မေ ၂၂ ရက်က ပြုလုပ်သည့် ရန်ကုန်တိုင်းဒေသကြီး လွှတ်တော်အစည်းအဝေး မစတင်မီ တွေ့ရစဉ် (ဓာတ်ပုံ- ပြည့်ဖြိုးအောင်)
ရန်ကုန်တိုင်းဒေသကြီးအတွင်း တာဝါတိုင် တည်ဆောက်ခြင်းနှင့် Fiber Network လုပ်ကိုင်ရန် ခွင့်ပြုချက် ရရှိထားသည့် ကုမ္ပဏီ ငါးခုသာရှိပြီး တရားဝင် ခွင့်ပြုချက်မရှိဘဲ လုပ်ကိုင်နေသော ကုမ္ပဏီများကို အရေးယူမည် ဖြစ်ကြောင်း ရန်ကုန်တိုင်းဒေသကြီး အစိုးရအဖွဲ့၊ လျှပ်စစ်၊ စက်မှုလက်မှုနှင့် လမ်းပန်းဆက်သွယ်ရေးဝန်ကြီး ဒေါ်နီလာကျော်က မေ ၂၂ ရက်တွင် ပြုလုပ်သည့် ဒုတိအကြိမ် ရန်ကုန်တိုင်းဒေသကြီးလွှတ်တော် ဆဋ္ဌမပုံမှန် အစည်းအဝေး (၃၀ ရက်မြောက်နေ့)တွင် ပြောကြားသည်။
အလုံမြို့နယ် မဲဆန္ဒနယ်အမှတ် (၁) လွှတ်တော်ကိုယ်စားလှယ် ဒေါ်ယဉ်ယဉ်မြင့်၏ “ရန်ကုန်တိုင်းဒေသကြီး အတွင်းရှိ အလုံမြို့နယ်နှင့် အခြားမြို့နယ်များတွင်ရှိသော ခံနိုင်ဝန်နှင့် မမျှအောင် ဆက်သွယ်ရေး တာဝါတိုင်များ ယိုင်လဲနေမှုကို ခိုင်ခံ့သောတိုင်များနှင့် အစားထိုး လဲလှယ်ပေးရန်၊ ရှုပ်ထွေးနေသော ဆက်သွယ်ရေး ကြိုးများကိုလည်း ရှင်းပေးရန်၊ နေရာမရွေး စွန့်ပစ်ထားသော အသုံးမပြုတော့သည့် တိုင်ဆွေး၊ တိုင်ဟောင်းများကို အမြန်ဆုံး ရှင်းလင်းပေးရန် အစီအစဉ် ရှိ မရှိ” မေးမြန်းမှုအား ပြန်လည်ဖြေကြားရာတွင် ဝန်ကြီးက ထည့်သွင်းပြောကြား ခဲ့ခြင်းဖြစ်သည်။
တာဝါတိုင်များ၊ ဆက်သွယ်ရေး Fiber Network များနှင့်ပတ်သက်၍ တစ်နိုင်ငံလုံး အတိုင်းအတာဖြင့် ရင်ဆိုင်ကြုံတွေ့နေရခြင်း ဖြစ်သည့်အတွက်၂၀၁၈ ခုနှစ် မေ ၉ ရက်က နေပြည်တော် ပို့ဆောင်ရေးနှင့် ဆက်သွယ်ရေး ဝန်ကြီးဌာန၏ အစည်းအဝေး ဆုံးဖြတ်ချက်အရ ဆက်သွယ်ရေး ညွှန်ကြားမှု ဦးစီးဌာနများကို တိုင်းနှင့် ပြည်နယ်များတွင် ရုံးခွဲများ ဖွင့်လှစ်ရန်နှင့် ဆက်သွယ်ရေး ညွှန်ကြားမှု ဦးစီးဌာနမှ တိုက်ရိုက် တိုင်းနှင့် ပြည်နယ် အစိုးရများနှင့် ပူးပေါင်း၍ အဆိုပါကိစ္စများ ဆောင်ရွက်သွားရန် ဆုံးဖြတ်ပြီးဖြစ်ကာ ၂၀၁၈ ခုနှစ် ဇွန်လမှစပြီး ရန်ကုန်တိုင်းဒေသကြီးအစိုးရ၊ အုပ်ချုပ်ရေး အဖွဲ့အစည်းများ၊ YESC၊ YCDC တို့ဖြင့် စီမံချက်တစ်ရပ်အနေဖြင့် ခံနိုင်ဝန်မမျှအောင် ယိုင်လဲနေသည့်ကိစ္စများ၊ ရှုပ်ထွေးနေသည့် ဆက်သွယ်ရေးကြိုးများကို ရှင်းလင်းပေးရန်၊ နေရာမရွေး စွန့်ပစ်ထားသည့် တိုင်ဆွေး၊ တိုင်ဟောင်းများကို စီမံချက်ချပြီး ဆောင်ရွက်မည်ဖြစ်ကြောင်း ဝန်ကြီး ဒေါ်နီလာကျော်က ပြောကြားသည်။
