၂၀၁၇-၂၀၁၈ ဘဏ္ဍာနှစ်အတွင်း ပြည်တွင်းပြည်ပရင်းနှီးမြှုပ်နှံမှုပမာဏ ဒေါ်လာ ၃၄ဘီလျံကျော်နှင့် ကျပ် ၂၈၇ ဘီလျံကျော် တန်ဖိုးရှိ စက်မှုဇုန်သုံးဇုန်အထိ တည်ဆောက်လုပ်ကိုင်ခွင့်ပြုလိုက်ကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနမှ သိရသည်။
၂၀၁၇-၂၀၁၈ ဘဏ္ဍာနှစ်အတွင်း နိုင်ငံခြားရင်းနှီးမြှုပ်နှံမှုဖြင့် စက်မှုဇုန်တည်ဆောက်ရေး လုပ်ငန်းတစ်ခုကို ဒေါ်လာ ၃၄ ဘီလျံကျော်ဖြင့် ရင်းနှီးမြှုပ်နှံလုပ်ကိုင်ခွင့် ပြုလိုက်ခြင်းဖြစ်ကြောင်းနှင့် ယင်းပမာဏသည် ယခုနှစ်အတွင်း ဝင်ရောက်ခဲ့သည့် ကဏ္ဍအလိုက် စုစုပေါင်းရင်းနှီးမြှုပ်နှံမှုပမာဏ၏ သုည ဒသမ ၆ ရာခိုင်နှုန်းအထိရှိကြောင်း သိရသည်။
နိုင်ငံသားရင်းနှီးမြှုပ်နှံမှု ကဏ္ဍတွင် စက်မှုဇုန်တည်ဆောက်ရေး လုပ်ငန်းနှစ်ခုကို ကျပ်၂၈၇ဘီလျံကျော်ဖြင့် လုပ်ကိုင်ခွင့်ပြုခဲ့ခြင်းဖြစ်ပြီး နိုင်ငံသားရင်းနှီးမြှုပ်နှံမှု ကဏ္ဍတွင် ကဏ္ဍအလိုက်ဝင်ရောက်ခဲ့သည့် စုစုပေါင်း ရင်းနှီးမြှုပ်နှံမှု၏ ခုနစ်ရာခိုင်နှုန်း ကျော်အထိ ဝင်ရောက်လုပ်ကိုင်ခြင်းဖြစ်ကြောင်း သိရသည်။
မြန်မာနိုင်ငံတွင် ထပ်မံတည်ဆောက်မည့် စက်မှုဇုန်အသစ်များတွင် Developer အဖြစ် အမှန်တကယ်လုပ်ကိုင်နိုင်မည့် ပြည်တွင်းပြည်ပလုပ်ငန်းရှင်မည်သူ့ကိုမဆို လုပ်ကိုင်ခွင့်ပြုမည်ဖြစ်ကြောင်း စီမံကိန်းနှင့် ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး ဦးကျော်ဝင်းက ပြောကြားသည်။
“လက်ရှိ ရှိနေတဲ့စက်မှုဇုန်တွေ၊ စီးပွားရေးဇုန်၊ အထူးစီးပွားရေးဇုန်တွေ ပြန်သုံးသပ်တဲ့အခါကျတော့ လွန်ခဲ့တဲ့နှစ်တော်တော် များများက ဒါတွေကို အကောင်အထည်ဖော်လာခဲ့တယ်။ အကောင်အထည်ဖော်လာခဲ့တဲ့ အချိန်မှာလည်းပဲ စတင်အကောင်အထည်ဖော်ဖို့စပြီး တည်ဆောက်ကတည်းကိုက စက်မှုဇုန်တွေက အရည်အသွေးနိမ့်ကျနေတယ်။ အဲဒီတော့ လက်ရှိစက်မှုဇုန် အဟောင်းတွေကို ပြန်ပြီးအရည်အသွေးပြည့်အောင် မြှင့်လို့ရှိရင် ခက်ခဲတယ်။ ဒါကြောင့်မို့ စက်မှုဇုန် အသစ်တွေ ထပ်ပြီးတိုးချဲ့ဖော်သွားဖို့ရှိပါတယ်” ဟု ပြည်ထောင်စုဝန်ကြီး ဦးကျော်ဝင်းက ပြောကြားထားသည်။
စက်မှုဇုန်အသစ်များ ထပ်မံတည်ဆောက်ပြီးပါက လက်ရှိစက်မှုဇုန်အဟောင်းမျးာတွင် လုပ်ကိုင်နေသည့်လုပ်ငန်းရှင်များအား စက်မှုဇုန်အသစ်သို့ ပြောင်းရွှေ့ရင်းနှီး လုပ်ကိုင်လိုပါကလည်း ခွင့်ပြုပေးမည်ဖြစ်ကြောင်း သိရသည်။
“သို့သော် ကျွန်တော်တို့ အတွေ့အကြုံအရ Developer တွေ စက်မှုဇုန်တစ်ခုကို Developer လုပ်မယ်ဆိုပြီးတော့ ကိုယ်တကယ်လုပ်နိုင်စွမ်းမရှိဘဲနဲ့ အခွင့်အရေးကို ရအောင်ယူထားတယ်။ ပြီးတော့ လာပြီးရင်းနှီးမြှုပ်နှံမှုရှိလား၊ တစ်ယောက်ချင်း တစ်ယောက်ချင်းကိုခေါ်ပြီး နေရာပေးပြီး Developer လုပ်တယ်ဆိုတာ နည်းလမ်းမမှန်ပါဘူး။ အဲဒီတော့ Developer ပိုင်းကိုလည်း Consortium ဖြစ်ဖြစ် တကယ်လုပ်နိုင်စွမ်းရှိတဲ့သူတွေကို ပေးမယ်။ ဒါပေမဲ့ အရင်တုန်းကလို သူများအရင်းအနှီးကို ကိုယ့်အရင်းအနှီး ဖြစ်တယ်ဆိုပြီး Developer လုပ်တာမျိုးကို လက်မခံပါဘူး။ တကယ်လုပ်နိုင်ရမယ်။ သတ်မှတ်ထားတဲ့ အချိန်ကာလအတွင်း လုပ်နိုင်ရမယ်။ ပြည်တွင်းကဖြစ်စေ ပြည်ပကဖြစ်စေ လုပ်ကိုင်ခွင့်ပေးမယ်” ဟု ၎င်းက ဆက်လက်ပြောကြားသည်။
မြန်မာနိုင်ငံ၏ ရင်းနှီးမြှုပ်နှံမှုဥပဒေနှင့် အသစ်ပြဋ္ဌာန်းမည့် စည်းမျဉ်းအသစ်သည် ပြည်တွင်းပြည်ပ စီးပွားရေးလုပ်ငန်းများကို တန်းတူအခွင့်အရေးများကို ဖန်တီးပေးမည်ဖြစ်ကြောင်းနှင့် နိုင်ငံတစ်ဝန်းလုံးရှိ ဒေသများအားလုံးသည် ဖွံ့ဖြိုးတိုးတက်ရန် အခွင့်အလမ်းများတန်းတူရှိပြီး နိုင်ငံတော်၏ စီးပွားရေးတိုးတက်မှုအတွက် အရေးကြီးသဖြင့် ငြိမ်းချမ်းရေးရရှိရန် အရေးကြီးကြောင်း မြန်မာနိုင်ငံ ရင်းနှီးမြှုပ်နှံမှုကော်မရှင် ဥက္ကဋ္ဌ ဦးကျော်ဝင်းက ပြောကြားသည်။
