မေ ၈ ရက် ပြုလုပ်သည့် ရန်ကုန်တိုင်းဒေသကြီး လွှတ်တော်အစည်းအဝေးကို တွေ့ရစဉ်
ရန်ကုန်တိုင်းဒေသကြီးအတွင်း ပုဂ္ဂိလက စက်သုံးဆီဆိုင်များက လက်ဝါးကြီးအုပ်စနစ်ဖြင့် စက်သုံးဆီဈေးနှုန်းများကို တူညီစွာ သတ်မှတ်ရောင်းချခြင်းသည် ကုန်ဈေးနှုန်းကြီးမြင့်ခြင်းကို တွန်းပို့နေကြောင်း မင်္ဂလာတောင်ညွှန့်မြို့နယ်၊ မဲဆန္ဒနယ် အမှတ် (၁) လွှတ်တော်ကိုယ်စားလှယ် ဦးလှဌေးက ပြောကြားသည်။
မေ ၈ ရက်က ပြုလုပ်သည့် ဒုတိယအကြိမ် ရန်ကုန်တိုင်းဒေသကြီး လွှတ်တော် ဆဋ္ဌမ ပုံမှန်အစည်းအဝေး (၂၅ရက်မြောက်နေ့) တွင် ဦးလှဌေးက “ရန်ကုန်တိုင်းဒေသကြီးအတွင်း စီးပွားရေး ပိုမိုဖွံ့ဖြိုးရေး တိုးတက်စေရေးနှင့် ကုန်ဈေးနှုန်း ကျဆင်းရေးတို့အတွက် တိုင်းဒေသကြီးနှင့်ဆိုင်သော စီမံချက်၊ စီမံကိန်းများ ချမှတ်အကောင်အထည် ဖော်ဆောင်ရန် အစီအစဉ် ရှိ/မရှိ” မေးခွန်းမေးမြန်းရာတွင် ထည့်သွင်းပြောကြား ခဲ့ခြင်းဖြစ်သည်။
“ကျွန်တော်တို့ ရန်ကုန်မြို့မှာ သယ်ယူပို့ဆောင်ခနှုန်းများ မြင့်မားလျက်ရှိပါတယ်။ အခြေခံကတော့ စက်သုံးဆီဈေး မြင့်မားနေခြင်းပဲ ဖြစ်ပါတယ်။ ပုဂ္ဂလိကဆီဆိုင်များဟု ဆိုသော်လည်း ဆီဆိုင်အားလုံး ဈေးနှုန်းတူညီစွာ သတ်မှတ်ရောင်းချနေခြင်းက လက်ဝါးကြီးအုပ်စနစ်တစ်ခု ဖြစ်နေပါတယ်။ လွတ်လပ်စွာ ရောင်းဝယ်ခွင့်ကို ပြောင်ပြောင်တင်းတင်း ချိုးဖောက်နေတာလားလို့ မေးခွန်းထုတ်ချင်ပါတယ်။ စက်သုံးဆီဈေးနှုန်း လက်ဝါးကြီး အုပ်ထားခြင်းက ကုန်ဈေးနှုန်းကြီးမြင့်မှုကို အဓိက တွန်းပို့နေခြင်းပဲ ဖြစ်ပါတယ်။ စက်သုံးဆီဟာ လွတ်လပ်စွာ တင်သွင်းခွင့် အပြိုင်အဆိုင် ရောင်းချခွင့် ပြုသင့်ပါတယ်။ နိုင်ငံခြား ရင်းနှီးနှံမှုအထိ လုပ်ကိုင်ဆောင်ရွက်ခွင့်ကို ဖွင့်ပေးသင့်ပါတယ်။ စီးပွားရေး လုပ်ငန်းတွေကို လူတစ်စုကပဲ လက်ဝါးကြီးအုပ် စိုးမိုးခဲ့တဲ့ ခေတ်အဆက်ဆက်ကြောင့် တိုင်းပြည်ဟာ ချွတ်ခြုံကျနေခဲ့ပါတယ်။ ဒီခေတ်မှာလည်း ဒီလူတစ်စုက ချုပ်ကိုင်ဆောင်ရွက် နေမယ်ဆိုရင် အနာဂတ် မှေးမှိန်ပျောက်ကွယ် နေဦးမှာပဲ ဖြစ်ပါတယ်။ ချမ်းသာလွန်းတဲ့သူက မတရားချမ်းသာ၊ ဆင်းရဲလွန်းတဲ့လူက မတရားဆင်းရဲနေတဲ့အတွက် ဖြစ်လာမယ့် ပဋိပက္ခတွေကို သတိပြု ဆင်ခြင်ရမှာပဲ ဖြစ်ပါတယ်” ဟု လွှတ်တော်ကိုယ်စားလှယ် ဦးလှဌေးက ပြောကြားသည်။
