တောင်ငူခရိုင် အုတ်တွင်းမြို့နယ်အတွင်း မျိုးစပါးပျိုးထောင်ရန် ထယ်ထိုးနေသည်ကို ယခုနှစ် ဇွန်လဆန်းပိုင်းက တွေ့ရစဉ် (ဓာတ်ပုံ - ဇော်ဝင်းချစ်)
တောင်သူလယ်သမားများနှင့် လယ်ယာသားငါး လုပ်ငန်းများအတွက် အာမခံဝန်ဆောင်မှုများ ဖော်ဆောင်ရေးဆိုင်ရာ လုပ်ငန်းညှိနှိုင်း အစည်းအဝေးကို သြဂုတ် ၁၉ ရက်က ရန်ကုန်မြို့ရှိ ကုန်သည်စက်မှု အသင်းချုပ်၌ ကျင်းပခဲ့ကြောင်း သိရသည်။
“တောင်သူလယ်သမား အသက်အာမခံစနစ် ပြန်လည်စတင် ဆောင်ရွက်ဖို့အာမခံလုပ်ငန်းကြီး ကြပ်ရေးဘုတ်အဖွဲ့က ခွင့်ပြုပေးလိုက်တာဟာ မြန်မာ့လယ်ယာကဏ္ဍနဲ့ ကျေးလက်ပြည်သူတွေအတွက် ကောင်းမွန်ပါတယ်။ ဧရာဝတီတိုင်းမှာ တောင်သူလယ်သမား နှီးနှော ဖလှယ်ပွဲတွေမှာ လယ်သမားကြီး တွေကလည်း ၎င်းတို့ငယ်ရွယ်စဉ်ကရှိခဲ့တဲ့ ဤစနစ်ကို ပြန်လည်ဖော်ဆောင် စေလိုကြပါတယ်။ တောင်သူလယ် သမားတွေနဲ့ တွေ့ဆုံဆွေးနွေးမှုများ က တောင်းဆိုကြတဲ့ လိုအပ်ချက်တွေကို မြန်မာနိုင်ငံ ဆန်စပါးအသင်းချုပ် (MRF) အနေနဲ့အမြဲအလေးပေးပြီး အစိုးရဌာနများနဲ့ ပေါ်လစီ ချမှတ်သူများကို တင်ပြတောင်းဆိုပါတယ်” ဟု ဦးရဲမင်းအောင်က ၎င်း၏ လူမှုကွန်ရက်စာမျက်နှာတွင် ဖော်ပြထားသည်။
ဆက်လက်ပြီး သဘာဝဘေးဒဏ်များမှ အာမခံပေးသည့် ဝန်ဆောင်မှုများ၊ သီးနှံအာမခံစနစ်များ ပေါ်ပေါက်လာစေရန် မြန်မာနိုင်ငံ ဆန်စပါးအသင်းချုပ်အနေဖြင့် ကြိုးပမ်းဆောင်ရွက်လျက်ရှိကြောင်း သိရသည်။
“သီးနှံအာမခံကတော့ လွှတ်တော်မှာ အတည်ပြုပြီးသွားပြီ။ ဝန်ကြီးဌာနက ဒါကိုဆောင်ရွက်ဖို့ရှိတယ်။ နောက်ပြီး မြန်မာ့အာမခံ လုပ်ငန်းကို ဂျပန်နိုင်ငံက ရာသီဥတုကို အခြေခံတဲ့ အာမခံစနစ် ဆောင်ရွက်ဖို့အတွက် အကြံပြုချက်တင်ပေး ထားတာရှိတယ်။ ဒါက အစိုးရကဆုံး ဖြတ်ဖို့၊ ဆုံးဖြတ်ပြီးရင် အာမခံလုပ်ငန်း ကြီးကြပ်ရေး ဘုတ်အဖွဲ့က ဆုံးဖြတ်ပြီးရင် စီမံကိန်းနှင့် ဘဏ္ဍာရေး ဝန်ကြီးဌာနက ဆုံးဖြတ်ပြီးရင် သီးနှံအာမခံစနစ်ကို စတင်နိုင်မယ့်အနေ အထားရှိပါတယ်” ဟု ဦးရဲမင်းအောင်က ပြောကြားသည်။
“ဒါပေမဲ့ ချက်ချင်းကြီး အာမခံစနစ်ဖွံ့ဖြိုးသွားဖို့ဆိုတာ မဖြစ်နိုင်သေးဘူး။ ကျွန်တော်တို့က ရာသီဥတုအခြေခံ အာမခံစနစ်နဲ့စမယ်။ ဒီကနေမှ မိုးခေါင်ရေရှား၊ အဲဒီကနေမှ ရေကြီးနစ်မြုပ်၊ အထွက်နှုန်းတို့ကို တစ်ဆင့်ပြီးတစ်ဆင့် လုပ်သွားရမှာပါ” ဟု ၎င်းကဆက်လက် ပြောကြားသည်။
သီးနှံအာမခံစနစ် ဖော်ဆောင်ရေးအတွက် လက်ရှိ မြန်မာနိုင်ငံ၏ အာမခံစနစ်အရ ပြည်တွင်းအာမခံ ကုမ္ပဏီများပင်လျှင် အကန့်အသတ်ဖြင့် လုပ်ကိုင်နေရကြောင်း၊ နိုင်ငံခြား အာမခံကုမ္ပဏီ အနေဖြင့် သီလဝါ အထူးစီးပွားရေးဇုန်တွင် ဂျပန်ကုမ္ပဏီတစ်ခုမှ လုပ်ကိုင်နေကြောင်း သိရသည်။
သီးနှံအာမခံစနစ်ကို ဆောင်ရွက်ရန်အတွက် လတ်တလောတွင် မြန်မာ့အာမခံ လုပ်ငန်းကသာ လုပ်ကိုင်နိုင်ကြောင်း၊ မြန်မာ့အာမခံလုပ်ငန်းက လုပ်ကိုင်ရန်အတွက် ဂျပန်အာမခံ လုပ်ငန်းဖြစ်သည့် ဆွန်ပိုမှ မိုးရေချိန်ကို အခြေခံသည့် အာမခံလုပ်ငန်း လုပ်ကိုင်ရန် ပြည်မြို့နှင့် ရွှေဘိုမြို့များတွင် စတင်စမ်းသပ် လုပ်ကိုင်ရန် တင်ပြထားကြောင်း သိရသည်။
တောင်သူများအတွက် သီးနှံအာမခံစနစ် ပေါ်ပေါက်လာရေးအတွက် ဆောင်ရွက်လျက်ရှိပြီး ၂၀၁၇- ၂၀၁၈ ဘဏ္ဍာနှစ်အတွင်း စတင်နိုင်ရန် မျှော်မှန်းထားကြောင်း မြန်မာနိုင်ငံ ဆန်စပါးအသင်းချုပ် အထွေထွေ အတွင်းရေးမှူး ဦးရဲမင်းအောင်က ၎င်း၏ လူမှုကွန်ရက်စာမျက်နှာတွင် ဖော်ပြထားသည်။