“ရန်ကုန်တိုင်းဒေသကြီးအတွင်း YESC နှင့် တရားဝင်စာချုပ် ချုပ်ဆိုပြီး ခွင့်ပြုချက် ရရှိထားသည့် ကုမ္ပဏီ သုံးခုရှိပါတယ်။ YCDC မှာတော့ ပြီးခဲ့တဲ့ ၂၀၁၇ ခုနှစ် ဒီဇင်ဘာလအထိ စာရင်းပေးပြီး ခွင့်ပြုချက ်ရရှိထားတဲ့ ကုမ္ပဏီနှစ်ခုပဲ ရှိပါတယ်။ YESC က ခွင့်ပြုထားတဲ့ ကုမ္ပဏီသုံးခုနဲ့ YCDC က ခွင့်ပြုထားတဲ့ ကုမ္ပဏီနှစ်ခုကလွဲရင် ကျန်တဲ့သူတွေက ကျွန်မတို့ တိုင်းဒေသကြီးအစိုးရ သို့မဟုတ် Right of Way Owner တွေရဲ့ တရားဝင်ခွင့်ပြုချက် မရှိဘဲနဲ့ လုပ်ကိုင်နေသူများ ဖြစ်ပါတယ်။ ကျွန်မတို့ အနေနဲ့လည်း YESC ကရော၊ YCDC ကရော ကြေငြာပြီးတော့ ကျွန်မတို့ဆီမှာ စာရင်းမသွင်းဘဲနဲ့ တရားမဝင် ဆက်သွယ်ရေးလုပ်ငန်း လုပ်နေတဲ့ ကုမ္ပဏီများကို အရေးယူ ဆောင်ရွက်သွားပါမယ်” ဟု ဝန်ကြီးဒေါ်နီလာကျော်က ပြောကြားသည်။
၂၀၁၇ ခုနှစ် ဒီဇင်ဘာလတွင် ရန်ကုန်တိုင်းဒေသကြီးအစိုးရ၏ ညွှန်ကြားချက်အရ YCDC မှ သတင်းစာများ၊ မြန်မာ့ရုပ်မြင်သံကြားမှ ကြော်ညာများ ထည့်သွင်းပြီး ဆက်သွယ်ရေး တာဝါတိုင်များ လုပ်ကိုင်နေသည့် ကုမ္ပဏီများကို YCDC သို့ ဆက်သွယ်၍ မှတ်ပုံတင်ရန်အတွက် ဖိတ်ခေါ်ခဲ့ကြောင်း၊ ၃၇ ဦးက လာရောက်စုံစမ်းပြီး လျှောက်လွှာဝယ်၍ ၂၁ ဦးက ပြန်လည် ဆက်သွယ်သည့်အတွက် အဆိုပါ ၂၁ ခုကို YCDC မှ ခေါ်ယူတွေ့ဆုံခဲ့ကြောင်း၊ ၂၀၁၈ ခုနှစ် ဧပြီလကုန်အထိ အမှန်တကယ် စာရင်းသွင်းထားသည့် ကုမ္ပဏီ ၁၀ ခုသာရှိပြီး အဆိုပါ ၁၀ ခုနှင့် ဆက်သွယ်ရေး လုပ်ငန်းများကို တရားဝင် လုပ်ကိုင်နိုင်ရန် ဆက်လက် ဆောင်ရွက်လျက်ရှိကြောင်း ဝန်ကြီးက ပြောကြားသည်။
ရန်ကုန်တိုင်းဒေသကြီးအတွင်း တာဝါတိုင် တည်ဆောက်ခြင်းနှင့် ပတ်သက်၍ အဆောက်အဦးတစ်ခု တည်ဆောက်သကဲ့သို့ ဆောင်ရွက်ရမည့် ဥပဒေများ ရှိသည့်အတွက် တာဝါတိုင် တည်ဆောက်ရေး စိစစ်ရေးအဖွဲ့ကို ရန်ကုန်တိုင်းဒေသကြီးအတွင်း ဖွဲ့စည်းထားပြီး တာဝါတိုင် တည်ဆောက်ရန်အတွက် ရန်ကုန်တိုင်းဒေသကြီး အစိုးရအဖွဲ့သို့ တရားဝင်ခွင့်ပြုမိန့် တောင်းခံရကြောင်း သိရသည်။
