အင်းစိန်မြို့နယ်တွင် အရက်မူးပြီး အော်ဟစ်နေသူအား မအော်ဟစ်ရန် သွားရောက်တားမြစ်သည့် အမျိုးသားတစ်ဦး ကတ်ကြေးဖြင့် အထိုးခံရမှု ဖြစ်ပွားခဲ့ကြောင်း သြဂုတ် ၁၉ ရက်တွင် ရန်ကုန်တိုင်းဒေသကြီး ရဲတပ်ဖွဲ့မှ စုံစမ်းသိရှိရသည်။
သြဂုတ် ၁၈ ရက် ည ၁၁ နာရီခန့်တွင် အင်းစိန်မြို့နယ် မြို့သစ် (ဂ) ရပ်ကွက်နေ ကို...(၃၈ နှစ်) သည် နေအိမ်၌ရှိနေစဉ် ၎င်းတို့နှင့် တစ်လမ်းတည်းနေ ကို...(၃၂ နှစ်) မှာ ၎င်းနေအိမ်ရှေ့မှ လမ်းဖြတ်လျှောက်သွားပြီး အရက်မူးပြီးအော်ဟစ်နေသဖြင့် မအော်ဟစ်ရန် သွားရောက်တားမြစ်ခဲ့ကြောင်း သိရသည်။
ထိုသို့တားမြစ်စဉ် ၎င်းတို့နှစ်ဦး စကားများပြီး ကို...(၃၈ နှစ်) က ကို... (၃၂ နှစ်) အား စတင်ပါးရိုက်ခဲ့ကြောင်း သိရသည်။
ပါးရိုက်ခံရသဖြင့် ကို... (၃၂ နှစ်) က အသင့်ပါလာသည့် အရှည်ရှစ်လက်မခန့်ရှိ ကော်ရိုးတပ်ကတ်ကြေးဖြင့် ကို...(၃၈ နှစ်) အားထိုးခဲ့ကြောင်း သိရသည်။
ယင်းသို့ ကတ်ကြေးဖြင့် အထိုးခံရသဖြင့် ကို...(၃၈ နှစ်) မှာ လည်ပင်းယာဘက် ထိုးသွင်းဒဏ်ရာတစ်ချက်၊ ဘယ်လက်မောင်း ထိုးသွင်းဒဏ်ရာတစ်ချက်ရရှိကာ အင်းစိန်ဆေးရုံသို့ တင်ပို့ကုသထားကြောင်း သိရသည်။
အဆိုပါဖြစ်စဉ်မှ ကတ်ကြေးဖြင့်ထိုးသူ ကို...(၃၂ နှစ်) အား အင်းစိန်မြို့မရဲစခန်းက (ပ)၂၁၉၈/၂၀၁၇၊ ရာဇသတ်ကြီးပုဒ်မ ၃၂၆ ဖြင့် အမှုဖွင့်ထားကြောင်း သိရသည်။
Writer - သီဟအောင်
