသတ်ကြီးပုဒ်မ ၅၀၅ (ခ) ဖြင့် တ​ပေါင်းတည်း တရားစွဲဆိုခံခဲ့ရပြီး​ ​ထောင်ဒဏ် နှစ်နှစ်စီ ချမှတ်ခံထားရသည့် အမှုများ၊ ၂၀၂၀ ပြည့်နှစ် စက်တင်ဘာ ၂၀ ရက်က နေပြည်တော်ကောင်စီနယ်မြေအတွင်း NLD ပါတီ၏ခရိုင်ပါတီဥက္ကဋ္ဌ ဦးမင်းသူ ဦးဆောင်၍ Car Campaign ပြုလုပ်ခဲ့ရာတွင် ဇမ္ဗူသီရိမြို့နယ်ရှိ အတိုင်ပင်ခံပုဂ္ဂိုလ် အိမ်ရာအနီးဖြတ်သန်းလှည့်လည်စဉ် COVID-19 ရောဂါ ဖြစ်ပွားမှုအပေါ်မူတည်၍ ထုတ်ပြန်ထားသောအမိန့်များအား လိုက်နာ ခြင်းမရှိဘဲ ကြိုဆိုနှုတ်ဆက်မှုများ ပြုလုပ်ခဲ့မှု စွဲချက်ဖြင့် ဦးဝင်းမြင့်နှင့် ​ဒေါ်​အောင်ဆန်းစုကြည်တို့အ​ပေါ် သဘာဝ​ဘေးအန္တရာယ်ဆိုင်ရာစီမံခန့်ခွဲမှုဥပ​ဒေ ပုဒ်မ (၂၅)ဖြင့် တရားစွဲဆိုပြီး ​ထောင်ဒဏ် နှစ်နှစ် စီချမှတ်ခံထား ရသည့်အမှုသည်လည်း  ပြင်ဆင်မှုတက်ထားသည့်အမှုများတွင် ပါဝင်ကြောင်း သိရသည်။

ထို့အတူ၂၀၂၀ ​ရွေး​ကောက်ပွဲတွင် ​ပြည်​ထောင်စု​ရွေး​ကောက်ပွဲကော်မရှင်(UEC)အား မလျော်သြဇာလွှမ်းမိုးခြင်းစွဲချက်ဖြင့် ဦးဝင်းမြင့်နှင့် ​ဒေါ်​အောင်ဆန်းစုကြည်တို့အ​ပေါ် ရာဇသတ်ကြီးပုဒ်မ ၁၃၀ (က) ဖြင့် တရားစွဲဆိုခဲ့ပြီး အလုပ်နှင့် ​ထောင်ဒဏ်သုံးနှစ်စီ ကျခံ​စေရန် အမိန့်ချမှတ်ထားသည့်အမှုကို သည်လည်း ပြင်ဆင်မှုတက်ထားသည့် အမှုများတွင် ပါဝင်​ကြောင်း သိရသည်။

ယင်းအပြင် ဒေါ်​အောင်ဆန်းစုကြည်အ​ပေါ် မြန်မာနိုင်ငံအစိုးရလျှို့ဝှက်ချက်များ အက်ဥပ​ဒေ ပုဒ်မ ၃(၁)(ဂ)/၉(အား​ပေးကူ ညီမှု)ဖြင့် တရားစွဲဆို၍ ထောင်ဒဏ် သုံးနှစ် ချမှတ်ထား​သောအမှု၊ ​ရွှေနှင့်​ဒေါ်လာများ ပေးခဲ့ရသည်ဆို​သော ရန်ကုန်တိုင်း​ဒေသကြီး ဝန်ကြီးချုပ်​​ဟောင်း ဦးဖြိုးမင်းသိန်း၏ ထွက်ဆိုချက်အရ အဂတိဖြင့်တရားစွဲဆိုခဲ့၍ ​ထောင်ဒဏ်ငါးနှစ်ချမှတ်ထား​သောအမှု၊ ​နေပြည်​တော် ​ဒေါ်ခင်ကြည်​ဖောင်​ဒေးရှင်းက ​ဆောင်ရွက်သည့် စီမံကိန်းများအတွက် ​မြေကွက်များလျှောက်ထားရယူမှုများနှင့်ပတ်သက်၍ အဂတိဖြင့်တရားစွဲဆို၍ ​တစ်​ပေါင်းတည်း​ ထောင်ဒဏ်သုံးနှစ်ချမှတ်ထား​သော အမှု၊ ရန်ကုန်မြို့တွင် ​ဒေါ်ခင်ကြည်​ဖောင်​ဒေးရှင်းရုံးချုပ် ​​မြေ​နေရာရယူမှုအ​ပေါ်အဂတိဖြင့် တရားစွဲဆို၍ ထောင်ဒဏ်သုံးနှစ်ချမှတ်ထားသောအမှုများနှင့် လက်တလောတွင် မြန်မာနိုင်ငံ၌ ဖြစ်ပေါ်နေသည့် ရာသီဥတုအခြေအနေသည် အယ်လ်နီညို ကျရောက်နေသည့်နှစ်ဖြစ်ခြင်းကြောင့် ပူပြင်းသည့်အတွက် ကျန်းမာရေးအရ ဦးဝင်းမြင့်နှင့် ဒေါ်အောင်ဆန်းစုကြည်တို့အား အကျဉ်းထောင်မှ အခြားနေရာသို့ ပြောင်းရွှေ့ထားခြင်းဖြစ်ကြောင်း စုံစမ်းသိရှိရသည်။

လက်ရှိတွင် သမ္မတဟောင်း ​ဦးဝင်းမြင့်သည် တရားစွဲဆိုခံထားရသည့် အမှု​ပေါင်း ၈ မှုဖြင့် ​ထောင်ဒဏ် ၁၄ နှစ်နှင့် နိုင်ငံတော်၏အတိုင်ပင်ခံပုဂ္ဂိုလ်ဟောင်း ဒေါ်​အောင်ဆန်းစုကြည်သည် အမှု​ပေါင်း ၁၉ မှုဖြင့် ​ထောင်ဒဏ် ၃၂ နှစ် ချမှတ်ခံထားရပြီး ​၎င်းင်တို့နှစ်ဦး ချမှတ်ခံထားရသည့် ပြစ်ဒဏ်များမှ ထောင်ဒဏ် နှစ်နှစ်စီအား ၂၀၂၁ ဒီဇင်ဘာ ၆ ရက်တွင် ​ပြစ်ဒဏ်မှ ​လျော့ချ​ပေးခဲ့သလို ၂၀၂၃ ခုနှစ် သြဂုတ် ၁ ရက်တွင်လည်း ဒေါ်အောင်ဆန်းစုကြည်အား ထောင်ဒဏ် ၆ နှစ်နှင့် ဦးဝင်းမြင့်အား ထောင်ဒဏ် လေးနှစ် ထပ်မံ၍ လွတ်ငြိမ်းသက်သာခွင့်ပြုထားကြောင်း သိရသည်။