ကျောက်တော်မြို့နယ် နိဒင် IDP စခန်း ပိတ်သိမ်းနိုင်ရေး နေအိမ်ဆောက်လုပ်ပေးနေစဉ် (ဓာတ်ပုံ-အောင်သူရိန်)

ကျောက်တော်မြို့နယ် နိဒင် IDP စခန်း ပိတ်သိမ်းနိုင်ရေး အိမ်ထောင်စု ၈၀ ကျော်အတွက် နေအိမ်များ ဆောက်လုပ်နေပြီဖြစ်ကြောင်း သိရသည်။

အဆိုပါ ကျောက်တော်မြို့နယ် နိဒင် IDP စခန်းတွင် အိမ်ထောင်စု ၈၅ စုအတွက် နေအိမ် ၈၅ လုံး ဆောက်လုပ်ပေးနေခြင်းဖြစ် ပြီး လက်ရှိတွင် နေအိမ်ဆောက်လုပ်နေမှု ရာခိုင်နှုန်း ၅၀ အထိ ပြီးစီးနေပြီ ဖြစ်ကြောင်းနှင့် ဇွန်လထဲတွင် အိမ်ထောင်စုအားလုံး အပြီးပြောင်းရွှေ့ နေရာချထားပေးနိုင်မည် ဖြစ်ကြောင်း သိရသည်။

အိမ်ထောင်စု ၈၅ စု (လူဦးရေ ၅၈၁ ဦး) ရှိသည့် ကျောက်တော်မြို့နယ် နိဒင်ကျေးရွာ IDP စခန်း ပိတ်သိမ်းပြီး ကျေးရွာနှင့် တစ်ဆက်စပ်တည်းတွင် နေအိမ်များ ဆောက်လုပ်ပေးပြီး ပြန်လည် နေရာချထားမည် ဖြစ်ကြောင်း သိရသည်။

ထို့ပြင် ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည်ဖော်ဆောင်ရေး ကော်မတီမှ ညွှန်ကြားရေးမှူး ဒေါက်တာအောင်သူရိန်သည် မေ ၂၂ ရက်တွင် ကျောက်တော်မြို့နယ် နိဒင်ကျေးရွာ IDP စခန်း ပိတ်သိမ်းရေးအတွက် နေအိမ်များ ဆောက်လုပ်နေခြင်းကို ကွင်းဆင်းကြည့်ရှုခဲ့သည်။

နိုင်ငံတော် အတိုင်ပင်ခံရုံး ဝန်ကြီးဌာန ဒုတိယဝန်ကြီး ဦးခင်မောင်တင်နှင့် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန ဒုတိယဝန်ကြီး ဦးစိုး အောင်တို့သည် ရခိုင်ပြည်နယ် လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ဖုန်းတင့်နှင့် တာဝန်ရှိသူများနှင့်အတူ ဧပြီ ၅ ရက်က ကျောက်တော်မြို့နယ် နိဒင်ကျေးရွာ IDP စခန်းသို့ ရောက်ရှိပြီး စခန်းစီမံခန့်ခွဲမှု ကော်မတီဝင်များ၊ နိဒင်ကျေးရွာ တာဝန်ခံများ၊ စခန်းတွင်း နေထိုင်သူများနှင့် တွေ့ဆုံကာ IDP စခန်းကို ပိတ်သိမ်းပြီး ကျေးရွာနှင့် တစ်ဆက်စပ်တည်း ပြန်လည်နေရာချထားရေး အစီအစဉ်များ ဆွေးနွေးခဲ့ကြောင်း သိရသည်။

ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည် ဖော်ဆောင်ရေး ကော်မတီသည် ရခိုင်ပြည်နယ် အတွင်းရှိ IDP စခန်းများ ပိတ်သိမ်းနိုင်ရေးကို ဦးစားပေးအဖြစ် ဆောင်ရွက်လျက်ရှိရာ စစ်တွေမြို့ရှိ သက္ကယ်ပြင်စခန်း၊ မြေပုံမြို့ရှိ တောင်ပေါ်စခန်း၊ ကျောက်တော်မြို့ရှိ နိဒင်စခန်းများကို ပိတ်သိမ်းနိုင်ရေး ဆောင်ရွက်နေကြောင်းနှင့် စစ်တွေမြို့နယ်ရှိ ခေါင်းဒုက္ကာ(၁)နှင့် (၂) စခန်းများရှိ စခန်းတာဝန်ခံများ စခန်းတွင်း နေထိုင်သူများနှင့် တွေ့ဆုံပြီး စခန်းပိတ်သိမ်းနိုင်မည့် အခြေအနေများကို ကနဦး ညှိနှိုင်းဆွေးနွေးမှု စတင်နေပြီဖြစ်ကြောင်း သိရသည်။

အလားတူ ရခိုင်ပြည်နယ် မြေပုံမြို့ရှိ ဘင်္ဂါလီ IDP စခန်းပိတ်သိမ်းနိုင်ရေး နေအိမ်များ ဆောက်လုပ်ပေးမှု ဒုတိယအသုတ် နေအိမ် ၅၀ မကြာခင် ရက်ပိုင်း ဆောက်လုပ်ပြီးစီးမည် ဖြစ်ကြောင်း သိရသည်။

မစ္စတာ ကိုဖီအာနန်၏ နောက်ဆုံးအကြိမ် အစီရင်ခံစာ တင်သွင်းပြီးနောက်ပိုင်း ပိတ်သိမ်းပြီး IDP စခန်းသုံးခုမှာ ရမ်းဗြဲ၊ ကျောက်ဖြူနှင့် ပေါက်တောမြို့နယ်မှ စခန်းတစ်ခု ဖြစ်ကြောင်းနှင့် မကြာမီ ဆက်လက်ပိတ်ရန် ရှိနေသည့် IDP စခန်းလေးခုမှာ ကျောက်တော်မြို့နယ်မှ နိဒင်စခန်း၊ မြေပုံမြို့နယ်မှ တောင်ပေါ်စခန်းနှင့် စစ်တွေမြို့နယ်မှ သက္ကယ်ပြင်စခန်းနှင့် ခေါင်းဒုက္ကာစခန်းတို့ ဖြစ်ကြောင်း သိရသည်။ မြေပုံတောင်ပေါ်စခန်းတွင် မိသားစု ၆၄၂ စု (လူဦးရေ ၃၀၆၇ ဦး) ရှိကြောင်း သိရသည်။