ရှမ်းပြည်နယ် အရှေ့ပိုင်း တာချီလိတ်မြို့ မယ်ခေါင်ရပ်ကွက် တော်ကော့တွင်း သွားပတ်လမ်း အိမ်အမှတ် (မခ -၁/၂၂၁) နေအိမ်ရှိ ကုမ္ပဏီပိုင်ရှင်တစ်ဦး သေနတ်ဖြင့် ပစ်သတ်ခံရသဖြင့် သေဆုံးမှုဖြစ်ပွားခဲ့ကြောင်း ရှမ်းပြည်နယ် ရဲတပ်ဖွဲ့ရုံးမှ ဧပြီ ၁၈ ရက် ညနေပိုင်းက သတင်းရရှိသည်။
ဖြစ်စဉ်မှာ ဧပြီ ၁၈ ရက် နံနက် ၁၁ နာရီခွဲတွင် တာချီလိတ်မြို့၊ မယ်ခေါင်ရပ်ကွက်၊ တော်ကော့တွင်းသွားပတ်လမ်း၊ အိမ်အမှတ် (မခ - ၁/၂၂၁) တာချီလိတ်မြို့၏ အရှေ့မြောက်ဘက် နှစ်မိုင်ခန့်အကွာ နေအိမ်ရှိ ဦးယောဟန် (၃၅) နှစ်၊ လားဟူ/ခရစ်ယာန်၊ နန့်ယွန်း စေတနာ (မဂ္ဂနက်) ကုမ္ပဏီပိုင်ရှင်၊ မိုင်းဖြတ်မြို့နယ်နေထိုင်သူ ပိုင်ဆိုင်သော နေအိမ်ခြံအတွင်း ခြံအဝင်ပေါက် တံခါးမကြီးအနီး၌ ဦးယောဟန်အား ပက်လက် အနေအထားဖြင့် ဝဲဘက်ရင်အုံပေါ်တွင် ကျည်ဖောက်ဝင် ဒဏ်ရာနှစ်ချက်၊ မေးစေ့ယာဘက် ကျည်ဝင်ဒဏ်ရာတစ်ချက်၊ ဝဲလက်ပြင်ဖောက်ဝင် ဒဏ်ရာတစ်ချက်တို့ဖြင့် သေဆုံးနေသည်ကို တွေ့ရပြီး သေဆုံးနေသူ အနီးတွင် (USA-9mm Luger) အမျိုးအစား ကျည်ခွံလေးခုတို့အား စစ်ဆေးတွေ့ရှိခဲ့ကြောင်း၊ အခင်းဖြစ်ရာနေရာသို့ တာချီလိတ်ခရိုင်မှူး၊ မြို့နယ်မှူးနှင့် နယ်မြေမြို့မစခန်းမှူးတို့ သွားရောက်စစ်ဆေးခဲ့သည်။
“တာချီလိတ်မှာ ဒီနေ့ ဧပြီ ၁၈ ရက် ၁၁ နာရီခွဲအချိန် တာချီလိတ်/မယ်ခေါင်ရပ်ကွက် တော်ကော့တွင်းသွားပတ်လမ်း အိမ်အမှတ် (မခ - ၁/၂၂၁) မှာ သေနတ်ပစ်မှု ဖြစ်ပွားတယ်လို့ သတင်းရတာနဲ့ တာချီလိတ်ခရိုင်မှူး၊ မြို့နယ်မှူး၊ စခန်းမှူးတို့သွားရောက် စစ်ဆေးတယ်။ ဦးယောဟန် နန့်ယွန်းစေတနာ (မဂ္ဂနက်) ကုမ္ပဏီပိုင်ရှင် သေနတ်ဒဏ်ရာတွေနဲ့ ပက်လက်အနေအထား သေဆုံးနေတာ တွေ့ရတယ်။ သေဆုံးသူ ဦးယောဟန်ကို ရဲဆေးစာနဲ့အတူ ဆေးရုံပို့ထားပြီး အမှုမှန် ပေါ်ပေါက်ရေး ဆက်လက်ဆောင်ရွက်လျက် ရှိပါတယ်” ဟု ရှမ်းပြည်နယ် ရဲတပ်ဖွဲ့ရုံးမှ ဒုရဲမှူးစိုးထွန်းဝင်းက ပြောကြားသည်။