အဆိုပါ မေးမြန်းမှုနှင့် ပတ်သက်၍ စီမံကိန်းနှင့် ဘဏ္ဍာရေးဝန်ကြီး ဦးမြင့်သောင်းက ပြန်လည် ဖြေကြားရာတွင် ရန်ကုန်တိုင်း ဒေသကြီးအတွင်း စက်သုံးဆီးဈေးနှုန်းများ ကြီးမြင့်မှုနှင့် ပတ်သက်၍ လက်ဝါးကြီးအုပ်မှု အခြေအနေများကို တိုင်းအစိုးရအနေဖြင့် ဂရုပြုမိပါကြောင်း၊ စက်သုံးဆီ ဈေးနှုန်းများကို သက်ဆိုင်ရာ စက်သုံးဆီဆိုင်များက ညှိနှိုင်းထားသည့်ဈေးနှုန်း မဟုတ်ဘဲ ကမ္ဘာ့ပေါက်ဈေးနှင့်အညီ ဖြစ်လာစေရန် ရန်ကုန်တိုင်းဒေသကြီး အစိုးရအဖွဲ့အနေဖြင့် အစီအမံ ချမှတ်ဆောင်ရွက်ရန် အစီအစဉ်ရှိကြောင်း ပြောကြားခဲ့သည်။
ထို့ပြင် ကုန်ဈေးနှုန်းများ အဓိကကြီးမားလာခြင်းမှာ ကုန်ထုတ်သည့်အချိန်တွင် ကုန်ကြမ်းများ ဈေနှုန်းကြီးမြင့်ခြင်း၊ သယ်ယူပို့ဆောင်ခနှင့် ဝန်ဆောင်ခများ ကြီးမားခြင်း၊ လိုအပ်သည့် လျှပ်စစ်ဓာတ်အား လုံလောက်စွာ မရရှိခြင်း စသည့်တို့ကြောင့် ဖြစ်ကြောင်း၊ ကုန်ဈေးနှုန်းများ ကျဆင်းလာရန်အတွက် ကုန်ကြမ်းစရိတ်များ ကျဆင်းရေး၊ သယ်ယူပို့ဆောင်ရေးစရိတ်များ ကျဆင်းရေး၊ တစ်ဦးချင်း ကုန်ထုတ်လုပ်မှုစွမ်းရည် တိုးမြှင့်လာရေးအတွက် တွန်းအားပေး ဆောင်ရွက်မည်ဖြစ်ကြောင်း၊ အထူးသဖြင့် ရန်ကုန်တိုင်းဒေသကြီး အတွင်း၌ သယ်ယူပို့ဆောင်ရေးခများ ကျဆင်းစေရေးအတွက် တံတားကိုးခုတွင် ဖြတ်သန်းခများ ရပ်ဆိုင်းခဲ့ကြောင်း ဝန်ကြီးဦးမြင့်သောင်းက ပြောကြားသည်။
၂၀၁၈ ခုနှစ် ဖေဖော်ဝါရီလ အတွင်းက အတည်ပြုခဲ့သည့် ၂၀၁၈ ခုနှစ် ဧပြီလမှ စက်တင်ဘာလအထိ ရန်ကုန်တိုင်းဒေသကြီး ဒေသန္တရ စီမံကိန်းတွင် ရန်ကုန်တိုင်းဒေသကြီး၏ ထုတ်လုပ်မှုနှင့် ဝန်ဆောင်မှု တိုးတက်လာရန်အတွက် စီမံကိန်းချ ဆောင်ရွက်လျက်ရှိကြောင်း ဝန်ကြီးက ပြောကြားသည်။
